(le texte de Lúk 10.25-37 se trouve dans Wan Yéesu arok mee gáyinen mee gukaan)
10
Amaañen hara Samari hájuh mee gabonket
25 Ñeer ápajula fuyuhoum Atúuha acee nacamen ebet Yéesu fúñut. Narogool : « Aliiga, buu nibile ekaan nibaj buroŋ bafaagoériit mee ? » 26 Yéesu narogool : « Fuyuhoum Atúuha waa nfulobe ? Waa nujok dó ? » 27 Amaañen aahu narogool : « Fuyuhoum faafu furoge : “Ucamen Acehériit mee ammee Atúuhai nꞌésigiri peepe, mꞌbúyegehi peepe, nꞌsembei peepe son gapinoori peepe.” Furoge may : “Ucamen apaali an naŋ min ucamenooro meea.” » 28 Yéesu narogool : « Básuuperi bulagolago. Eéni ukaan dáaru peepe, aw be ebaj buroŋ baabu bafaagoériit mee. »
29 Bare ápajula fuyuhoum faafu nacamen mee gasenooro bakooŋ, narogool : « Taŋ ay ammee apaalom an ? » 30 Yéesu narogool nꞌgakoŋ : « Babaj amaañen acee hápurulo Yéruusalem be ejow bu nꞌésuk yan guroge mee Sériko, naloh nꞌguñen upikena bulago. Ngubot waafool peepe, ngutegool jaram áyiho, ngukahool to ngujow. 31 Asímena acee nan newuj to, nañowool, napiilool min ajow bulago'ool. 32 Acee nꞌélewiit gájagage mee nꞌyaŋ Atúuha nan newuj, ho may nan añowool mee, napiilool min ajow bulago'ool. 33 Piyout, an hara Samarib nan newuj. Nan añowool mee, eniinool netey, nabonket. 34 Najow bu to, nataasool sisooho'ool afaak, naŋar múlosoor son bunuk násontenool. An aahu hara Samari nabaj mee efalo, natebool abaŋ dó, ngujow bu nꞌyaŋ yan nja guwalen mee ejaoora min acookoorool dó. 35 Nan tikahen mee, nápuren síkoric asen anafaan yaŋ yaayu narogool : “Mbil ucookooromool ! Eéni bacaam baabu butoogut, nan ibil mee ébaañul, nulobom min icaami waŋaño mee.” »