Ga Ɓəzla Meslire 21

Pul a da a Yeruzalem

1 Aləka, ta məlak à mə̀r a fata ka, mì tsala a slə̀làh yam, mì mah ba, mì da a kwite Kwas. Ndidwe ŋa ka, mì ndze a kwite Rudus. Aləka mì mah ba i fata ya asa, mì da a kwite Patara. 2 Mì ta medeha ka, maa leha aà slə̀làh yam ŋgiɗ a fata, à dzik a mburma aka ahəɗ Finikiya. Mì ndza aɗəm, dite mì zazəɗ aba aka miɗ. 3 I təv ana mìi de a ya ka, mì ŋgataha a ahəɗ Kipurus i slə̀làh yam a, aka miɗ mə̀r. Aləka mì ndze ahəraha ka, kətsah mì mbə̀rə̀zl aka tseke ahər gula. Mìi de a aka ahəɗ Siriya. Dite mì tsìmìɗ aba a Tirus, aɗaba ti ti dze a gà dukw ana i slə̀làh yam a ka, a fata. 4 Mì ndze a fata ka, maa le aà gà ɓəzla magəsa Yesuw ana i fata ya, dite mì ndza akaba nda gà tar kwaskwa ilik. Ama gà ɓəzla magəsa Yesuw ana i fata ya, tə sər nda ndzəɗa Mezite Mesife Mbulum aka mesewere are ana a ta ge a ba gər a Pul i Yeruzalem a. Ta gwaɗar: «Ka da tsa.» 5 Mì ndəv à mendze mə̀r kwaskwa ilik ŋa ata ka, mì mah ba, mì da. Tə laka mə̀r tserdze nda gà məkəs tar, dite nda gà ɓəza tar ìzad aà kwite ya. Mì ndze aka gər dula ka, mì dzaya gurmits a bəɗ, mì hama a Mbulum. 6 Dite mì geyaba wusa ilik ilik tserdze, mì tsala a slə̀làh yam. Tar tekeɗe, ta mbəɗ gər a ma tar mbaŋa.

7 Mì da i fata ya. Slə̀làh yam a ndisl à mə̀r a kwite Patulamayis. Mì ndzeha a fata ka, mì geye wusa a gà na ti ne gà damər mə̀r i fata ya. Mì vàk i fata pat ilik nda gà tar. 8 Aləka ndidwe ŋana ka, mì mah ba nda sik i fata ya, mì da a kwite Kaysariya. Mì ndzeha a fata ka, mì da a bəra Filip ana ŋgat mala metsìkè bazlam Mbulum a, mì həna i ma ŋgar. Ŋgat ka, ar i liwiŋ gà mburma ana təsəla ta pala tar i Yeruzalem, aà mazlàkà gà ɓəzla meslire Mbulum ana akahər ata ya. 9 Ama wele ata ka, gà dəm ŋgar a riŋ faɗ, tàa da a zal zukw tsa. Gà dəm ata ka, ta màwa à bazlam Mbulum a mburma.

10 Mì ge i fata mehinne diŋ ka, mala məmà à bazlam Mbulum duwa, zləm ŋgar Agabus, a daha ika ahəɗ Yuda ya. 11 A daha a təv mə̀r. A daha ka, a zla dukw madànà ba Pul, a dzaw dər ba ŋgar i sik a, nda ahər a. A tə̀kər dər kamala na ti ta ge a à Pul a. I dəba ŋa ya, a gwaɗa a tar: «Araha, wele aaha dukw madànà ba ihər a ka, gà Yahuda ti ti dzew a ŋgat i Yeruzalem kamala naha ya, kamala ana Mezite Mesife Mbulum a tsikiŋ a. Dite i dəba ŋa ya, ta gis a, ta vile a ŋgat a ahər a gà mburma ana tə sər Mbulum tsiye.» 12 Mər ŋa nda gà mburma ana i fata ya, mì tsaraka bazlam ata tsara ka, mì hama a Pul, dite ka, ma tə da a Yeruzalem tsa te. 13 Ama a gwaɗa a mə̀r: «Aàmala na ki tiwwim a, ki dzwìm a aà iye magəɗa asa ya? Iye ka, Yàa hadzal ba ga, Yàa dzala ka, ti ti dzew a iye ana, meme tsa. Aɗaba ku mege i ta mite a a Yeruzalem agəra Yesuw BATSAH kwa ŋa tekeɗe ka, à lèh a duwa tsa.» 14 I təv ana mì fə̀r ka, kwets à gis a mifefile mə̀r ata tsiye ka, mì gəs meger kamkam asa tsa, dite mì gwaɗar: «Dukuməŋa ma ge ba, kamala ana a sàs a BATSAH kwa ŋa ya.»

15 Mì ndza i fata zaakwa ka, mì yaha gər a kàzlàŋa mə̀r. Mì mah ba, mìi de a a Yeruzalem kuɗa. 16 Mì da akaba nda gà ɓəzla mazazama Yesuw ana i kwite Kaysariya i fata ya. Mì daha ka, tə laka mə̀r a bəra wele duwa, zləm ŋgar Manasun, aà mehinne i ma ŋgar. Wele ŋa ka, a dara ika ahəɗ Kipurus a. Ŋgat ka, mala magəsa Yesuw daga piŋŋe.

Pul a da a bəra Zakup

17 I təv ana ndeɗiŋa mì ndze a Yeruzalem tsara ya ka, gà na ti ne gà damər mə̀r i fata ya, ta ŋgəzl aka mə̀r nda gà maŋgayaba. 18 Mì həna i fata. Ndidwe ŋa ka, Pul a da a bəra Zakup, mì dəɗ aaka. Gà bàba ŋa ana ika magər gà mburma Mbulum i fata ya, ti yahabaha gər a ma ŋgar tserdze. 19 Pul a geye a tar wusa, a ɗama a tar parakka, dukw ana Mbulum a ge nda təv megemir ŋgar ana ika magər gà mburma ana tar gà Yahuda tsiye. 20 Tə tsaraka bazlam ata lele ka, tə dza ba aà mazàmbàɗà à Mbulum. Aləka i dəba ŋa ya, ta gwaɗa a Pul: «Samata kwaŋ, damər mə̀r, i faha ka, gà Yahuda hinne na tàa gəs Yesuw a. Ama hiywe tar riŋ ta ge a iɗəm metsehe a məpala ahəm Musa ya. 21 Aɗaba tar tserdze ka, tə sər, kà gwaɗawa a gà asiŋ gà Yahuda ana tar mandza ŋa ika magər gà mburma ana tə sər Mbulum tsiye ka, say ta mbəɗ dəba a məpala ahəm Musa, tə tə sasa gà ɓəza tar asa tsiye, dite ta mbəɗ dəba a fəla gà Yahuda ana ta gewa ya asa mbaŋa ya. 22 Dite kinehe, mìi ge a ana, meme na kinehe ya? Aɗaba aləka ti sir aà kər a ka, kər ɗa i faha ndzer a. 23 Ŋgulum ki ge a kamala na mìi tsikik a ya. Araha, gà mburma naha faɗ, tàa mbər mimbeɗe aà mege meslire Mbulum i liwiŋ mə̀r i faha, i huɗ mendze zaakwa ya. Aɗaba tar ka, i huɗ mendze ata ya ka, tə sawa dukw ana makwàsà ŋa ya tsa. Ambəz tekeɗe, tə zàzawa tsa. 24 Araha, mimbeɗe tar ata aka à mendìve ka, ki dwim a nda gà tar a batsah ga Mbulum ata, ta bets a gà duwa a Mbulum, ki zlèk a tar nda siŋgwe kamala ana məpala ahəm Musa a tsik a, dite ki zèz a ikaba ambəz a, aà mburma tserdze tə sər dər ka, dukw ana ti tsik nda təv yak ka, pàrsa masakəŋa. Dite ta gweɗe a ka, kər tekeɗe, ki zezem a məpala ahəm Musa mbaŋa. 25 Ama a gà mburma ana tar gà Yahuda tsiye, ti ne gà ɓəzla mazazama Yesuw a ka, bazlam a riŋ asa tsa. Maa mbər mewetse a taraha wakita. Mì tsik a taraha ka, bazlam ana mì dza akaba akahər ata ya. Aɗaba mì gwa ka, tə ta papəɗ dukw ana ŋgwal ŋa tsiye tsa, kamala dukw ana ti zler ɗa aà matawala duwa ya, nda gà tə zəm məmbəz tsa, tə ta papəɗ dukw ana ta muruɗ mimwirwiɗe ya tsa, ti ta ge mezelme nda təv muva tsa asa mbaŋa.»

26 Kamala taŋa ya, Pul tekeɗe, a ge kamala ana a sàs a tar a kuɗa. Ndidwe ŋana ka, a daha, a ndzək gà mburma ata faɗ a. Tə da akaba a ga Mbulum, aà medze ba aà mege fəla tar ana ta gewa ya. Ta gwaɗa a mala mandəva kuɗa a Mbulum ata: «I huɗ mehinne təsəla ya ka, ki ndislekwe a à matawala fəla kwa ata nda məbatsa dukw masakəŋana a Mbulum a.»

Ta gəs Pul i ga Mbulum batsah ŋa ana i Yeruzalem a

27 Aləka mehinne təsəla ata aka à mendìve ka, gà asiŋ gà Yahuda ana tə dara ika ahəɗ Asiya ya, ta ŋgat a Pul i batsah ga Mbulum ata i Yeruzalem a. Tə slər ahər mburma, tə daha, ta gəs ŋgat. 28 Gà mburma ata ibam, ta wideye aàba hinne, ta gwaɗa a gà asiŋ gà mburma: «Dumara tsəma, kurum gà mburma aaha i Isərayel a. Araha, na wele ana a tsikewa manəsa bazlam nda təv gà Isərayel a, dite ka, nda təv məpala ahəm Musa ya, dite nda təv ga Mbulum batsah ŋa aaha kwa iɗəm a asa. Ama a zeke a dər ndeyndey, aɗaba araha, aka ndzəkara gà mburma ana gà Yahuda tsiye, a təv aaha ŋgwal ŋa lele tsəɗaŋŋa biy Mbulum a. Tàa nəs dər.» 29 Ti tsik kataya ka, aɗaba ana tàa mbər meŋgete a Tarufimus gà Efesiya i kə̀sà, ti sìweye a nda gà Pul a. Tə dzala i tar ka, ta gwa, a ge a ka, gà Pul tàa daha a batsah ga Mbulum ata nda wele ata. Tsaatsa tə daha ka, məma tsa.

30 Kə̀sà ata a wise ba hinne, gà mburma tə təz akabaha tserdze, ti yahaba gər, ta gəs Pul. Tə sapara ŋgat a bəra ya. Aləka i dəba ŋa ya, gà asiŋ gà mburma tə dara i ga ya tsara. Tə daha, ta handaka a gà biye hərmaga ŋa. 31 Ti yabaya aaka, ta waya makə̀ɗà ŋgat. Bazlam ata a ɗeha aà Əbay gà sliwdze gà Ruma ka, a daha, 32 a ndzək gà bàba gà sliwdze nda gà asiŋ gà sliwdze ŋgiɗ, dite ka, ta val a təv gà mburma ata tar riŋ ta ge a bazlam a. Ta ŋgat a gà Əbay nda gà sliwdze ata ti sìrìkaha a təv Pul a ka, ta miyak à ŋgat. Tàa lakar asa tsa. 33 Əbay sliwdze ata a gəs Pul, a gwaɗa a gà mburma ŋgar: «Dzawum ŋgat nda tsitsirɓe sula.» Dite i dəba ŋa ya, a wiz dukw ana Pul a ge ya, aà gà mburma ata. A gwaɗa a tar: «Naha ana, weke? A ge dze ana, meme?» 34 Ama gà mburma ana i fata ya, tar riŋ ta wideye a nda ndzəɗa. Gà asiŋ ŋa ta gwa: «A ge naha, kige tsa, naaka.» Əbay gà sliwdze ata a fə̀r ka, a riŋ a tsereke a dukw ana ndzer ŋa ya, i təv gà mburma ata ya tsa. Tə dza akaba bazlam ŋgùrà ŋgùrà ŋgùrà ŋgùrà masakəŋa. A gwaɗa a gà mburma ŋgar ata: «Dum à Pul a təv ga ana kà ndzawakwa iɗəm a.» Aləka ta mah ba, tə da dər. 35 I təv ana ti ndze a təv ga ata ti de a dər aɗəm a ka, gà sliwdze ata tə zla ŋgat mezle mezle aka dambazla ga ata ti de a dər aɗəm a, aɗaba ana gà asiŋ gà mburma ata ta miyek a à ŋgat tsiye. 36 Aɗaba gà mburma ata tserdze ya, ti zezem a ŋgat nda gà Mewideye. I huɗ Mewideye tar ata ya ka, ta gwa: «Say kə̀ɗakwa ŋgat, mə̀ mət iɗəm a.»

Pul a fàfəl ikaba ya

37 I təv ana ti de a à Pul a ga ata ya ka, Pul a gwaɗa a Əbay gà sliwdze ata ndaka ahəm girek: «I ŋget a vatwa aà mifèfilek beya?» Əbay gà sliwdze ata a gwaɗar aaka: «Tsaka, kà sər ahəm girek a? 38 Iye i gwa, kər ka, ə̀lagwa kəla gà Ezipt ana a zlara mewìsè bazlam a kə̀sà ndavana aaka, dite a ndzək mburma dəbuw faɗ nda gà dukw ahər tar, a dza tar a kusak aà məbatsa mburma ya tsiye?» 39 Pul a gwaɗar aaka: «Awaŋ, iye ka, gà Yahuda, ta wa iye tekeɗe, i kwite Tarsus ika ahəɗ Kilikiya. Iye ka, kəla gà kwite ana ndzer a, tsəka, iye gà slele tsa. Kamkam, viliŋ vatwa aà məfàfə̀là a gà mburma aaha te.» 40 Əbay gà sliwdze ata a vəlar vatwa. I dəba ŋa ya, Pul a hitse aka dambazla ga ata, a zla ahər a Mbulum, a ge dər kətkətkət, kamala megweɗe ya ka, ndzum ɗikɗik. Aləka gà mburma ata tə ndza ɗikɗik ka, Pul a dza ba aà mifèfìlè a tar ndaka ahəm tar gà Yahuda. A gwaɗa a tar: