Ga Ɓəzla Meslire 11

Piyer a ɗif à dukw ana a ge ba i Yafa ya, a gà mburma

Mbulum ana i Yeruzalem a

1 Gà ɓəzla meslire Mbulum nda gà asiŋ gà ɓəzla magəsa Mbulum ana ti ne gà damər tar i Yuda ya, tə tsaraka kataya ka, ku mege gà mburma ana tar gà Yahuda tsiye tekeɗe, ta gəs bazlam Mbulum mbaŋa. 2 Aləka Piyer a mbəɗ gər a Yeruzalem ka, gà ɓəzla magəsa Yesuw ana nda gəzləŋ gà gwala gà Yahuda ya, ta palar ahəm. 3 Ta gwaɗar: «Wànà kà da a bəra gà mburma ana masasa ŋa tsiye ana, dukùla na a slek za ya? Dite asa ka, kà zəmawum akaba ɗaf nda gà tar dze ana, meme?» 4 Piyer a tsaraka bazlam tar ata kataya ka, a dza ba aà maɗàmà a tar dukw ana a ge ba nda ŋgat a tserdze ya fit. A gwaɗa a tar:

5 «Malahalah ŋa ka, a pat duwa, iye riŋ ihər i heme a aà Mbulum i kwite Yafa. I huɗ meheme gà ata ya ka, sunwa a da aka iye. Ama ka, iye riŋ nda are. I ŋgat a dukw duwa kamala petek a, magàsà ŋa ika ahəm a ika ahəm a, duwa iɗəm tùndùluŋŋa i magər ŋa, a tarəra i gəza mbulum a təv ga ya. 6 I fə̀raha aɗəm lele ka, Yàa ŋgataha aɗəm a gà dukw ana sik à tar faɗ a, nda gà na ta miyek a à mburma tsiye, nda gà asiŋ gà biy ŋgiɗ ana ti de a nda huɗ a, dite nda gà na gwezleviyek à tar a fit. 7 I dəba ŋa ya, i tsarakara mifefile duwa i gər ŋa a ɗera aà iye ya, a gweɗiŋ: “Araha, Piyer, kə̀ɗawa gà dukw ata, dite kà papəɗawa.” 8 Ama i gwaɗar aakaha: “Awaŋ, a sèsiŋ tsa, Batsah ga ŋa. Aɗaba dukw ana biy mezime tsəka, Yàa mə̀ndzər ilik tsidze, awisl.” 9 Ama i dəba ŋa ya, mifefile ŋgiɗ a ɗera aà iye i gər ŋa ya asa ka, a gweɗiŋara: “Ka ta fə̀r aà dukw ana Mbulum a gwa, ŋgwal ŋa ya, kamala ana awisl a tsa.” 10 A miniŋ dərra à bazlam ata ya sik makər ka, dukuməŋa a mbəɗ gər a gər ŋa, kuvəl mbulum ata a mà akaba təts asa.

11 I dəba ŋa ya, gà mburma makər tə slalaha a ga ana iye iɗəm i fata ya tsara. Gà mburma ata ka, tə slərra tar i Kaysariya ya a təv ga ya. Tar ka, gà Yahuda tsa, dite ka, aà madə̀ɗà akaba nda gà tar a tsa. 12 Ama Mezite Mesife Mbulum a gweɗiŋ: “Dùm nda gà tar tsəma, ka tə dzala duwa tsidze.” Aɗaba taŋa mì da akaba nda gà mburma ata a bəra Kwarney tserdze. Ama gà ɓəzla magəsa Mbulum, gà asiŋ ana ndilik ti ne gà damər ga i fata ya, tə zazam mə̀r mbaŋa. 13 Mì daha ka, a ɗama a mə̀r, meme na a ŋgat a gawla Mbulum ilik i ga i ma ŋgar mehìtsè ŋa ya, dite na a gwaɗar ka, slər mburma a Yafa, tə zalaha a Simun ana ti ɗer Piyer a, ma dara ya. 14 Dite a ti tsik a gà bazlam ana ki ta mbelwim a dər nda gà mburma ana i ga i ma yak fit a. 15 I dəba ŋa ya, i dza ba aà mifefile tsara. I təv ana iye riŋ i tsik a tar bazlam ata ya ka, Mezite Mesife Mbulum a tarəra aka tar a tsara, kamala ana a tarəra aka kwa malahalah ŋa ya. 16 I dəba Mezite Mesife ata i ŋgatar tsara ya ka, dukw ana BATSAH kwa ŋa a tsikewa ya, a mìŋara a gà gər a fata ya tsara, kamala ana a gwa: “Yuhana a tsilwiɓ à mburma ka, a yam, ama kurum ka, ti tsilwiɓ à kurum a ka, a Mezite Mesife Mbulum.” 17 Aɗaba taŋa nda ndzer, pàrsa iɗəm tsa, Mbulum aka vəl a tar dukw ŋgar kamala ana a vəl a kwa i təv ana kə gə̀sakwa Yesuw Kiristi nda gəzləŋ a mbaŋa. Iye dze ana, weke, na i ŋge a vatwa a Mbulum a?»

18 Gà mburma ata tə tsaraka bazlam Piyer ata kataya tsara ka, ta miyak à mimbètsè ahəm ata ndeɗiŋa ya, tə zàmbaɗa à Mbulum. Ta gwa: «Mbulum aka vəl vatwa a gà mburma ana tar gà Yahuda tsiye, aà məmbə̀ɗà à madzala gà gər tar, dite ta ŋgat ŋgwal mesife ana ndzer a kaɗəŋ mbaŋa.»

Gà mburma ana i Antakiya ya

19 Gà asiŋ gà ɓəzla magəsa Mbulum nda gəzləŋ tàa təz i Yeruzalem a. Tə təz ka, aɗaba mesewere are ana a ge a tar ba gər i dəba makə̀ɗà Etiyen ana ta kəɗ a. Gà mburma ata tə təz a ka, gà asiŋ ŋa tə da tsikw aka ahəɗ Finikiya, nda ahəɗ Kipurus, nda gà a kwite Antakiya. Ti tsikewa riŋ bazlam Mbulum i fata. Ama ka, a gà Yahuda ɗekɗek. 20 Ama a ta megeha i dəba ŋa ya, gà asiŋ gà ɓəzla magəsa Mbulum ŋgiɗ ana i gà kwite Kipurus nda Kirene ya ka, tə da a kwite Antakiya, dite ti tsikewa ŋgwal bazlam ana a ɗif à Yesuw BATSAH kwa ŋa ya, a gà mburma ana tar gà Yahuda tsiye mbaŋa. 21 Ndzəɗa BATSAH kwa ŋa a riŋ nda gà tar, dite gà mburma hinne ta gəs ŋgat nda gəzləŋ, ta mbəɗ à mendze tar ndàra a təv ŋgar.

22 Gà mburma Mbulum ana i Yeruzalem a, tə tsaraka dukw ata ka, tə slər Barnabas a Antakiya. 23 Aləka a ndzeha a fata, a ŋgat a Mbulum a pise ahəm a gà mburma ata ya ka, a ŋgaya ba hinne, a mà taraha à arəv tserdze, aà megìse tar ana ta gəs BATSAH kwa ŋa ya, ma da aka miɗ aka miɗ nda gəzləŋ ilik, ta miyak dər tsa. 24 Ama Barnabas ka, ŋgwal mburma ndzer, maràhà ŋa nda Mezite Mesife Mbulum i ba ŋgar, a gəs Mbulum lele. Aɗaba taŋa, mburma tekeɗe hinne, tə sə̀kàhəha a təv BATSAH kwa ŋa.

25 I dəba ŋa ya, Barnabas a da kwite Tarsus, aà mayaha Sawul. 26 Aləka a le ahər ka, a zlaha ŋgat a Antakiya. Tə daha, ta ge megemir sula məma mive ilik ika magər gà mburma Mbulum ata i fata ya. Ti ɗe à vatwa mazazama Mbulum ana ti zezem a ya, a gà mburma hinne. Gà ɓəzla mazazama Yesuw ana malahalah ŋa a riŋ i fata ya, tə zalawa a tar «gà Kiristi» ka, i Antakiya. I dəba ŋa ya, zləm tar a ndà aka gər ahəɗ fit, tə zalawa a tar kataya.

27 Akahər ata ka, gà ɓəzla məma à guma Mbulum duwa tə da i Yeruzalem a, tə da a Antakiya. 28 Aləka ti ndzeha a fata ka, misle ŋgiɗ ilik i liwiŋ tar a, zləm ŋgar Agabus, Mezite Mesife Mbulum i ba ŋgar, a vəlar ndzəɗa, dite a hitse aà mbulum, a gwa: «May batsah ŋa a dere a aka gər ahəɗ a bise. A ge a ika tseke ŋgiɗ pampam.» Aləka i dəba ŋa ya, may ata a ta medera kaɗəŋ ka, akahər ana ti tike aɗəm Kəlawdiyus, batsah Əbay gà Ruma ya. 29 Gà ɓəzla mazazama Yesuw ana i fata ya, tə tsaraka kataya tsara ka, tə dza akaba bazlam ika magər tar, ta gwa: «Ku weke a sle aà meslireha a duwa a gà ɓəzla mazazama Yesuw ana ti ne gà damər kwa i Yuda ya, kamala ana a sle a ya.» 30 Aləka i dəba ŋa ya, tə daha, ta gaw akaba gà dukw ata a təv ilik ŋa. Tə slər dər gà Barnabas nda Sawul. Tə daha, tə dzaya a gà bàba ŋa ana ika miɗ gà mburma Mbulum ata i fata ya.