Ga Ɓəzla Meslire 22

1 «Gà damər gà nda gà tsir gà, tsarakum dukw ana i tsik a kurum aàba ika ba gà ya dzekwiŋ.» 2 Ama gà mburma ata tə tsaraka bazlam Pul ata à fèfil a ter a ndaka ahəm tar a ka, tə dzar zləm lele asa. Dite i dəba ŋa ya, Pul a gwaɗa a tar:

3 «Iye ka, gà Yahuda. Ta wa iye ka, i kwite Tarsus ika ahəɗ Kilikiya. Ama i gəl ba ka, i faha i Yeruzalem. Ama mala medzeŋge məpala ahəm Mbulum Gamaliyel na a ɗifiŋ à məpala ahəm Mbulum gà tsir kwa nda ndzer ŋa lele ya. Akahər ata ka, Yàa zazam fəla gà tsir kwa tikwitstse kamala kurum ana ki zezemwim a kinehe ya mbaŋa. 4 Yàa sèwèr are a gà ɓəzla mazazama Yesuw ka, hinne. Yàa gasa gà asləka, nda gà məkəs, Yàa dza tar a daŋgay. Tàa à mimete tekeɗe, Yàa miyak à tar tsidze. 5 Gà Əbay gà ɓəzla mandəva kuɗa a Mbulum nda gà bàba ŋa ana ta kwere a gà gwala kwa ya tserdze, ti sle a aà mesire ka, dukw ana iye ihər i tsik a ya ka, ndzer kaɗəŋ. Akahər ata ka, Yàa wizeye wakita aà gà bàba ŋa ata ya, dite na ta viliŋ, i de a dər a təv gà bàba gà Yahuda ana i Damas a. Aɗaba na Yàa da ka, wakita ata a ne a sida gà, aà magə̀sara gà ɓəzla mazazama Yesuw ana i fata ya, dite ka, aà medzewera tar a Yeruzalem a, tì sèwèr a tar are.»

Pul a ɗama, meme na a mbəɗ à gəzləŋ ŋgar a

Ga Ɓəzla Meslire 9:1-19; 26:12-18

6 «Malahalah ŋa ka, i mah ba, i de a a kwite Damas. Aləka magər pat a ge ka, Yàa à mendze kuɗa. I pə̀r ikaba ya ka, dzaydzay duwa a pàtara i gəza mbulum a wurat, a lawara iye tits a fata. 7 I dəɗ dər a bəɗ tsara, dite i tsarakara mifefile duwa a ɗera i gəza mbulum a, a gweɗiŋara ka: “Sawul, Sawul, aàmala na ki sèwèriŋ a are kataya ya?” 8 I gwaɗar aakaha: “Kər ana, weke, Batsah ga ŋa?” A gweɗiŋ aakara: “Iye Yesuw gà Nazaret ana kər riŋ ihər ki sèwèriŋ a are hinne ya.” 9 Gà asiŋ gà mburma ana mì da akaba tserdze ya, tàa ŋgat a dzaydzay dukw ata, ama tàa tsaraka mifefile wele ata a fèfiliŋ a tsa. 10 I gwaɗar: “I ge ana, meme, Batsah ga ŋa?” BATSAH kwa ŋa ata a gweɗiŋ: “Hitse aà mbulum, dite ka da a kwite Damas. Na kàa daha ka, ti tsikik a riŋ dukw ana Mbulum a gwaɗak, ge ya.” 11 I hitse aà mbulum. I fə̀r ikaba ya ka, tùtùrkumma Yàa ge guluf, i ŋgat a vatwa asa tsa, aɗaba dzaydzay ata a dəv hinne ya ka, aka ndìŋ aka are. Gà mburma ata mì da akaba dze ya, ta gesiŋ ahər, mì tsìmìɗ aba a kwite Damas kuɗa.

12 Ama i kwite ata ka, wele duwa a riŋ, zləm ŋgar Ananiyas. Wele ata ka, a gewa magəɗa a Mbulum lele. A dzawa gurmits a bəɗ a məpala ahəm kwa gà Yahuda mbaŋa. Gà Yahuda ana i fata ya tekeɗe, ti zlibe a à ŋgat hinne asa. 13 A daha a təv ga, a gweɗiŋ: “Sawul, damər gà. Ama kinehe, are yak mà hə̀ndə̀k ba.” I fata ya tsara ka, are gà a hə̀ndə̀k ba kaɗəŋ, i ŋgat a wele ata ndzih ndzih lele. 14 A gweɗiŋ: “Mbulum gà tsir kwa aka zla kər, dite ka, ka sər dukw ana a sasar ki ge a ya, aà kə ŋgat a wele ana ilik bakal ŋgar a riŋ tsiye, dite na kinehe, kà tsarakara mifefile i bazlam ŋgar asa ya. 15 Ama kinehe ka, Mbulum aka slər kər aà metsìkè dukw ana kə̀ ŋgatar a, ndəna kà tsaraka ika miɗ mburma tserdze ya. 16 Kinehe ki bebe a əla asa ya? Hitse aà mbulum, ti tsilwiɓ à kər a yam nda maɗə̀và zləm ŋgar, dite i dəba ŋa ya, Mbulum à pìlek a à bakal yak.”»

Pul a ɗama, meme na tə slər ŋgat a təv gà mburma ana

tar gà Yahuda tsiye

17 «I dəba ŋa ya, i mbəɗ gər a Yeruzalem. A pat duwa, i təv ana iye riŋ i heme a a Mbulum a ka, sunwa a da aka iye. 18 I ŋgat a Yesuw, a gweɗiŋ: “Da i kwite Yeruzalem a tsəma tsəma, gà mburma ana i faha ya, ta gis a bazlam yak ana ki tsik a ter a aɗaba iye ya tsa.” 19 I gwaɗar aakaha: “Kaɗəŋ, Batsah ga ŋa, aɗaba tə sər ka, i dawa a gà ga mahàmà a Mbulum gà Yahuda akahər ata. I gasawara iɗəm gà mburma yak a. I gazlawa tar, dite i dzawa tar a daŋgay asa. 20 Ta kəɗ Etiyen ana mala sida yak a ka, ahəm gà iɗəm mbaŋa. A diŋ a gər. Yàa vava à gà petek gà mburma ana ta kəɗ ŋgat a.” 21 Dite i dəba ŋa ya, a gweɗiŋ asa: “Da, i slir a kər diriŋ a təv gà mburma ana tar gà Yahuda tsiye.”»

Pul ika miɗ Əbay gà sliwdze

22 Gà mburma tə dza zləm a mifefile Pul ata lele. Ama i təv ana a riŋ a tsik a ter a bazlam ata, a gwa ka, i de a a təv gà na gà Yahuda tsiye ka, a tsəɓ a tar hinne. Əndats tə tə̀rə̀tsar ikaba bazlam ata ya. Tə dza ba aà Mewideye, ta gwa: «Kə̀ɗakwa wele aaha fit a biye daw. Ŋgulum mə̀ mət iɗəm a, tsəka, ma ndza à bəra tsa.» 23 Ta wideye hinne, tə lakaya dər a ahəɗ nda petek bum bùm bum bum, argwadwa tutukwtukkwa aà gəza mbulum. 24 Əbay gà sliwdze gà Ruma ata a gwaɗa a gà mburma ŋgar: «Dum dər a ga ana kà ndzawakwa iɗəm a. Na kàa dum dərraha ka, kə̀ gə̀zlum ŋgat nda megwiymbiɗ, dite ma tsik a kwa dukw ana gà Yahuda aaha ta wideye dər aaka hinne ya.» 25 Gà mburma ata tə da dər a ga ata, tə daha, tə dzaw ŋgat. Aha ŋana ti leker a ya ka, a gwaɗa a batsah sliwdze ana i fata ya: «Wànà ki slwim a aà magə̀zlà wele ana gà Ruma ya mbaŋa ya, dite ka, na seriye aka gəs ŋgat tsiye dər akaba ya?» 26 Batsah sliwdze ata a tsaraka bazlam Pul ata tsara ka, a da a təv Əbay tar. A daha, a gwaɗar: «Ki ge a dze ana, meme, wele aaha ka, gà Ruma ya?» 27 Əbay sliwdze ata a tsaraka kataya ka, a daha a təv Pul, a wiz ahər, a gwaɗar: «Tsikiŋ kwaŋ, wànà kər ana, gà Ruma ndzer a?» Pul a gwaɗar aaka: «Haya.» 28 Əbay gà sliwdze ata a gwaɗar: «Yàa dza siŋgwe hinne, dite na i ne gà Ruma ana ndzer a.» Pul a gwaɗar: «Ama iye ka, gà Ruma à gər mewe gà ya, dukw ŋgar.» 29 Gà mburma ana ndeɗiŋa ta gìzl a ŋgat, ta gwa, mə̀ fàfəl ndzer ŋa zləmana ya, ti lèlekw i təv ŋgar a, ta miyak à ŋgat tsara. Əbay gà sliwdze ata tekeɗe, a ge magəɗa hinne, aɗaba ana a tsaraka Pul ka, gà Ruma ya, dite ka, aka mbər medzewe ŋgat nda tsitsirɓe ndeɗiŋa asa ya.

Pul ika miɗ seriye

30 A sàs a Əbay gà sliwdze ata mesire ndzer ŋana, aàla na gà Yahuda ta vəl bakal a Pul dze ya? Aɗaba taŋa na, ndidwe ŋa a pə̀lara tsitsirɓe ana i ahər Pul a, dite a zal a gà Əbay gà ɓəzla mandəva kuɗa a Mbulum nda gà bàba ŋa ana ta kwere a gà Yahuda ya tserdze, ti yahaba gər. Dite i dəba ŋa ya ka, a hitse à Pul aka miɗ tar.