Bakal ana gà Yahuda ta vəl a Pul a
24
1 I dəba ŋa ya,
a ge mehinne ə̀zləm ka,
gà *batsah mala mandəva kuɗa a Mbulum ata,
zləm ŋgar Ananiyas,
nda gà asiŋ gà bàba ŋa ana ta kwere a gà Yahuda ya,
dite nda gà wele ana a tsik a bazlam parak parak lele ya,
zləm ŋgar Tartulus a mbaŋa,
tə daha a kwite Kaysariya.
Tə da a təv Əbay Filikus,
aà mege seriye Pul kuɗa.
2 Əbay ata a zalaha a Pul.
Aləka Pul a daha ka,
tə dza ba aà mege seriye ŋa.
Tartulus a mà à bakal a Pul.
A gwaɗaha a Əbay ata:
«Batsah mə̀r ŋa,
kinehe mìi ndze a zay lele ka,
agəra kər,
agəra mekwere yak ana kər ihər ki kwere a nda metsehe lele ya.
Aɗaba gà dukw ana gà ŋgwal ŋa tsiye fit dze ka,
kàa làmbaɗa dər.
3 Mì gəs kər nda maŋgayaba,
ku mege i ŋga na ika ahəɗ yak a.
Aɗaba ku mege dukula mì ŋgat ka,
aɗaba kər.
Mì gik kəkaaha hinne.
4 Ama a sèsiŋ na i gese a à kər a masakəŋa ya tsa.
Aɗaba taŋa kamkam,
dza zləm a dukw ana mìi tsikik a ya nda ŋgwal yak ana ki ge a ya te.
5 Mì sər aà wele aaha ka,
ŋgat mala manəsa à kə̀sà ndzer.
A wise a bazlam i liwiŋ gà Yahuda ana ika gər ahəɗ tserdze ya.
Ŋgat tekeɗe,
Əbay i fəla pàrsa gà mburma ana mì zal a tar gà Nazaret a asa.
6 Ama aka yaha vatwa aà manəsa a mə̀r à ga Mbulum mə̀r batsah ŋana mbaŋa asa,
dite aɗaba taŋa na mì gəs ŋgat a.
Mì gwa,
zləmana mìi ge a seriye ŋgar ka,
ndaka vatwa məpala ahəm mə̀r.
7 Ama Lisiyas ana Əbay gà sliwdze ya,
a da aakaha a magər mə̀r,
a kə̀zala à mə̀r a nda ndzəɗa.
8 I dəba ŋa ya,
a gwaɗa a mə̀r,
dum,
ta gwim seriye ŋgar a təv yak,
dite na araha,
mì da dərra ya.
Na ka wiz aà wele ŋa kinehe ka,
kər nda gər yak ki sir a dukw ana mì ge dər ahər seriye ya.»
9 Gà asiŋ gà Yahuda ana i fata ya,
ta gaw akaba ahər ahəm,
ta gwaɗar:
«Kataya,
kataya kaɗəŋ ndzer,
pàrsa iɗəm tsa.»
Pul a fàfəl ikaba ika miɗ Filikus a
10 I dəba bazlam tar ata ya ka,
Əbay ata a vəl vatwa a Pul,
aà mifefile mbaŋa.
A ger wiyèw nda ahər,
a gwaɗar:
«fafəl.»
Pul a gwaɗar aaka:
«I sər ka,
kər na mala mege seriye ana i faha,
kàa ndza iɗəm hinne ya.
Aɗaba taŋa,
iye riŋ nda maŋgayaba,
aɗaba ana Yàa ŋgat vatwa aà mege seriye ba gà ika miɗ yak a.
11 Kər ki sle a mewize aà mburma,
ti tsikik a mendze gà.
Aka ge kinehe ka,
à zè a mehinne kurwa gəra sula tsa na i da a Yeruzalem,
aà mandza gurmits a bəɗ a Mbulum a.
12 A gər ana i daha a fata ya ka,
maa mbetseba ahəm nda gà Yahuda i ga Mbulum batsah ŋa ata ilik tsidze.
Ku mege i gà ga ana ti yahawaba aɗəm gər pampam a,
kige tsa i huɗ kwite i kə̀sà ata tekeɗe ya,
maa wise aba duwa ilik ɓav tsa asa.
13 Kinehe gà mburma aaha ta gwa,
waytsa a ge naha,
kige tsa a ge naaka,
ə̀ndap ə̀ndap ə̀ndap ə̀ndap,
kwets ndzer ŋa a riŋ tsa.
Ti sle aà metsìkè a dukw ana ndzer ŋa,
ta gəs dərra iye a təv yak a tsa.
14 Ama kəla ka,
ndzer ŋa na i ge a meslire Mbulum gà tsir mə̀r ka,
nda mazazama vatwa Yesuw ana ta gwa,
fəla pàrsa ya.
Tsaatsa,
iye tekeɗe,
Yàa gəs dukw ana mewetse ŋa i wakita məpala ahəm Musa nda biy gà ɓəzla məma à guma Mbulum a fit dze.
15 Aɗaba i sər ndzer,
kamala tar ana tə sər a mbaŋa,
Mbulum a mbilere a à gà ɓəzla bakal nda gà na gà ŋgwal ŋa ya tserdze i məməta ya.
16 Aɗaba taŋa na iye riŋ kəla pat,
a sèsiŋ mendze ika miɗ Mbulum nda gəzləŋ ŋgwal ŋa lele,
dite nda gà ika miɗ gà mburma ya.
17 Yàa ndza i slele mive diŋ,
Yàa da a Yeruzalem tsa.
Ama kinehe ka,
i mbəɗ gər a fata.
I daha à siŋgwe a gà mburma gà ana i fata ya,
dite i waya məvəla dukw taf ŋana a Mbulum asa mbaŋa.
18-19 Aləka i təv ana i ndəv à matawala fəla mə̀r ata nda məvəla dukw masakəŋana a Mbulum a ka,
gà asiŋ gà Yahuda ana tə dara ika ahəɗ Asiya ya,
ti leha aà iye a fata.
Ti leha aà iye tekeɗe ka,
kwets mayahaba gər gà mburma a riŋ hinne tsa,
maàga ibam,
a riŋ tsa asa.
Ta gewa seriye ka,
ŋgulum tar ana ti dere a,
ta ge a aà iye seriye a təv yak a,
na tàa leha aà bakal gà ya.
20 Kige tsa kinehe ka,
wiz aà gà mburma aaha ta gəsara iye ya,
ti tsikik a bakal ana ta gəs dər iye aka miɗ mayahaba gər gà mburma ata ndavana aaka ya.
21 Bəla tsiw,
ta gis iye ka,
agəra ana i tsik a tar dukw ilik nda magala ika miɗ tar,
i gwaɗa a tar ka:
“Kə̀ gə̀sumara iye a seriye aka miɗ kurum a mbakum ka,
aɗaba ana i sər ndzer,
gà məməta ta mbilere a i məməta ya mba ya.”»
22 Ama Filikus ka,
a sər dukw ana nda təv megemir Yesuw Kiristi ya lele.
A sìrìk à seriye ŋa aka miɗ,
a gwaɗa a gà mburma ana ta ge seriye aà Pul a:
«I təv ana Lisiyas,
Əbay gà sliwdze aka dara ka,
dite i ses a ikaba bazlam ŋa ya kuɗa.»
23 A gwaɗa a batsah gà sliwdze:
«Da à Pul a ga daŋgay,
kə kasla ŋgat i fata.
Ama ki ger məɗək hinne tsa kəla.
Ka ta pala ahəm a gà masla ŋgar ana ti dere a,
ta fir aaka a ya tsa.»
Pul ika miɗ gà Filikus nda məkəs ŋgar Durusil
24 Aləka i dəba mehinne zaakwa ya ka,
gà Filikus tə daha nda məkəs ŋgar Durusil ana dəm gà Yahuda ya.
Tə slər mburma aka Pul,
aɗaba ta waya mesikehe à matsaraka dukw ana ŋgat a tsikewa nda təv Yesuw Kiristi,
meme na magəsa ŋa nda gəzləŋ a.
25 Aləka Pul a daha ka,
a dza ba aà mifefile a tar.
A ɗif a tar à duwa pampam hinne.
Ti ta metsereke dukw ana ta ge a nda ndzer a,
nda magəsa gəzləŋ,
dite nda seriye ana a dere a ika miɗ mba ya ka,
Filikus a ge magəɗa hinne,
a gwaɗa a Pul:
«Yaw,
taŋa ka,
ki sle a aà medeba na kinehe ya.
Aka təv ana Yàa ŋgat vatwa ka,
i mèkehe a à mezele asa.»
26 Aka biy ŋgar ka,
Pul à dziŋ a siŋgwe mba.
Aɗaba taŋa a zalawaraha aà mifefile nda ŋgat.
27 Kərga taŋa ya,
tàa ndza mive sula hiywe kataya.
Aləka i dəba ŋa ya,
tə zla iɗəm Filikus i fata ya,
ti tike aɗəm Purukiyus Festus,
a mbəɗ ba aà makwàrà mburma i fata.
I təv ana Filikus a dara iɗəm a ka,
a miyak à Pul i daŋgay i fata.
A sasar məpəla dər tsəka,
dite gà Yahuda ta waya ŋgat hinne.