Pul a wiz seriye i təv batsah Əbay gà Ruma
25
1 I təv ana ti tike Festus a Əbay,
a həna iɗəm pat makər a ka,
a mah ba i Kaysariya i fata ya,
a da a Yeruzalem.
2 A ndzeha a fata ka,
gà Əbay gà ɓəzla mandəva kuɗa a Mbulum nda gà bàba gà Yahuda tserdze,
tə daha a təv ŋgar,
ta wiz ihər bazlam Pul a,
ta gwaɗar:
3 «Kamkam,
zla a mə̀rra Pul a faha ya,
aà mege a mə̀r seriye i faha te.»
Ti tsikar kataya ka,
dite tì dzer a ba aà vatwa,
ta kiɗ a ŋgat.
4 Ama Festus a gwaɗa a tar:
«Pul ka,
a riŋ a ndze a i daŋgay i ma gà i Kaysariya.
Ama kinehe i huɗ mendze zaakwa ya ka,
i mbìɗ a gər a ma.»
5 A gwaɗa a tar asa:
«Na aka sàs a kurum ka,
gà bàba ŋa ana i liwiŋ kurum a,
tə̀ dəɗ aka iye.
Na wele ŋa aka ge bakal ka,
ki ta gwim a seriye ŋa ka,
a fata.»
6 I dəba ŋa ya,
Festus ibam,
aka ndza riŋ i fata kwaskwa ide lele nda gà tar.
Aləka i dəba ŋa ya,
a mbəɗ gər a ma a Kaysariya.
Dite gà mburma ata tə dəɗ aaka.
Ndidwe ŋana ka,
a da a ga seriye,
a gwaɗa a tar:
«Zelwimiŋara Pul a tsara.»
7 Aləka Pul a daha ka,
gà Yahuda ata tə dəɗ aakaha i Yeruzalem a,
ti ler tits i təv seriye.
Ta màr à bakal pampam hinne,
kwets wur bazlam ŋa a riŋ ɓav tsa.
8 Bazlam tar ata a ndəv ka,
Pul a fàfəl ikaba ya te.
A gwaɗa a tar:
«Yàa ge bakal duwa nda təv məpala ahəm Musa tsa,
kige tsa nda təv ga Mbulum batsah ŋa ana i Yeruzalem a tsa,
dite kige tsa nda təv batsah Əbay gà Ruma tsidze asa mbaŋa.»
9 Festus a sasar,
dite gà Yahuda ta ŋgaya ba agəra ŋgat.
A gwaɗa a Pul:
«Wànà a sàsak ana,
ki tèkwe a a Yeruzalem,
i ta ge a seriye yak a fata ya?»
10 Pul a gwaɗar aaka:
«Ŋgulum ki tèkwe a dər ka,
a təv batsah Əbay gà Ruma.
Ŋgat na a ti ses a iba seriye aaha ya,
tsəka,
aɗaba kər nda gər yak kà sər,
Yàa ge bakal duwa a gà Yahuda ilik tsa.
11 Na Yàa ge dukw ana ŋgwal ŋa tsa biy mekìɗè dər iye ya tekeɗe ibam ka,
Yàa niw məməta tə tsa,
na iye ya.
Ama dukw ana ta viliŋ dər bakal a,
tàa tsik wur ŋa tsəka,
wura a sle a aà mivile a tar iye tsa.
Say batsah Əbay gà Ruma na a ta giŋ a seriye ga ya.»
12 Gà Festus tə tsaraka bazlam ŋgar ata kataya ka,
ta mà akaba à bazlam nda gà mburma ŋgar.
Dite i dəba ŋa ya,
a gwaɗar:
«Na kàa tsik kataya ka,
ki dwim a dər ka,
a təv ŋgar kaɗəŋ.»
Pul ika miɗ seriye Agaripa nda damər ŋgar məkəs ŋa Bernike
13 Aləka i dəba mehinne zaakwa ya ka,
gà batsah Əbay Agaripa nda damər ŋgar a riŋ məkəs ŋa,
zləm ŋgar Bernike,
tə daha a kwite Kaysariya,
aà mege wusa a Festus.
14 Tə ndza i fata mehinne diŋ.
I huɗ mendze tar ata ya ka,
Festus a tsik bazlam Pul a batsah Əbay ata.
A gwaɗar:
«Wele duwa naha,
i le ahərra aka ana Filikus a da i faha ya ka,
a miyak à ŋgat i daŋgay hiywe.
15 Yàa da a Yeruzalem zaakwa.
I daha ka,
gà Əbay gà ɓəzla mandəva kuɗa a Mbulum nda gà bàba ŋa ana ta kwere a gà Yahuda ya,
tə dza ahər gwìdze a təv ga.
Ta hemiŋ hinne,
ta gweɗiŋ:
“Kamkam,
say seriye mà gəs ŋgat ndzer.”
16 Ama i gwaɗa a tar aaka ka:
“Fəla mə̀r gà Ruma ka,
ta gis a mburma kataya,
ta kiɗ a ŋgat,
ti ze medze tar aà ba gər ika miɗ seriye tsa.
Ku weke a tsik a biy ŋgar,
bəla ndzer ŋana ana,
biy weke dzekwiŋ.”
17 A gər ana i dara a faha ya ka,
gà mburma ata mì da akabara ya,
Yàa məts aà duwa tsidze.
Ndidwe ŋana tsara ka,
i da a ga seriye.
I gwaɗa a tar:
“Zelwimiŋaha a Pul,
ma dara.”
18 Aləka Pul a daha ka,
gà na ta ge ahər seriye ya,
dzìrìk tə daha,
tits ti ler.
I dzala ka,
aka ge dukw ana ŋgwal ŋa tsiye.
Tsaatsa Yàa le aɗəm aà wur bazlam ilik tsa.
19 Ama i tsaraka,
ta mbetseba ahəm ka,
ndaka təv fəla tar ana ti zezem a ya,
dite ndaka təv wele duwa tə zalar Yesuw,
a mət kuɗa ka,
Pul a gwa,
aka mbəlara i məməta ya pəra.
20 Gər aka wisiŋ,
i sər meme na i ses a ter a ikaba bazlam ata ya tsa.
Aɗaba taŋa na i gwaɗa a Pul:
“A sàsak ana,
ki tèkwe a a Yeruzalem,
na dite i ta ge a seriye medzibe bazlam yak aaha ya kəla ya?”
21 Ama Pul tekeɗe,
a gəs a fata tsa.
A gwa:
“Say batsah Əbay gà Ruma na a ti sèsiŋ a iba seriye ga ya ya.”
Dite i gwaɗa a sliwdze ka:
“Kaslum ŋgat a faha tə̀ma,
say pat ana Yàa ŋgat vatwa aà maslə̀rà ŋgat a təv batsah Əbay a dzekwiŋ.”»
22 Agaripa a tsaraka kataya ka,
a gwaɗa a Festus:
«Iye tekeɗe,
a sèsiŋ metsereke mifefile wele ata nda zləm gà mbaŋa.»
Festus a gwaɗar aaka:
«Taŋa ka,
ki ti tsereke a mifefile ŋgar ndidwe.»
23 Ndidwe ŋana ka,
gà Əbay Agaripa nda Bernike damər ŋgar ata tə daha,
dìgwìɗìhha ku weke nda gà mburma ŋgar.
Gà Əbay gà sliwdze,
dite nda gà mburma ana gà bàba ŋa ana i kwite ata ya,
tə dəɗ aka tar.
Tə daha,
ta patsa a ga ana gà Əbay tə dzawa aɗəm ba ya.
Tə daha ka,
Festus a gwaɗa a gà mburma ŋgar:
«Zelwimiŋaha a Pul,
ma dara.»
Gà mburma tə daha,
tə zalaha a Pul.
A daha.
24 I dəba ŋa ya,
Festus a gwa:
«Kər batsah Əbay Agaripa nda kurum gà mburma ana mayahaba gər ŋa i faha kinehe ya tserdze.
Araha,
wele ana gà Yahuda,
ga na i Yeruzalem nda gà na ɗa i faha ta ge ahər seriye a təv ga ya.
Tə dara à bazlam ŋa a təv ga ya hinne.
Ta wiz aà iye,
ta gwa:
“Ma ndza aà bəra asa tsidze.”
25 Ama iye ka,
Yàa le aà bakal wele aaha biy mekìɗè dər ŋgat a biye ya tsa.
Ama ŋgat nda gər ŋgar na a gwa:
“Ŋgulum batsah Əbay gà Ruma na a ti sèsiŋ a iba seriye ga ya.”
Aɗaba taŋa na i dzala,
i gwa,
i slir a ŋgat a fata ya.
26 Ama iye ka,
i sər wur bazlam ana ndzer,
i wetsehe a a batsah Əbay gà Ruma ya tsa.
Aɗaba taŋa na i zalaraha aka miɗ kurumaha tserdze ya.
I zalaraha ndeyndey ka,
aka miɗ yak batsah Əbay Agaripa.
Ka wiz ihər bazlam ŋa ya te.
Na kàa wiz ihər a ka,
bəla i sle aà meŋgete a wur bazlam i huɗ bazlam ŋgar ana a tsikik a ya zaakwa,
na dite i wetsehe a batsah Əbay kwa ata ya.
27 Aɗaba i dzala ka,
lele tsidze na ki zle a mburma a daŋgay kataya,
ki slir a ŋgat a təv batsah Əbay a Ruma,
dite ki wetser a wakita a ahər ka,
ka ze mesire bakal ŋgar ana a geye ya.»