(Audio de ce chapitre disponible dans Fuliik Atúuha)
Yéesu nayihoúl dó nꞌfuyaak faafu
24
Dimaasa mꞌbújom pím,
ukoña waawu nguyiho nguŋar muloosoor maamu son esantiñaajo yaayu san gucookoor mee,
ngujow bu nꞌfuyaak fara Yéesu.
2 Nan gútiiŋ mee,
ngutook ekenkereŋ yaayu yapeegeen mee butum baabu ékirinkeni ehajeni mee.
3 Ngunogen dó,
bare gutoogut dó eñalen yara Acila aahu Yéesu.
4 Ngupinoor guyok,
gujogut.
Umaañen gúruba ngúpuruliil gukaano wañ uhiina pararar nak uyij.
5 Ukoña waawu ngúsebi máamak,
ngúsit.
Umaañen waawu ngurogiil :
« Waa ucile njoon fuŋes dó nꞌgacet mee an arondoŋ ?
6 Alet taahe,
abambaañ aam mꞌburoŋ.
Jiwosen wan alobuul mee ho bo Gálile.
Aroguurok :
7 “Aleeh An ho be eseni ukaana síjunube min gufaaŋool nꞌekuruwa nacet.
Nꞌfunak fúfaaten ho be ebaañ aroŋ.” »
8 Ñeer nguwosen gurim gaagu gara Yéesu.
9 Ukoña waawu ngúpurul nꞌfuyaak faafu,
ngujow gugaan wakaan mee peepe ulagena Yéesu gammee guñen nu hanur,
nꞌulagenaool bugaagu.
10 Ukoña waawu ubugu,
bugo gommee Mari hara Magudala,
Saan,
mꞌMari jaw Saak nꞌukoña gucee gajaaoor mee mꞌbugo.
11 Bare ulagena Yéesu gammee guñen nu hanur gúyinenut ukoña waawu mara gujojok elobiil eñulut.
12 Bare Piyeer ho nayiho atey bu bo nꞌfuyaak faafu.
Nátiiŋ,
náñup náñunden,
nañow dó úbil wan guguubool mee déhooro.
Naat nꞌgajaahali nu mo ró mara wakaan mee peepe.
Ejow yaayu mꞌbulago bara Emayuus
13 Nꞌfunak fanur faafu,
ulagena Yéesu gúruba ngon nejow bu nꞌésuk yan guroge mee Emayuus.
Epúr Yéruusalem bu bo,
ñagoñago.
14 Nan gommee nejow,
ngon nelob mara wakaan mee peepe nꞌgunak gaagu.
15 Dó nꞌelobiil nꞌgabehooriil bugo nejow,
Yéesu natoogeniil min gujaaoor ;
16 bare mbaj wacile gufaasutool.
17 Yéesu narogiil :
« Taŋ waa njon nelob njijow ?
» Ñeer nguyiho taj,
ngubet uwooyiil.
18 Acee mꞌbugo,
han guroge mee Kileopas,
narogool :
« Aw nooni pére mꞌbugan gacin mee Yéruusalem ujamut wabaj to mee gunak ge ? »
19 Narogiil :
« Waa ubajeene ?
» Ngurogool :
« Wakaan mee kum Yéesu hara Nasaret.
Ho anabiyoŋ han bakaanerool son gurimool gubaj mee sembe to nꞌAtúuha bu mꞌbugan gaagu peepe.
20 Unafaan úsimenaolaal nꞌunafaan ésugolaal nguŋarulool min acafi,
ngufaaŋool nꞌekuruwa nacet.
21 Elí úyineneenyinen mara ho abileene gapagen Isirayeel,
ban jaat baje ñeer gunak gúfaajiir nan dáaru peepe kaane.
22 Maregen ukoña gucee gammee nꞌéli gukaanóli nujaahali máamak :
gujojow jaat mꞌbújom pím bu nꞌfuyaak faafu,
23 bare gutoogut dó eñalenool.
Nan gubaañulo mee,
ngurogóli simalayika sípuruliil nsirogiil arondoŋ.
24 Gupaalóli gucee gujojow bu bo nꞌfuyaak faafu,
nguñow wan ukoña waawu gulob mee peepe,
bare Yéesu fannaool,
guñowutool. »
25 Ñeer Yéesu narogiil :
« Maregen,
buguul bugan gájuhut ejok waafóowaaf,
ban jiwaakenut gáyinen waaf waawu peepe wan enabiyoŋ yaayu gupiy mee nelob !
26 Dó nꞌfuliik Atúuha kum,
Kirista mo nabil mee élaam min kindiŋ ayab gasalool. »
27 Nayiho ápajuliil walobi mee moola mꞌBusafer baabu peepe,
jógum mꞌbara Móyiis káŋ bu mꞌbara bugaagu enabiyoŋ peepe.
28 Nan gújooŋoor mee ésuk yaayu yan ulagenaool gommee nejow boot,
Yéesu nakaan naŋ gafaalen nan nu yo ;
29 bare nguhuoorool ngurogool :
« Upíilul taahe nꞌéli,
mara tinak tiŋaahoe ;
maareer ntijon.
» Ñeer Yéesu napiil anogen nawalen to mꞌbugo.
30 Nan ammee nfúcaho mꞌbugo,
naŋar fúmbuur faafu,
nasal Atúuha afaak,
nasaahoor fo aseniil.
31 Ñeer to bújooŋoor nŋantoiil min gufaas Yéesu.
Bare naliimiil to.
32 Ñeer ngurogoor :
« Sísigirola kum siseewoseewo,
nan alobe mee nꞌalaal mꞌbulago ho ngápajulola Busafer baabu ! »
33 Ñeer ulagenaool gammee gúruba nguyuho to bújooŋoor ngubaañ bu Yéruusalem.
Nan gútiiŋ mee,
ngutook bo ulagena Yéesu gammee guñen nu hanur,
tin tanur nꞌgupaaliil
34 nak gurok :
« Maregen,
Acila nabaañulobaañ aam mꞌburoŋ !
Simoŋ añowooñow ! »
35 Ñeer bugo may nguyiho ngugaaniil wabajiil mee mꞌbulago,
son may buu ngufaasool mee nan asaahoor mee fúmbuur faafu bugo nfúcaho.
Yéesu nápurul ulagenaool to Yéruusalem
36 Bugo dó nꞌelob yaayu, Yéesu fannaool nápuruliil to nꞌetut. Narogiil : « Gásuumaay góoni mꞌbuguul ! » 37 Ngúkubo, ngutelen máamak mara nꞌgapinooriil let an bo mee. 38 Bare Yéesu narogiil : « Waa ucile njísebi reh mee ban úyegehuul nucehoor ? 39 Jiñeer guñenom nꞌgoohom : ínje fannaom ! Jimamayenom min jiñow. Hápur mee asaay dit abaj eniin nꞌuwuul ban jiñoñow ínje ibabaj ! » 40 Ho nelob gurim gaagu, naliigiil guñenool nꞌgoohool. 41 Ngúyinenut mee bu jaat mara gásuumaay son gajaahali gammee mꞌbugo, Yéesu nasonkeniil : « Jibabaj taahe múcahoaay ? » 42 Nguŋarulool gasaat gara jicaaŋen jasowisow. 43 Naŋar go atogoñ bújooŋooriil.
44 Ñeer narogiil : « Wan ilobuul mee nan eemeen mee mꞌbuguul mara walobi mee múmbaam nꞌfuyuhoum fara Móyiis, mꞌBusafer bara enabiyoŋ yaayu son may bara éliibar yara Ufooñ waawu, wo peepe bu gakaano. » 45 Afaak nápeegul úyegehiil min ñeer gújuh gujok wan Busafer baabu bulob mee. 46 Narogiil : « Saferisafer mara Kirista be élaam, nacet, nayihoúl dó nꞌgacet mee nꞌfunak fúfaaten. 47 Ban galagenool mee bu guwaare nꞌgajow goola nꞌsísuk saasu peepe sara dúniya jógum taahe Yéruusalem, mimbil bugan gujok émiremma ngúlowul bakaaneriil min Atúuha abonket síjunubeiil. 48 Buguul jañow mee njijam dáaru peepe, buguul jibil mee egaan bugan gaagu. 49 Injé fannaom be eboñúl bu mꞌbuguul Búyeget Baset mee ban Paayom alob mee mara bo ; bare mbi jilako dáare nꞌésuk ye bu nan jibil mee eyab sembe saasu sara fatiya. »
Yéesu nabaañ bu fatiya