Gà Piyer nda Kwarney
10
1 Wele duwa,
zləm ŋgar Kwarney,
i kwite Kaysariya.
Ŋgat ka,
Əbay gà sliwdze gà Ruma duwa.
Tə zal a mayahaba gər gà sliwdze ana ŋgat iɗəm a ka,
«gà sliwdze Italiya. »
2 Ama wele ata ka,
a ge magəɗa a Mbulum.
Tar nda gà mburma ana i ga i ma ŋgar a tserdze,
tə dzar gurmits a bəɗ lele.
A zlàkawa gà Yahuda ana gà matawak ŋa ya hinne,
a hamawa a Mbulum kəla pat mbaŋa.
3 A pat duwa i hawa,
dàyday nda ndzemde makər ŋa,
sunwa a da aaka.
Ama ŋgat a riŋ nda are.
A ŋgat a gawla Mbulum parakka lele.
A pə̀tsaha a ga a təv ŋgar a fata.
A daha,
a gwaɗar:
«Kwarney.»
4 Ama Kwarney a fə̀r aà gawla Mbulum ata nda gà magəɗa,
a gwaɗar:
«Kà dara ana,
labara là,
Batsah ga ŋa?»
Gawla Mbulum ata a gwaɗar:
«Mbulum aka gəs meheme yak ana kà hamawa a,
dite nda mezleke ana kà zlàkawa mburma ya asa.
Ama ka,
kàa mətsar gər tsa.
5 Kinehe ka,
slər mburma a Yafa,
tə zalaha a Simun duwa tə zalar Piyer.
6 Ŋgat a riŋ mandza ŋa i bəra wele duwa,
a làmbaɗawa à kwiye,
zləm ŋgar Simun.
Ga wele ŋa ka,
a riŋ à guva duluv ŋa a riŋ i fata.»
7 Gawla Mbulum ata a tsikar aba taŋa ya tsara ka,
a da à ŋgat a.
Aləka Kwarney a daha,
a zal a gà ɓəzla meslire ŋgar sula,
dite a sliwdze ilik i liwiŋ gà na ta ger a megemir a asa.
Ama sliwdze ata ka,
a ge magəɗa a Mbulum.
8 A daha,
a ɗama a tar dukw ana gawla Mbulum aaha a tsikar a tserdze,
dite a slər tar a Yafa.
9 Ta mah ba,
tə da.
Aləka ndidwe ŋana,
i təv ana ti de a ya,
tàa à mendze a kwite Yafa ya ka,
Piyer a tsəl aka gər ga a riŋ i fata dàbàɗàkka,
nda magər pat.
A daha,
a hama aà Mbulum.
10 Aləka may a dza ba aà mawura ahər,
a sasar mazəma dukw mezime.
I təv ana ti derra ɗaf a ka,
sunwa a da aaka i fata.
Ŋgat a riŋ nda are,
à fir a ikaba ya.
11 A ŋgataha a kuvəl mbulum,
a hə̀ndə̀k ba ikaba ya tuwaŋ,
dite a ŋgataha aɗəm a dukw duwa a riŋ a terre a iɗəm a bəɗ a.
Dukw ata a ndzikiɗ ba ka,
sla petek,
magəsa ŋa ika ahəm a ika ahəm a,
mawudaɗa ŋa dər ikaba ya,
tùndùlùŋŋa duwa iɗəm i magər ŋa.
12 Aləka dukw ata a ndzera ka,
gà dukw pampam iɗəm hinne,
kamala gà dukw dala ya,
nda gà dukw gənaw tserdze,
dite nda gà dukw ana ti de a nda huɗ a mbaŋa,
dite asa,
nda mewe gà dukw ana gwezleviyek à tar tserdze ya.
13 Piyer a tsarakara mifefile i gəza mbulum a,
a gwaɗarra:
«Araka Piyer,
kə̀ɗawa gà dukw aka,
dite kà papəɗawa.»
14 Ama gà dukw ata ka,
gà dukw ŋgiɗ iɗəm pampam hinne na a sàs a gà Yahuda tsiye.
Aɗaba taŋa,
Piyer a gwaɗar aakaha:
«Awaŋ Batsah ga ŋa,
a sèsiŋ tsa.
Yàa papəɗ gà dukw ata kamala naha ya ilik tsa,
awisl.»
15 Ama mifefile ata a ɗera aà ŋgat a asa ka,
a gwaɗarra:
«Ka ta fə̀r aà dukw ana Mbulum a gwa,
ŋgwal ŋa ya kamala ana awisl a tsa.»
16 A minerra à bazlam ata sik makər,
dite dukuməŋa a mbəɗ gər a gər ŋa,
kuvəl mbulum ata a mà akaba təts asa.
17 Piyer a gwa i gər ŋgar:
Wànà maslàla sunwa dukùla na taŋa a ɗemiŋ duwa dze ya?
Ama akahər ana ar ihər a dzele a gà gər dukw ata a ɗamar duwa ya ka,
gà mburma ana Kwarney a sləraha tar a ka,
tàa ŋgat a ga ata Simun iɗəm a kuɗa.
Tə daha,
ta hitse aka biye hərmaga ŋa.
18 Ta wizeha ŋgat aà mbəlakw a riŋ i ga i fata,
ta gwaɗar:
«Wànà Simun ana tə zalar Piyer ana,
ar ɗa ana,
i faha ya?»
19 Ama Piyer ka,
ar à madzala gà gər dukw ata a ɗamar duwa ya hiywe pəra.
I huɗ madzala gà gər ŋgar ata ya ka,
Mezite Mesife Mbulum a gwaɗar:
«Araha,
gà mburma naka makər ti yehe a kər.
20 Tar a təv tar a bəɗ,
kà dəɗ aka tar,
ka dum dze.
Magəɗa ma gik tsa,
aɗaba iye na a sləraha tar a.»
A tsikar kataya ka,
aɗaba wele ata a sləraha tar nda gà ɓəzla meslire ŋgar ata tserdze ya ka,
tar ka,
gà Yahuda tsa.
21 Piyer a tsaraka kataya tsara ka,
a taraha a təv gà mburma ata,
a gwaɗa a tar:
«Iye ka,
wele ana ki yehwim a ya,
Kà dumar ana,
meme?»
22 Ta gwaɗar aakaha:
«Na a gwaɗa a mə̀r,
dum ka,
Əbay gà sliwdze duwa,
zləm ŋgar Kwarney.
Wele ŋa ka,
ŋgwal mburma lele,
magəɗa Mbulum i ba hinne.
Dite gà Yahuda tserdze ta waya ŋgat ka,
lele mbaŋa.
Gawla Mbulum ilik na a gwaɗar,
ma zalakaha a təv ŋgar,
dite ma tsaraka dukw ana ki tsiker a ya.»
23 Ama Piyer a tsaraka kataya ka,
a da à tar a ga,
a vəl a tar təv mehinne,
ta həna i fata.
Aləka i mèkwède ŋana ka,
ta mah ba,
tə da nda gà ŋgat tserdze kuɗa.
Gà asiŋ gà ɓəzla mazazama Yesuw ana ti ne gà damər ŋgar i Yafa i fata ya,
tə dəɗ aka tar mbaŋa asa.
24 Ndidwe ŋana ka,
ti ndze a Kaysariya kuɗa.
Tə daha,
tə da a bəra Kwarney.
Ama Kwarney ka,
aka yaha riŋ aba gər a gà gwala ŋgar a,
nda gà masla ŋgar a tserdze i ga i ma ŋgar,
ta veve a riŋ ŋgat i bəɗ rim rìm rim.
25 Aləka i təv ana Piyer a ndze a ma ŋgar,
a hitse aka biye hərmaga ya ka,
Kwarney a dara a təv ŋgar i ga ya.
A dara,
a kal aba aka sik ŋgar.
A ger wusa nda mezembeɗe.
26 Ama Piyer a gəs ŋgat i ahər a,
a gwaɗar:
«Hitse aà mbulum,
iye ka,
mburma məfara ŋa kamala kər a mbaŋa.»
27 I dəba ŋa ya,
ta fèfil a dər aà vatwa ya,
ta patsa dər akaba a ga nda Kwarney.
Tə daha ka,
Piyer a ŋgat a gà mburma ata i ga ata ya hinne mayahaba gər ŋa.
28 A gwaɗa a tar:
«Kurum kà sərum ka,
fəla mə̀r aka pala ahəm aà malə̀mà akaba nda gà mburma ana gà Yahuda tsiye,
kige tsa aà məpə̀tsa a ga a ma ŋgar a.
Ama kinehe ka,
Mbulum a gweɗiŋ,
i ta fir a aà misle ŋgiɗ ilik ika miɗ gà,
kamala ana ŋgwal ŋa tsiye,
kige tsa kamala ana awisl a tsa.
29 Aɗaba taŋa kà zelwimiŋ ka,
Yàa niwera tsa,
Yàa dara bise.
Ama i dara ka,
a sèsiŋ mesire dər ka,
aàmala na kà zelwimiŋ dze ya?»
30 Kwarney a gwaɗar aakaha:
«Iye na a zalak a,
aɗaba a pat duwa kərga naha ya,
aka həna kinehe ka,
makər pəra,
iye riŋ i heme a aà Mbulum i ga i faha,
aka pat ana a lak à gər dàyday nda ndzemde makər ŋa ya.
Wele duwa nda gà petek tizlzlè ŋa a daha aka miɗ gà.
31 A gweɗiŋ:
“Kwarney,
Mbulum aka tsaraka gà meheme yak ana kà hamawa a,
dite nda mezleke yak ana kà zlàkawa gà ɓəzla matawak a asa.
Ama ka,
aka mətsar gər tsa.
32 Kinehe ka,
slər gà mburma a Yafa,
tə zalaha a Simun duwa tə zalar Piyer.
Ŋgat a riŋ mandza ŋa i bəra wele duwa a làmbaɗawa à kwiye,
zləm ŋgar Simun.
Ga wele ŋa ka,
a riŋ à guva batsah duluv ŋa a riŋ i fata.”
33 Aɗaba taŋa na i slər aka kəraha mburma tsara ya.
Ama kər tekeɗe ka,
kàa gasa aba tsa,
kàa dara tsara kaɗəŋ.
Kinehe ka,
mə̀r tserdze mayahaba gər ŋa ika miɗ Mbulum,
mìi veve a matsaraka dukw ana BATSAH kwa ŋa a gwaɗak,
ti tsik a mə̀r a,
mìi tserekiŋa.»
Bazlam Piyer ana a tsik i bəra Kwarney a
34 Piyer a gəs a tar aakaha,
a gwaɗa a tar:
«Ama kinehe ka,
Yàa sər kuɗa.
Mbulum ka,
a wala ikaba mburma ya tsa.
35 A waya mburma tserdze,
ku mege gà dukùla tekeɗe.
Ama kə̀la ka,
say na ŋgat riŋ a ge a magəɗa a Mbulum nda mege gà dukw ana ŋgat a riŋ a ge a ndaka vatwa ŋa ya.
36 Kà sərum bazlam ana Mbulum a sləraha a gà mburma Isərayel,
dite a zla a taraha bazlam ŋgwal ŋa ana a vile a ter a matasla yam a gəzləŋ zayya lele,
nda ahər Yesuw Kiristi ya,
aɗaba ana ŋgat a ne Batsah ŋa i liwiŋ gà mburma tserdze ya.
37 Kà sərum dukw ana a lah mege ba i Galile ya,
dite a zazəɗ a Yuda asa ya.
Ama gà dukw ata ta ge ba ka,
i dəba bazlam metsìlwìɓè à mburma a yam Yuhana ana a tsik a.
38 Kàa tsarakum,
meme na Mbulum a rah à Mezite Mesife nda ndzəɗa ŋgar aka gər Yesuw gà Nazaret a.
Ama ka,
Yesuw a sùwayawa ika ahəɗ gà Yahuda tserdze nda mege ŋgwal ŋa a mburma,
a mbala à gà na Əbay sitene a kwere a tar a tserdze mbaŋa,
aɗaba ka,
Mbulum a riŋ nda gà ŋgat.
39 Mər ka,
mì ne gà ɓəzla sida gà dukw ana a ge i Yeruzalem,
nda gà ika ahəɗ ata asa ya.
Ta kəɗ ŋgat aà dizl magə̀làwà ŋa.
40 Ama i huɗ mehinne makər a ka,
Mbulum a mbəl à ŋgat i məməta ya.
A vəlar vatwa aà məpàtà à ba ŋgar nda mesife ika miɗ mburma.
41 Ama ka,
a gà mburma ana tserdze ya tsa,
na a pàt a tar aba ya,
say a mə̀r gà mburma ana Mbulum a lah mipele mə̀r,
mì ne gà ɓəzla sida ŋgar akahər ata ya.
I dəba mimbile ŋgar ana a mbəlara i məməta ya ka,
mì zəmawa akaba ɗaf nda masà duwa tserdze nda gà ŋgat.
42 Ŋgat na a gwaɗa a mə̀r ka,
tsikwim bazlam ŋgwal ŋa aaha a gà mburma ya,
dite ka ɗifewim a tar dər ŋgarra lele.
Iye na Mbulum a tike iye aà mege seriye gà mburma ana tar riŋ nda are ya,
dite nda gà na tàa mata ya asa mbaŋa.
43 Gà ɓəzla məma à guma Mbulum tserdze tə ɗə̀v zləm a dukw ana a ta ge a a ba ika miɗ mba ya.
Ti tsik ahər:
“Wur ana aka gəs ŋgat nda gəzləŋ daga à kinehe ya ka,
a ŋget a məpəla à bakal nda zləm ŋgar.”»
Gà mburma ana gà Yahuda tsiye, ta ŋgat Mezite
Mesife Mbulum mbaŋa
44 Akahər ana Piyer a riŋ a tsik a ter a bazlam ata mba ya ka,
Mezite Mesife Mbulum a tarəra aka gà mburma ana riŋ ti dze a zləm a mifefile ŋgar ata tserdze ya.
45 Ama gà ɓəzla magəsa Yesuw ata nda gəzləŋ,
tar gà gwala gà Yahuda,
tə da akabara nda gà Piyer i Yafa tserdze ya ka,
tar riŋ i fata mbaŋa.
Aləka ta ŋgat a dukw ata,
Mbulum a vəl Mezite Mesife a gà mburma ana gà Yahuda tsiye ka,
a ge a tar kamala sunwa ya.
46 Tə sər Mbulum a vəl a tar Mezite Mesife ŋgar ka,
agəra ana ta fèfil a ndaka gà ahəm ana gà mburma ata tə tsaraka riŋ i fata tsiye,
dite tar riŋ ti zlibe a à Mbulum ana a za dukw tserdze ya.
Ama Piyer a gwaɗa a tar:
47 «Kinehe ana,
dukùla na a pele a ahəm a gà mburma aaha,
aà metsìlwìɓè à tar a yam dze ya,
na tàa ŋgat Mezite Mesife Mbulum kamala kwa ya mbaŋa ya?»
48 I dəba ŋa ya,
a gwaɗa a tar asa:
«Tsilwiɓwim à tar a yam nda zləm Yesuw Kiristi.»
Dite i dəba ŋa ya,
gà mburma ata ta ger kamkam,
ta gwaɗar:
«Ndza i təv mə̀r mehinne zaakwa te.»