Máca 7

Yéesu narok jambil jicaf an

Jambil jicaf bugan, mo may Atúuha mat acafuul. 2 Min jibil mee ecaf bugan, mo may nabiluul mee ecaf. Gaciibum gan jibil mee eŋar njiciib bugan gaagu, nu go may Atúuha abiluul mee eciib. 3 Waa ucile noon neñeer jijit jammee nꞌjícil ati'i, ban aw újuhut uñow fugol fammee nꞌjiiya ? 4 Buu nújuhe urok ati'i : “Unaak nípureni jijit jammee nꞌjícili !”, ban aw fugol dó nꞌjiiya ? 5 Aw an alobériit maregen, umundum úpuren fugol fammee nꞌjícili, aw be eñow ŋanto bu gápuren jijit jaaju jammee nꞌjícil ati'i.

6 Jambil jisen waaf waseset bugan gajagut mee ganogoor mee naŋ siyen mara gújuhe gúbaañul guŋaapuul. Jambil jiŋar banuguul jibehen to mꞌbugan ganogoor mee naŋ sikumba, mara gújuhe gukak bo.

Jíciin Atúuha, ho be esenuul

(Lúk 11.9-13)

7 Jíciin Atúuha, ho be esenuul. Jiŋes, buguul be eñow. Jitek gápeegum gaagu, bugo bu gápeeguluul. 8 Anooan áciin mee Atúuha, ho be eyab. Anooan aŋes mee, ho be eñow. Anooan atek mee gápeegum, bugo bu gápeegulool. 9 Ay mꞌbuguul abil mee esen aleehool ekenkereŋ ho báciinerool mutiñ ? 10 Mbil eeno jicaaŋen náciinool, ho pére be esenool enaab ? 11 Eéni ñeer buguul jálaaj mee jíjuhe jisen guleehuul waaf wajajak, buu mbile ekaan Paayuul ammee fatiya mat areg nasene wajak mee bugan gáciinool wo mee ?

12 Waaf waawu peepe wan jicamen mee bugan gukaanuul, buguul jikaan wo may bu mꞌbugo. Fuyuhoum fara Móyiis son busafer enabiyoŋ yaayu wo nfurok mee.

Ulago wammee úruba

(Lúk 13.24)

13 Jinogen nꞌgápeegum gagog mee. Gápeegum gápeegulo mee bu nꞌecet guwuwuŋ, ban bulago bajow mee bu dó buŋantoŋanto. Bugan gameeŋe dó nja gujow. 14 Bare gápeegum gara ejow bu mꞌburoŋ guwuŋut, ban bulago bajow mee bu dó bugogog. Gañow go mee ban ngujow ró, gumeeŋut.

Bununuk banooban mutiñ bo

(Lúk 6.43-44)

15 Jíkaanum enabiyoŋ yaayu galet mee bugara maregen ! Bugo be éjool bu mꞌbuguul ngubeb naŋ sísaaja, bare ñara dáaraiil siyen futaŋaat sijoga ngoom. 16 Bakaaneriil be eciluul njímiriil. Ujúhe pére úbajul gumoobaay gureha nꞌjiñobol jara unuk, teer újuhe may ubaj gumoobaay gúriha mꞌbúteful ? 17 Bununugóonunuk bajajak be ebuk mutiñ majajak. Bare bajagut mee, mutiñ majagut nja bubuk. 18 Bununuk bajajak bújuhut bubuk mutiñ majagut, naŋ may min bununuk bajagut bújuhut mee bubuk mutiñ majajak. 19 Bununugóonunuk babajut mee mutiñ majajak bo be epihi mbubeheni nꞌsambun. 20 Mꞌbakaaneriil njibil mee efaas enabiyoŋ galet mee bugara maregen.

Elob son ekaan let sanur

(Lúk 13.25-27)

21 Let bugan gaagu peepe gawoogeaam mee “Acila, Acila” gubile ganogen nꞌJáyiih jara Atúuha, bare gakaane mee déhooro wan Paayom ammee fatiya acamen mee. 22 Nꞌfunak fara batalen baabu, gameeŋe be erogom : “Acila, Acila, let nꞌgajai éli uware'e ? Let nꞌgajai éli ukame siseytaane saasu ? Let may nꞌgajai éli ukaane waaf wameeŋe wajahaalie bugan ?” 23 Bare ínje be erogiil : “Injé imusut ímiruul. Jípur taahe jikuhiom, buguul gan bakaaneruul bujagut mee !”

Siyaŋ sammee síruba

(Lúk 6.47-49)

24 Ñeer anooan hajam mee gurim ge nakaan wan gulob mee, ho bu gáani naŋ an áluholuho hateepe yaŋool tin tahahank kaŋ. 25 Emít nelub, mal máamak mmupiis, fúrus fáamak nfutek nꞌyaŋ yaayu, bare manooman elohut mara gúcit yo gubaŋibaŋ tin tahahank kaŋ. 26 Bare anooan ajame gurimom afaak akaanut wan ilob mee, ho bu gáani naŋ agonoa haritene guteep yaŋool nꞌgaruus. 27 Emít nelub, mal máamak mmupiis, fúrus fáamak nfutek nꞌyaŋ yaayu, neloh búroom yo peepe. »

28 Nan Yéesu alob mee gurim gaagu afaak, baliigenerool mbujaahali gayooŋ gaagu máamak, 29 mara naliigeneiiliigen naŋ an abaje fuyuhoum ban bunogoorut mꞌbara úpajula fuyuhoum Atúuha.