Fuguub falob mee mara bugan gálaaj mee gacookoore mee bíiñ
12
Ñeer Yéesu nalobiil nꞌfuguub arogiil :
« Babaj amaañen acee haruge ununuk wan mutiñ wo mukaanei mee bíiñ.
Nasoen wo,
nacookoor tin tara gañaafen mutiñ maamu,
nateep etaah érooken yara gapooy.
Afaak,
nakahen ununuk waawu ucookoora-bíiñ guyeken mbil nak gúpurenool butumool,
min ho ajow gajaoor.
2 Nan gawalen mutiñ maamu gútiiŋ mee,
naboñ ájagagaool acee bu nꞌgammee ngacookoor ununuk waawu be éyabul butumool.
3 Bare bugan gacookoore mee bíiñ yaayu ngujogool gutek,
ngukamool naat warorool.
4 Naboñ benen ájagagaool acee bu mꞌbugo.
Ngutegool jaram guŋasool nꞌfukow,
ngufapool ujel wáamak.
5 Nabaañ aboñ áfaaten,
ngumugool.
Naboñ bandiŋ gucee gumeeŋ ;
ngutek gucee,
bugaagu ngumugiil.
6 Ñeer nŋaño'ool aleehool amaañen han ábooli mee,
ho ammee ásola eboñ bu mꞌbugo.
Nꞌgapinoorool min emmee aleehool,
bugo bu gákaanumool.
7 Bare nan gacookoore mee bíiñ yaayu guñow mee aleeh aahu néjool,
ngurogoor :
“Umu abil mee etunool.
Umugaalool mbil uŋaraal fubaj fe.”
8 Ñeer ngujogool gumuk,
ngúpurenool gubehen tíyaŋ. »
9 Yéesu narogiil :
« Taŋ ñeer ara ununuk waawu buu nañum mee ekaan ?
Ho kum be éjool átiiŋul,
namuk gacookoore mee bíiñ yaayu peepe afaak,
nabaañen wo asen gucee.
10 Jikarankaraŋ kum Busafer baabu barok mee :
“Ebírik yaayu yan uteepa waawu gujok mee efeegut,
yo ebaañ mee yóoni éjan yajok mee yaŋ yaayu.
11 Dó peepe bakaaner Acehériit mee,
ban nꞌalaal kankaan waaf wáamak.” »
12 Ñeer unafaan Esúiif yaayu bugo nꞌgupaaliil ngucamen ejok Yéesu mara gúmimir fuguub faafu mooliil nálobum fo.
Bare ngúsebi mee gayooŋ gaagu,
ngukahool to min gujow.
Ngusonken Yéesu mara bacaam lémpo
13 Púr to,
nguboñ Efarisiit gucee mꞌbugara gayooŋ gara Herod bu nꞌYéesu be ebehool fuñut ho nelob.
14 Ngújool gurogool :
« Aliiga,
úmimir mara aw an hara maregen,
ban úsebiut anooan.
Uñeerériit nꞌuhul bugan gaagu,
bare nuwaare'ewaare bulago bara Atúuha mꞌmaregen.
Ulobóli para teer sensen min bugan gucaam lémpo bu nꞌáyiih háamak aahu Sesaar ?
Elí ñeer ucaam,
teer jambil ucaam ? »
15 Fúŋiiŋ ndit ásim mee ban Yéesu námir wan nꞌúyegehiil,
narogiil :
« Waa ucile njicamen ebehom fuñut ?
Jiŋarulom para gakuparu gara ékori min iñeer go. »
16 Nguŋarulool go.
Narogiil :
« Buhul be bara ay ?
Gajow ge may gara ay ?
» Ngurogool :
« Sesaar. »
17 Narogiil :
« Jisen Sesaar waafool,
ban may njisen Atúuha woola.
» Ñeer bugo peepe ngujaahali moola.
Ngusonken Yéesu mara gayiho nꞌgacet mee
18 Esáduke garege mee bajut gayihoúl nꞌgacet mee ngujow gutook Yéesu,
ngurogool :
19 « Aliiga,
fuyuhoum fara Móyiis furoge éeni amaañen acet akat akoñaool babajut aleeh,
atiool be etun akoña aahu min ájuh aŋañenool aleeh.
20 Yoo.
Bajembaj batiaay bara umaañen goono futok nꞌgúruba.
Atíyaara nayab,
nacet baŋañenut aleeh.
21 Arúten aahu natun akoña aahu,
ho may nacet bakahutool aleeh.
Afáaten aahu may mo,
22 jaram bugo gammee futok nꞌgúruba gufaago peepe nꞌecet.
Haani hanur mꞌbugo aŋañenutool aleeh.
Púr to,
akoña aahu may nacet.
23 Elí ñeer bu gasonkeni :
nan gacet mee guñum mee gayiho,
ho ñeer bu gáani akoña ay,
nemmee bugo peepe guyabooyab ? »
24 Yéesu narogiil :
« Jijogut wan Busafer baabu buroge,
ban may jímirut sembe Atúuha buu nsirehe.
Yo ecil mee njilimb.
25 Maregen maregen,
nan gacet mee guñum mee gayiho,
amaañen mat ayab,
akoña mat añuuho.
Bu gáani naŋ emalayika dó nꞌémit.
26 Mara gayiho nꞌgacet mee,
jikaraŋut nꞌéliibar yara Móyiis wan Atúuha alobool mee cik to nꞌjiñobol jasap mee sambun ban jihabut ?
Arogool dó :
“Injé emmee Atúuha hara Aburaham,
Isaak nꞌSakob.”
27 Atúuha let hara gacet mee,
bare hara garoŋ mee.
Yo ecil mee balimberuul mburuuk. »
Fuyuhoum fareg mee gaagu peepe
28 Acee nꞌúpajula fuyuhoum Atúuha najamiil min guceeŋoore mee,
ban nañow mara Yéesu násuusuup Esáduke yaayu jak máamak,
nacigulool narogool :
« Nꞌguyuhoum gaagu peepe féy fommee fútiyaara ? »
29 Yéesu narogool :
« Fútiyaara faafu fo fommee ufee :
“Uyénten Isirayeel,
Acehériit mee ammee Atúuhaolaal,
ho déhooro ammee Atúuha.
30 Ucamen Acehériit mee Atúuhai tíiŋ nꞌésigiri,
mꞌbúyegehi,
nꞌgapinoori,
bu nꞌsembei ró.”
31 Fúruten faafu ufee :
“Ucamen apaali an naŋ min ucamenooro mee.”
Bajut fuyuhoum fucee farege gaage gammee gúruba. »
32 Ñeer amaañen aahu narok Yéesu :
« Iyoo,
aliiga,
wan uroge mee maregen.
Atúuha hanur ban bajut acee éeni let ho.
33 Gacamenool tíiŋ nꞌésigiri,
mꞌbúyegehi búroom bo bu nꞌsembei ró,
ban may gacamen apaali an naŋ min ucamenooro mee,
dáaru rereg ekaan búsimen bu nꞌAtúuha bara esow jaram reem son waawu úsimen. »
34 Nan Yéesu añow mee mara amaañen aahu áluholuho ban násuupoosuup jak,
narogool :
« Ukuhiut búnogen nꞌJáyiih Atúuha.
» Ñeer an abaañut ahaañi gasonkenool.
Ngusonken Yéesu teer Kirista búbajum bara Dawid
35 Púr to,
Yéesu nalako gawaare bugan nꞌyaŋ Atúuha.
Narogiil :
« Buu úpajula fuyuhoum Atúuha gújuhe gurok Kirista aleeh Dawid naam ?
36 Dawid fannaool Búyeget baset mee burandenooranden min arok :
“Acehériit mee naroge Acilaom :
Ulako nꞌgañenom gárib
káŋ bu nan ibil mee ebaŋ ulahoori nꞌetaam nukagiil.”
37 Dawid fannaool awoogewook Kirista aahu Acila.
Buu ñeer Kirista aahu ájuhe áani aleeh Dawid ? »
Yéesu narok bugan gúkaanum úpajula fuyuhoum Atúuha
Gayooŋ gáamak ngon ngáyenten Yéesu nꞌgásuumaay ró.
38 Nan ammee ngaliigeniil,
arogiirok :
« Jíkaanum úpajula fuyuhoum Atúuha !
Gucamenecamen gabeho újuwo wajajak nubaak bu to nꞌgutonjiil ngujawoor nak bugan gaagu gúsit ngulob mꞌbugo nꞌjameeŋ.
39 Gucamenecamen may galako nꞌsítalum sajak mee dó nꞌgúrehoorum gara gawaare furim Atúuha son galako nꞌsítalum sáamak nꞌugaan waawu.
40 Nak gubot waaf waawu peepe wara ukoña gan uraaŋiil gucet mee,
ngúciin Atúuha piyo min bugan gaagu guñowiil.
Bateger ban Atúuha abil mee etegiil,
bo be ereg bataf bara bugaagu. »
Múkori mara akoña acee han araaŋool acehe
41 Púr to,
Yéesu nalako dó nꞌyaŋ Atúuha ajooŋoor tan bugan gubehe mee síkori,
min añow buu nja gubet so dó eeno.
Usaanum gameeŋe ngubet dó meeeŋ.
42 Nañow may akoña acee halelek han araaŋool acehe abet dó múkori múruba matoogut waafóowaaf.
43 Ñeer Yéesu nawook ulagenaool narogiil :
« Iroguulee,
maregen akoña aahu umu han araaŋool acet mee ban nalek ho arege nasene bugan gaagu peepe gabet dó mee.
44 Bugaagu peepe wáfuufen mee nꞌfubajiil ngubehen dó.
Bare ho,
waameen mee nꞌguñenool peepe nabehe dó ;
wan abajeen mee déhooro bu buroŋ. »