23
1 Pul a dza are aà mayahaba gər mburma ata ndzazlzla lele.
A gwaɗa a tar:
«A kurum gà damər gà,
iye mandza ŋa ika miɗ Mbulum ka,
nda gəzləŋ ilik lele,
à gər ana i gəs ŋgat,
haa kinehe ya.»
2 *Batsah mala mandəva kuɗa a Mbulum Ananiyas,
a tsaraka bazlam Pul ata kataya tsara ka,
a gwaɗa a gà mburma ata mehìtsè ŋa i fata ya:
«Lakayumar aka bazlam.»
3 Pul a gwaɗar:
«Mbulum a lekik a mbaŋa,
a kər aaha gəzləŋ yak sula ya.
Ka ndza a faha aà mege seriye ga ka,
kamala ana məpala ahəm Mbulum a tsik a.
Ama kər kə̀ gwaɗa a mburma ka,
lakayumar dze ana,
kà tsik taŋa ana,
dukw ana məpala ahəm Mbulum a tsik a ya?»
4 Gà mburma ana a riŋ bise i fata ya,
ta gwaɗa a Pul:
«Ki ndeveye a a batsah mala mandəva kuɗa a Mbulum dze ana,
meme?»
5 *Pul a gwaɗa a tar:
«Yàa sər dər ka,
ŋgat mala mandəva kuɗa a Mbulum tsa te,
gà damər gà.
Ama i sər,
a riŋ mewetse ŋa i wakita Mbulum,
a gweɗe a mbaŋa ka:
“Ka ti tsik manəsa bazlam aà Əbay ana i gwala yak a tsidze.”»
6 Ama Pul a samata ka,
gà mburma ata mayahaba gər ŋa ya,
tàa tə̀rə̀ts ba ikaba ya.
Gà *Saduki pam,
gà *Farisa tekeɗe,
pam.
Aɗaba taŋa,
a fàfəl nda ndzəɗa,
a gwaɗa a tar:
«Gà damər gà,
iye ka,
gà Farisa,
gwala gà tekeɗe ka,
gà Farisa ndzer.
Ta giŋ a seriye kinehe ka,
aɗaba ana i gwa ka,
gà məməta ti sle aà məmbə̀lara i məməta ya asa ya.»
7 A tsik aba bazlam ata ya ka,
gà Farisa nda gà Saduki tə ndzək ba iba ya təv sula.
Tə dza ba aà mimbètsèba ahəm ika magər tar hinne.
8 Aɗaba ana gà Saduki ta màr aba à taŋa hiywe,
ta gwaɗawa ka:
Gà məməta ti sle aà mimbile asa tsa,
gà gawla Mbulum nda gà Mezite Mesife tekeɗe ka,
tar riŋ tsa.
Ama gà Farisa tekeɗe ibam,
ta gwaɗawa i tar ka:
Gà dukw ata tserdze ya ka,
tar riŋ.
9 I dəba ŋa ya,
gà mburma ata tə səkah à Mewideye duwa huwwa hinne asa.
Tsam ka,
gà asiŋ gà ɓəzla medzeŋge məpala ahəm Musa ana i liwiŋ gà Farisa ya,
hə̀rgə̀gə̀z ta hitse aà mbulum,
ta pala ahəm hinne.
Ta gwa:
«Mì sər dukw ana ŋgwal ŋa tsa,
wele aaha a ge ya tsidze.
Biy tsa Mezite Mesife,
kige tsa gawla Mbulum ilik na a fàfəlar a bìleme.»
10 Tə səkah à mimbètsèba ahəm huwwa ika magər tar hinne asa,
haa Əbay gà sliwdze ata a ge magəɗa.
A gwa:
Bìleme ta kiɗ a Pul.
A gwaɗa a gà mburma ŋgar:
«Dumara,
gə̀sumara iɗəm Pul a,
kà mùm à ŋgat a ga ata kà ndzawakwa iɗəm a.»
11 Aləka həvəɗ a ge ka,
BATSAH kwa ŋa a hitse a tsaka Pul.
A gwaɗar:
«Arəv ma da à kər a tsa,
mə̀r aba,
kàa ge sida ga i faha i Yeruzalem ka,
ndzer lele.
Ama a sèsiŋ ka,
ki ta ge a i kwite Ruma kataya mbaŋa asa.»
Tə dza akaba bazlam aà Pul
12 Ndidwe ŋana i mèkwède ka,
gà asiŋ gà Yahuda tə dza akaba bazlam,
ta mbaɗa,
ta gwa:
Maa kəɗ Pul tsəka,
mìi zim a ɗaf tsa,
mìi se a yam tsa.
13 Gà mburma ana tə dza ba aà Pul a ka,
tì zè a dzik faɗ.
14 Tə da a təv gà Əbay gà ɓəzla mandəva kuɗa a Mbulum nda gà bàba ŋa ana ta kwere a gà Yahuda ya.
Tə daha,
ta gwaɗa a tar:
«Mər ka,
maa mbàɗa,
mì gwa ka,
mìi zim a duwa tsidze,
na maa kəɗ Pul tsiye.
15 Aɗaba taŋa kurum nda gà asiŋ gà bàba ŋa ana ta kwere a kwa ya tserdze,
dumaha,
gwaɗum a Əbay gà sliwdze ka,
ma zla a kurumara Pul a faha ya,
gwaɗumar ka:
“Mìi dze a zləm a bazlam ŋgar ana a tsik a ya asa dzekwiŋ.”
Ama mə̀r ka,
mìi dze a ba aà vatwa,
mìi kiɗ a ŋgat,
na i təv ana ti dere a a faha ya.»
16 Ama damər Pul a riŋ dəm ŋa.
Dəm ata ka,
kəla ŋgar a riŋ asləka ŋa.
Kəla ata aka tsaraka bazlam makə̀ɗà Pul ata ta kiɗ a ya,
a da a ga ata gà sliwdze tə ndzawa iɗəm a.
A daha,
a be à ɗaf a Pul.
17 Pul a tsaraka kataya tsara ka,
a zal a batsah sliwdze ilik.
A gwaɗar:
«Laka kəla aaha a təv Əbay kurum kwaŋ,
aɗaba a sasar a ta fefilekiŋa.»
18 Batsah sliwdze ata a laka ŋgat a təv Əbay tar ata.
A da dərraha ka,
sliwdze aaha a gwaɗa a Əbay tar aaha:
«Pul ata i daŋgay a,
na a slərra iye ya.
A zeliŋ,
a gweɗiŋ,
lakara kəla aaha a təv yak a,
aɗaba a sasar à fèfilekiŋa.»
19 Əbay gà sliwdze ata a gəs kəla ata kətsah a zlawak à gər tar.
A daha,
a gwaɗar:
«Ki gweɗiŋ ana,
meme?»
20 Kəla aaha a gwaɗar:
«I gwaɗak ka,
gà Yahuda tàa tsik akaba bazlam,
aà mewize aà kər Pul ndidwe,
dite ka hitse a tar dər aka miɗ mayahaba gər tar asa,
waytsa mìi tsereke a bazlam Pul kalkal ŋa na lele ya.
21 Ama ka,
kà ta gəs mifefile tar ata tsidze,
aɗaba gà asiŋ gà misle ŋgiɗ tì zè a dzik faɗ ka,
tì dze a ba aà vatwa aà makə̀ɗà Pul.
Tàa mbər mimbeɗe,
ta gwa:
Maa kəɗ Pul tsəka,
mìi zim a ɗaf tsidze,
ku mege yam tekeɗe,
mìi se a tsa ana,
meme?
Ta bebe a ka,
mifefile yak pəra na a zeha ya.»
22 Əbay gà sliwdze ata a gwaɗa a kəla ata:
«Ka ti tsik bazlam aaha kà tsikiŋ a,
a wura ilik asa tsidze.»
I dəba ŋa ya,
a gwaɗar:
«Daba kuɗa.»
Tə da à Pul a bəra Əbay Filikus
23 I dəba ŋa ya,
Əbay gà sliwdze ata a zal a gà bàba gà sliwdze sula tsara.
A gwaɗa a tar:
«Yahum gər a gà sliwdze dərməka sula,
gà mburma ana nda gà piris a,
dzik təsəla,
dite gà mburma ana nda gà suwal a,
dərməka sula mbaŋa,
dite kà màhum ba kurum ata tserdze ya,
nda ndzemde tswiɗ ŋa ndaavəɗ aaha kinehe ya.
Ka dum à Pul a kwite Kaysariya,
a bəra Əbay Filikus.
24 Yahum gà piris,
ti ndze a à ŋgat a bəra Əbay ata nda zay lele,
duwa a ger a ika vatwa tsiye.»
25 Dite Əbay gà sliwdze ata a daha,
a wetse a tar wakita a ahər.
I huɗ wakita ŋgar ata a wetse ya ka,
a gwa:
26 «Iye Kəlawdiyus Lisiyas,
i geha wusa a batsah Əbay Filikus.
27 I wetsekaha wakita aaha ka,
i gwaɗak,
wele aaha i sləraha ya ka,
gà Yahuda.
Tàa gəs ŋgat,
ta waya mekìɗe.
I dəba ŋa ya,
i tsaraka,
ŋgat tekeɗe,
gà gwala gà Ruma ka,
i ndzək gà sliwdze ga,
ta be à ŋgat i ahər tar a.
28 I dəba ŋa ya asa,
i zla ŋgat aka miɗ mayahaba gər gà Yahuda,
aɗaba a sèsiŋ mesire dər ka,
aàmala na ta waya makə̀ɗà ŋgat dze ya.
29 Aləka i samata ka,
aka ge duwa biy makə̀ɗà ŋgat nda metìkè ŋgat a daŋgay tsa asa.
Ta màr à bakal ka,
nda təv gà dukw ana ndaka vatwa məpala ahəm tar a pəra.
30 Aləka i tsaraka,
gà asiŋ gà Yahuda a riŋ ta waya makə̀ɗà ŋgat aà vatwa,
dite na i slərakaha tsara ya.
I gwaɗa a gà na ta màr à bakal a ka,
ki gwim a seriye ŋgar ka,
a təv yak.
Taŋa ka,
bazlam gà aka ndəv.»
31 I dəba ŋa ya,
gà sliwdze ata ta ge dər kamala ana ti tsik a tar a.
Tə zla Pul ndaavəɗ ata tsara,
tə da à ŋgat a kwite Antipatiris.
32 Aləka ndidwe ŋana ka,
gà sliwdze ata tə da nda sik a,
ta mbəɗara gər a təv mendze tar aaha tə ndzawa iɗəm a.
Ta miyak à gà na tə da nda piris a.
Tə da aka miɗ nda gà Pul.
33 Aləka ti ndze a kwite Kaysariya tsara ka,
tə daha,
ta vəl wakita ata a Əbay Filikus ata kuɗa,
dite ta vəlar Pul a ahər mbaŋa.
34 Əbay Filikus ata a dzeŋge wakita aaha ka,
a gwaɗa a Pul:
«Ka ndzawa ana,
ika ahəɗ awara?»
Pul a gwaɗar:
«Iye ka,
gà Kilikiya.»
35 Əbay ata a tsaraka kataya ka,
a gwaɗar:
«I ge a seriye yak ka,
say gà na ta gəsara kər a,
ti dere a dzekwiŋ.»
I dəba ŋa ya,
a gwaɗa a gà sliwdze ŋgar:
«Dum à Pul a bəra Əbay *Hiridus,
ta kaslum ŋgat a fata.»
Tə tsaraka kataya ka,
Pul a hitse aà mbulum,
tə da à ŋgat a fata.