Ta kəɗ Zakup, dite ta gəs Piyer a daŋgay asa
12
1 Akahər ata ka,
Əbay *Hiridus a dza ba aà mesewere are a gà asiŋ gà mburma Mbulum.
2 A kəɗ Zakup,
damər Yuhana.
A sàs ikəka gər nda masalama ya.
3 I dəba ŋa ya,
a fə̀r mekìɗe ata a kəɗ Zakup ya,
a tsahən aà gà Yahuda ka,
a daha,
a gəs Piyer asa mbaŋa.
A gəs ŋgat ka,
i huɗ mehinne *megirive Paska ana gà Yahuda ta gìrìv a ya.
4 Megìse ata a gəs ŋgat a tsara ka,
a tike ŋgat a daŋgay.
I dəba ŋa ya,
a daha,
a dzaya iba gà sliwdze ya faɗ faɗ haa a da faɗ,
ta vəlawa ba ahər ŋa,
aà makaslà ŋa.
Hiridus a sasar ka,
i təv ana megirive Paska ata aka ndəv a ka,
a ger a seriye aka miɗ mburma tserdze.
Ta ŋgeteriŋa.
5 I fata ya tsara ka,
gà mburma ata ibam,
ta kaslawa Piyer kuɗa.
Ama ka,
gà mburma Mbulum ta hamawa a Mbulum tserdze kəla pat nda gəzləŋ ilik agəra Piyer.
Piyer a bera i daŋgay a
6 Aləka həvəɗ a ge,
dite ndidwe ŋa ana *Hiridus a zle a Piyer,
a ger a seriye aka miɗ mburma ya ka,
gà sliwdze sula tə daha,
ti tike ŋgat aka magər tar lele.
Tə dzaw ŋgat nda tsitsirɓe sula.
Ama ŋgat ka,
a riŋ ika mendze are i liwiŋ gà mburma ata,
dite gà ɓəzla makaslà ŋgat ŋgiɗ a riŋ ika biye hərmaga daŋgay ata asa.
7 I dəba ŋa ya,
zàmma tsəka,
gawla Mbulum Batsah kwa ŋana a slalaha a fata,
dite təv luvuŋ ata a dəv dzaydzay parakka lele.
Gawla Mbulum ata a daha,
a gəs Piyer ika dzàdzah a,
a dàŋgwazla dər.
A piɗeke.
A gwaɗar:
«Hitse tsəma.»
A tsikar kataya tsara ka,
gà tsitsirɓe ata ta palayarra i ahər a,
sùndàl,
tə dza a bəɗ.
8 I dəba ŋa ya,
gawla Mbulum ata a gwaɗar asa:
«Mah ba yak,
da dza tsapà yak aka sik.»
Piyer a ge dər kataya ka,
gawla Mbulum ata a gwaɗar asa mbaŋa:
«Tike akaba tùmbùlum yak,
dite ka zazam iye.»
9 Aləka tə zazamara ba nda Piyer i ga daŋgay ata ya.
Ama Piyer aka dzala aka dukw ata gawla Mbulum a ger a ka,
ndzer tsa.
A gwa i gər ŋgar ka,
sunwa na a giŋ a pəra.
10 Tə tàwuɗara i təv gà ɓəzla makaslà ŋgat malahalah ŋana ya,
dite i təv masula ŋana ya asa.
Aləka ti ndze a təv biye ahəm ga ana a mbera a bəra,
mahə̀ndə̀kà ŋa iɗəm nda ndzemde ya.
Biye ahəm ga ata ka,
a hə̀ndə̀k iɗəm ba ya nda ahər ŋgar ŋa,
tə dara iɗəm a bəra ya kuɗa.
Tar à mede,
tar à mede,
ti ndze aà vatwa ka,
gawla Mbulum ata a miyak à Piyer a fata,
a da ihər a.
11 Aləka i dəba ŋa ya,
Piyer aka sər dukw ana a ɗamar duwa ya kuɗa.
A gwa:
«Kinehe ka,
ndzer kaɗəŋ,
pàrsa iɗəm tsa,
Mbulum BATSAH kwa ŋa na aka slərra gawla ŋgar a təv ga ya.
Gawla ŋgar ata a mbəlara à iye i ahər Əbay Hiridus a,
dite aka zlara iye i dukw ana ŋgwal ŋa tsa,
zləmana a sàs a gà Yahuda ta giŋ a ya.»
12 A ta mesire aàba lele kamala taŋa ya,
pàrsa iɗəm tsa kuɗa ka,
a gəs vatwa i fata ya tsara,
a da a bəra Mariya,
məmər Yuhana ana tə zalar Markus a.
A daha ka,
gà mburma a riŋ hinne mayahaba gər ŋa i fata,
ta heme a a Mbulum i bəra məkəs ata.
13 Piyer a daha,
a lak a biye hərmaga.
Ama daala duwa a riŋ a ge a megemir i ga i fata,
zləm ŋgar Ruda.
A daha,
a waya mahə̀ndə̀kar i ga ya zləmana.
A gwaɗarra a bəra ya:
«Kər weke?»
Piyer a gwaɗar aakaha:
«Iye.»
14 A tsaraka mifefile Piyer ata tsara ka,
a sər biye ɗa ŋgar,
a mbəɗ gər ndàra a huɗ ga.
A gəs mehìndìker i ga ya tsa ivaɗ,
agəra maŋgayaba ana a ŋgeye a ba ya.
A daha,
a gwaɗa a gà mburma ata i ga ya:
«Piyer i bəra.»
15 Gà mburma ata tə tsaraka bazlam ŋgar ata kataya ka,
ta gwaɗar:
«Ki be a a dala,
kəla yà?»
Ama a gwaɗa a taraha asa:
«Piyer i bəra kaɗəŋ ndzer,
pàrsa tsa.»
Ta gwaɗar aakaha asa:
«A ge a ka,
gawla Mbulum ana a kesle a ŋgat a.»
16 Ama Piyer ka,
ŋgat riŋ hiywe aà malàkàyà a biye hərmaga ata pəra.
Aləka tə daha,
ta hə̀ndə̀k i ga ata ya tsara ka,
ta ŋgat a Piyer kaɗəŋ.
Ama ka,
a ge a tar ata tserdze ya kamala sunwa ya.
17 A ge a tar à ahər kə̀t kə̀t kə̀t,
kamala megweɗe ya ka,
kà fàfəlum tsa.
Dite a dza ba aà maɗàmà a tar meme na Mbulum BATSAH kwa ŋa na a zlara ŋgat i ga daŋgay a.
A gwaɗa a tar i huɗ bazlam ŋgar ata ya:
«Ɗifwim dərraha a gà Zakup nda gà asiŋ gà damər kwa ana ika vatwa Mbulum a tserdze.»
I dəba ŋa ya,
a dara i ga ata i Yeruzalem a,
a da ba a təv ŋa.
18 Aləka mbulum a dəv ndidwe i mèkwède ka,
maàga aka hitse ika magər gà sliwdze gà ɓəzla makaslà ŋgat aaha ndeɗiŋa ya hinne.
Ta gwaɗaba ika magər tar:
«Naha,
Piyer ana,
a ne ana,
dukùla dziye?»
Tə sər dukw ana ta ge a ya tsa.
19 Aləka i dəba na ya,
Hiridus a slər gà mburma aà mayaha ŋa.
Ama gà mburma ata ta ŋgat ɓav tsa.
A daha,
a tsam aà gà ɓəzla makaslà ŋa.
Ama gà mburma ata ibam,
tə sər tə̀vəməŋa tsa.
I dəba ŋa ya,
a vəl vatwa aà məbatsa tar ata.
A ta megeha Hiridus tekeɗe,
a daba ika ahəɗ Yuda i fata ya,
a da a Kaysariya,
dite a ndza i fata zaakwa.
Məməta *Hiridus ana a mət a
20 I dəba ŋa ya ka,
Əbay Hiridus a ge arəv hinne aka gà mburma ana i gà Tirus nda Sidun a.
Ama gà mburma ata ka,
ta waya masəra ba nda gà ŋgat,
aɗaba tə dawa aka masəkəma dukw mezime ka,
aka ahəɗ ata.
Tə dza akaba bazlam ika magər tar,
dite tə slər mburma a təv ŋgar.
Gà mburma ata tə daha ka,
ta gəs masla aà batsah mala sik Əbay ata,
zləm ŋgar Bəlastus,
aɗaba tə sər ŋgat na ma da a təv ŋgar a ka,
dite à gis a bazlam ŋgar a.
Aləka Bəlastus a da a təv Əbay ata,
a daha,
a màr à bazlam tar ata ti tsikeraha ya.
21 Əbay tekeɗe,
a tike a tarəra məpaslà ahər ana,
dite ti dere a,
tì dze akaba a bazlam ika magər tar lele ya kuɗa.
A pat məpaslà ahər tar ata ti tike ya ka,
Hiridus a dza akaba petek Əbay ŋgar,
dàhàm a ndza dər aka təv mendze ŋgwal ŋana,
ika miɗ mburma tserdze,
a fàfəl a tar.
22 Ama gà mburma ata tserdze ya,
ta wideye,
ta gwa:
«Na à fèfil a ka,
mburma tsa,
Mbulum na à fèfil a ya.»
23 I dəba mifefile tar ata ya tsara ka,
gawla Mbulum a dara,
a lak a Hiridus,
aɗaba ana a zla mezlibe Mbulum nda mezembeɗe ŋa fit aka gər ŋgar a.
Əsam a war aba hinne,
dite a mət dər.
24 I dəba ŋa ya,
bazlam Mbulum a ɗe zləm hinne asa.
Gà na tə tsarakawa bazlam ata ya,
tə sə̀kàhawaha à gà ɓəzla magəsa Mbulum hinne.
25 Gà Barnabas nda Sawul tə ndəv à meslire tar i Yeruzalem a ka,
ta mbəɗ gər a dəba a Antakiya.
Tə zla dər Yuhana ana tə zalar Markus a,
aà ahər.