Pul a ge seriye ika ba ŋgar a, ika miɗ Agaripa
26
1 Aləka Agaripa a gwaɗa a Pul:
«I vilek a vatwa kinehe ka,
fàfəl ika ba yak a kuɗa.»
Pul a zla ahər a mbulum,
kamala megweɗe ya ka,
i fèfil a kurum a te.
Dite a dza ba aà mifefile.
A gwaɗa a Əbay ata:
2 «A kər batsah Əbay Agaripa,
Yàa ŋgaya ba hinne,
aɗaba ana Yàa ŋgat vatwa aà mifefile ika ba gà ya və̀ɗəna ika miɗ yak a,
agəra gà dukw ana tserdze gà Yahuda ta viliŋ dər bakal a.
3 Maŋgayaba gà ndeyndey ka,
aɗaba kər kà sər mendze gà Yahuda,
dite nda mimbètsèba ahəm agəra fəla tar ana ta gewa fit dze ya.
Iye ihər i gek a kamkam,
dza zləm a mifefile gà ana i tsik a ya lele te.
4 Gà Yahuda tserdze tə sər mendze gà,
à gər ana i ge gawla ya.
Maa ndza akaba dze,
dite i ndzawa i Yeruzalem asa ya.
5 Daga piŋŋe,
ku weke tə sər ka,
iye gà *Farisa.
Tar ŋa na ti tsikik a.
I zezem a məpala ahəm Mbulum nda ndzer ŋa à gà Yahuda ya.
6 Ama kinehe ka,
iye i seriye.
Aɗaba iye riŋ nda madzala gà gər aka dukw ana ndzer,
Mbulum a tsik i sida ya,
a gwa,
i ta vile a mə̀r a ya,
a gà bàba gà tsir mə̀r a.
7 Gà gwala ga mburma mə̀r ana kurwa gəra sula tserdze ya,
tàa dzala aka dukw ata mbaŋa.
Agəra taŋa na ta gewa megemir a Mbulum ku ndaavəɗ,
ku ndaapat hinne ya.
Aɗaba taŋa na gà Yahuda ta mìŋ à bakal ka,
agəra dukw ata mbaŋa.
Yaw,
taŋa dze ana,
wànà lele ya,
wànà lele tsiye,
Əbay?
8 Aɗaba la na kurum gà Yahuda ka dzalum ka,
kà nwim dər pàrsa aà dukw ana Mbulum a gwa ka,
i ta mbilere a mburma i məməta ya kaɗəŋ a tsiye?
9 Ama iye nda gər gà tekeɗe,
akahər ata Yàa dzala gà duwa hinne,
aà manəsa à bazlam Yesuw gà Nazaret,
kamala i kurum ata kà dzalum a mbaŋa.
10 I ge gà dukw ata fit dze ka,
i Yeruzalem.
I ŋgat ndzəɗa ka,
i təv gà bàba gà ɓəzla mandəva kuɗa a Mbulum a.
Yàa gasa gà ɓəzla mazazama Yesuw hinne a daŋgay.
I təv ana ta gewa a tar seriye,
ta bets a tar a ka,
i gwaɗawa,
kəkaaha,
lele ndzer mbaŋa.
11 I sèwèrewa a tar are hinne i gà ga mahàmà a Mbulum ana i fata ya,
dite ka,
ta miyak à magəsa Yesuw fit.
Matsəɓatsəɓ ga ika gər tar hinne.
I yahawa tar,
ku mege i gà kwite ŋgiɗ a diriŋ tekeɗe.
I dawa aka tar pəra,
aà mesewere a tar are.»
Pul a ɗama, meme na a mbəɗ à gəzləŋ ŋgar a
12 «Kərga taŋa ya,
gà Əbay gà ɓəzla mandəva kuɗa a Mbulum ta viliŋ ndzəɗa a ba,
tə slər iye a kwite Damas.
13 A təv ana i mah ba,
i de a ya ka,
magər pat a ge aà iye ika vatwa.
I fə̀r ikaba ya ka,
i ŋgat a təv dzaydzay ŋa hinne,
a za madə̀và pat ana aà gəza mbulum a.
A le mə̀r tits nda gà mburma ana mə̀r dze ya,
batsah Əbay gà.
14 Mì dza a bəɗ fit.
Dite i tsarakara iɗəm mifefile duwa i fata ya ndaka ahəm mə̀r gà Yahuda ya.
Mifefile ŋa a ɗe à iye ka:
“Sawul,
Sawul,
aàmala na ki sèwèriŋ a are kataya ya?
Ki sèwèrebe a are ka,
a ba yak,
kamala sla ana à sèwèrebe a are,
a sər ahəm aà mala ga ŋgar tsiye.”
15 I gwaɗar aakaha:
“Kər ana weke,
Batsah ga ŋa?”
A gweɗiŋ aakara:
“Iye Yesuw ana kər riŋ ihər ki sèwèriŋ a are ya.
16 Ama hitse aà mbulum.
I pàtak aba ka,
dite ki ne a mala meslire gà.
Ki ta me a à dukw ana kə ŋgatar və̀ɗəna ya,
ndəna i ɗifek a dər aka miɗ mba ya.
17 I slir a kər a təv gà Yahuda nda gà mburma ana tar gà Yahuda tsiye.
Dite i be a à kər a i ahər tar a.
18 A sèsiŋ ka,
ki hìndìk a ter a are,
na dite ta mère a i luvuŋ a,
a təv dzaydzay ŋa ya ya,
dite ka,
ti dere a i mekwere Əbay sitene ya,
a təv Mbulum a.
Aɗaba na tàa gəs iye ka,
Mbulum à pìl a à bakal tar,
dite ta ŋget a təv mendze a liwiŋ gà mburma ana Mbulum a pala tar a.”»
Pul a ɗif à megemir ŋgar
19 «Ama Əbay Agaripa,
iye ka,
Yàa niw dukw ana i ŋgatar,
ndəna i tsarakara i mbulum a tsa.
20 I lah məma à bazlam ata ka,
a gà mburma ana i gà kwite Damas nda Yeruzalem a dzekwiŋ,
dite na i ti tsik a gà mburma ana tserdze i Yuda ya,
i dəba ŋa ya,
a gà mburma ana tar gà Yahuda tsiye tserdze ya mbaŋa.
I gwaɗawa a tar ka,
tə dara,
ta mbəɗ à gà gəzləŋ tar aka miɗ Mbulum,
dite ta ge gà megemir gà ŋgwal ŋa ana ta pèt a dər,
dite mburma a sir a dər ka,
tàa mbəɗ à gà gəzləŋ tar kaɗəŋ ndzer a.
21 Aɗaba taŋa na,
i da a ga Mbulum batsah ŋa ata ya ka,
gà Yahuda tə daha,
ta gəsara iɗəm iye ya,
ta waya mekìɗè iye ya.
22 Ama Mbulum a zlèk iye i təv tar a haa kinehe,
dite iye riŋ ihər i ge a sida ŋgar ika miɗ mburma tserdze,
ika miɗ gà ɓəza nda gà bàba ŋana fit dze.
Yàa tsik aɗəm duwa ŋgiɗ ika gər biy gà ɓəzla məma à guma Mbulum nda gà biy Musa ana ti tsik akahər ata ya tsa.
23 Ta gwaɗawa ka:
Mala məmbala à mburma ana Mbulum a gwa,
i slir a kurumehe a ya ka,
tì sèwèrer a are,
ta kiɗ a ŋgat,
dite a ta mbilere a i məməta ya.
Ŋgat na à lèh ahər a ya.
A ti tsik a bazlam ana a vile a dzaydzay a gà Yahuda,
nda gà na tar gà Yahuda tsiye mbaŋa.»
Pul a ɗe à vatwa magəsa Yesuw a Agaripa
24 I təv ana Pul à fèfil a ikaba ika miɗ tar kamala taŋa ya ka,
Festus a wideye aka Pul,
a gwaɗar:
«Kər ka,
kàa be a dala,
Pul.
Aɗaba medzeŋge yak ana kà dzeŋge hinne ya ka,
ka vəlak mibe a dala.»
25 Pul a gwaɗar aaka:
«Yàa be a dala tsa,
batsah Əbay.
Dukw ana i tsik a ya ka,
nda ndzer ŋa nda metsehe gà lele,
pàrsa iɗəm tsa.
26 Aɗaba ana Əbay Agaripa a sər mifefile ŋa fit dze ya.
Ama iye ka,
magəɗa a giŋ a tsəka,
agəra taŋa.
Aɗaba dukw ana a ge ba ka,
makàhà ŋa tsa,
are ihər tserdze.
27 A kər,
batsah Əbay Agaripa,
wànà kàa gəs dukw ana gà ɓəzla məma à guma Mbulum ti tsik a tsiye?
Iye i sər ka,
kàa gəs.»
28 Agaripa a gwaɗar aaka:
«Kà dzala ana,
i gis a Yesuw agəra bazlam yak ata kà tsikiŋ a tsara ya?»
29 Pul a gwaɗar aaka mbaŋa:
«Ku mege kinehe tsara,
bəla aka miɗ mba tekeɗe ka,
iye i heme a a Mbulum,
aɗaba kər,
nda gà mburma ana ɗa i faha ya tserdze,
dite ka nwim gà ɓəzla magəsa Mbulum kamala iye ya.
Ama i waya ka,
tə dzaw kurum a daŋgay kamala iye ya tə tsa kəla.»
30 Aləka i dəba ŋa ya,
gà bàba gà Əbay ata nda gà Bernike,
dite nda gà mburma ana a riŋ mayahaba gər ŋa i təv ata ya,
ta hitse aà mbulum,
ti dere a a bəra ya.
31 Aləka i təv ana ti dere a a bəra ya ka,
ta gwaɗaba ika magər tar:
«Wele aka ka,
aka ge dukw ana ta kiɗ a dər ŋgat,
kige tsa,
tì yè a dər ŋgat a daŋgay a tsa.»
32 Ama Agaripa a gwaɗa a Festus:
«Wele aaha ma wiz seriye a təv batsah Əbay ana i Ruma ya tsəka,
ana ka,
kàa pəl à ŋgat.»