Máca 6

Yéesu nalob mara garanden an alelek

Jíkaanum ! Jambil jikaan min bugan guñowuul buguul nekaan majage, mara éeni jikaane bugan nguñowuul, mat jiyab bacaam mꞌpaayuul ammee fatiya. 2 Yo ecil mee, éeni úpuren újii galek mee, jambil ugangaanen. Dáaru bugan galobériit maregen nja gukaan mee nꞌgúrehoorum gara gawaare furim Atúuha son nꞌulago waawu, mimbil bugan gusaliil. Iroguulee, maregen bugan gaagu ubugu guyayab bacaamiil gufaak. 3 Bare aw, éeni oon ngájii galek mee, jambil gañeni gamay gúmir wan gañeni gárib gon nekaan. 4 Mo gájii gaagu be ekaani mꞌbukoopen, ban Paayi Atúuha, hañowe mee wan ukoop mee nukaan, bu gabaañeni wo.

Yéesu naliigen bugan min gubil mee éciin eeno

5 Buguul éeni joon néciin, jambil jóoni naŋ bugan galobériit maregen. Bugo nja guyihoyiho dó nꞌgúrehoorum gara gawaare furim Atúuha son may tan ulago urehoor mee mimbil bugan gaagu guñowiil. Iroguulee : bugan gaagu ubugu guyayab bacaamiil gufaak. 6 Bare aw, éeni oon néciin, nunogen nꞌgáseegi, nupeek gápeegumi, núciin dó Atúuha ammee Paayi an to mee tan ukoop mee. Ho añow mee wan ukoop mee nukaan ban be ecaami wo.

7 Buguul éeni joon néciin, jambil jilob meeŋ gurim gabajut nafa, naŋ bugan gámirut mee Atúuha. Bugo nja gupinoopinoor mara ngulobe mee meeŋ, Atúuha be eyab báciineriil. 8 Jambil jóoni naŋ bugo ! Paayuul apii bo námire wajak mee bu mꞌbuguul bala buguul be éciinool.

9 Maa njibil mee éciin eeno :

Paayóli ammee fatiya,

mbil gajai gúkaanumi,

10 mbil Jáyiih jiiya jíjool !

Mbil wan ucamen mee ukaan nꞌetaam naŋ fatiya !

11 Usenóli jaat mutiñ mara funak fe.

12 Ubonkehóli síjunubeoli

naŋ min éli ubonkehe mee galaafeóli mee.

13 Jambil ukahóli ngubantenóli,

bare upagenóli nꞌabantena aahu ;

[mara aw ucile Jáyiih, sembe son gasal bu nanoonan. Amiin !]^a

14 Eéni jibonket gupaaluul galaafuul mee, Paayuul ammee fatiya bu gabonkehuul. 15 Bare éeni jibonkehutiil, Paayuul may mat abonkehuul síjunubeuul.

Yéesu nalob mara balat

16 Eéni joon mbalat, jambil jibet uwooyuul naŋ min bugan galobériit maregen gukaane mee. Bugo nja gubebet uwooyiil be eliik bugan mara balat ngon nu yo. Iroguulee, maregen bugan gaagu ubugu guyayab bacaamiil gufaak. 17 Bare aw, éeni oon mbalat, nucookoor fukowi jak ban núbuufulo. 18 Mo bugan gaagu mat gúmir mara balat nom nu bo, bare Paayi Atúuha ammee to takoopo mee, ho be émir. Ban ho añowe mee wan ukaan mee mbukoopen, bu gabaañeni wo.

Fubaj fakajenériit mee

(Lúk 12.33-34)

19 Jambil jiŋes gahomen fubaj baabe nꞌdúniya ban batenka son busem nja ukajen fo, ban may úkuu nja gúñanag nꞌsipalanteer ngúkuet. 20 Bare jihomen fubaj fatiya nꞌémit, dan batenka son busem dit ukajen fo mee, dan úkuu dit gújuh gunogen bu síkuet. 21 Seset mara tan fubaji fommee, búyegehi may bu gan to.

Fujaaŋa fara eniin

(Lúk 11.34-36)

22 Gúcil gommee fujaaŋa fara eniin. Eéni gúcili mara go, eniini búroom yo bu gaŋanto. 23 Bare éeni gúcili gulet mara go, eniini búroom yo bu gáani nꞌemooc. Eéni ñeer fujaaŋa fammee nꞌaw fumooc, moocimooc bíb

Atúuha son síkori, aw be eŋar waa ?

(Lúk 16.13)

24 An ájuhut áani ajágaga hara unafaan gúruba nu ganur ; mara ho be efoy hanur min acamen aahu ban búyegehool bu gan nꞌhanur náwug aahu búsol. Jíjuhut jimiigelet nu ganur Atúuha son síkori.

Jambil jísiboor

(Lúk 12.22-31)

25 Yo ecil mee niroguul : jambil jísiboor mara múcahoaayuul son múremiinaayuul bu mꞌburoŋuul. Jambil jísiboor may mara bubonnoor bu nꞌsiniinuul. Buroŋ buregut pére múcahoaay ? Eniin eregut pére bubonnoor ? 26 Jiñeer upuu waawu : dit uruk, dit ucal, dit uhomen waaf ubaŋ búfaen, bare Paayuul ammee fatiya nákumenekumen wo. Jiregut wo pére ? 27 Ay mꞌbuguul gásiboorool gújuhe gubenen buroŋool fáriit ?

28 Waa ucile may njísiboor mara bubonnoor ? Jiñeer éruup yara mafos mara urager waawu min nja eyahulo mee ! Dit éjagak, dit eliir, 29 bare ínje ilobuul yo : Haani áyiih aahu Salomoŋ fannaool, manooman fubajool fújalakoe, amusut abaj bubonnoor bujak jaram bureh nꞌéruup yanur sah yara mafos maamu ! 30 Eéni Atúuha ásangen jak mafos mara urager waawu maroŋ mee jaat ban gajom bu gabeheni nꞌsambun, buu mbile ekaan mat areg násangene jak buguul gan gáyinenuul gutoogut mee ? 31 Jambil ñeer jísiboor njirok : “Waa nubilaale fúcaho ? Waa nubilaale marem ? Waa nubilaale gakaano ?” 32 Gáyinenut mee Atúuha, dáaru nguŋese mee báyolout. Paayuul ammee fatiya námimir mara buguul jicamencamen dó peepe bu buroŋ. 33 Jimundum jiŋes Jáyiih Atúuha njiroŋ naŋ min ho acamen mee. Mo ho may bu gabenenuul wabil mee gaŋaño. 34 Ñeer jambil jísiboor mara gajom, mara yara gajom, yo ecilooroe. Funak fanoofan nꞌsílaam fo.