Pul a sùwaya ika ahəɗ Makaduniya nda ahəɗ Girek
20
1 Aləka bazlam ata a mət aaka lele ka,
Pul a yaha gər a gà ɓəzla magəsa Mbulum ana i fata ya,
a daha,
a mà a tar aà arəv nda bazlam Mbulum asa.
Dite a geye a tar wusa.
I dəba ŋa ya,
ŋgat ŋa a mah ba,
a da aka ahəɗ Makaduniya.
2 Aka ana a de a ya ka,
a dawa nda təv gà mburma Mbulum ana i fata ya.
A màwa à tar à arəv nda bazlam Mbulum.
Dite i dəba ŋa ya,
a ndze aka ahəɗ Girek kuɗa.
3 A daha ka,
a ndza kiye makər i fata.
I dəba ŋa ya,
a dzala,
a waya mada aka ahəɗ Siriya,
nda slə̀làh yam zləmana.
Ama a tsaraka gà Yahuda tə dza akaba bazlam i magər tar,
ta waya makə̀ɗà ŋgat ka,
a mà aà vatwa ya.
A gwa:
«I mbìɗ a gər a dəba,
aka ahəɗ Makaduniya asa.»
A mah ba,
a da.
4 Tə da akaba nda gà Supatarus,
kəla Pirus ana a dara i Bariya ya.
Ama tar ka,
diŋ.
Tar nda gà Aristarkus,
nda gà Sekundus gà Tesalunike,
nda gà Gayus nda gà Timute gà Derbe,
dite nda gà Tikikus,
nda gà Tarufimus ana tə dara ika ahəɗ Asiya ya.
5 Aləka gà mburma ata tserdze ya,
tə lah aka miɗ.
Tə da a Turuwas.
Ta veve a mə̀r i fata.
6 Mər ŋa mì ndza i kwite Filipiya.
Aləka i dəba ŋa ya,
*megirive Paska a da iɗəm a ka,
mì mah ba a təv tar nda slə̀làh yam.
Mì ge aà vatwa mehinne ə̀zləm ka,
mì ndze a təv tar kuɗa.
Aləka mì ndza i fata kwaskwa ilik asa.
Mimbele Awitikus ana a mbəl i məməta ya, i Turuwas a
7 A pat səbədà i hawa ka,
mì yahaba gər,
aà mazəma dukw mezime matəkəra dər aà məməta Yesuw.
Pul a fàfəl a mburma ana mayahaba gər ŋa ya.
A tsik a tar aba bazlam Mbulum a,
haa a da tsikw a magər həvəɗ,
aɗaba ana a ndze a i təv tar asa tsa,
ndidwe ŋana a de a à tar a ya.
8 Mì yahaba gər ka,
a ga ana ika gər biy ŋgiɗ məmakər ŋa ya.
I ga ata ka,
gà lalampa a riŋ dzaydzay hinne.
9 Ama i fata ka,
wele duwa a riŋ gawla ŋa,
mandza ŋa ika biye mendiwik,
zləm ŋgar Awitikus.
A dze a zləm a bazlam ata Pul a tsik a ya.
Zàkwayiya ka,
mendze are aka gə̀sar are ziremme.
A dəɗara ika biye mendiwik ata i gər ŋa ya,
gup a bəɗ a.
Gà mburma ata tə tarəra a bəɗ a,
tə daha,
ta hitse à ŋgat ka,
məməta ŋa.
10 Aləka Pul a tarəra a təv ŋgar a,
a dara,
a kirik aaka a bəɗ,
ə̀ŋgəts a gəs aàba ŋgat.
A gwaɗa a tar:
«Arəv ma da à kurum a tsa,
aka mət tsa,
a riŋ nda are,
dukw ŋgar.»
11 Pul a mbəɗ gər,
a tsəl a ga ata asa.
A daha,
a sàs ikaba ɗaf ata ya,
tə zəm.
A tsik a tar bazlam hinne asa,
mbulum a dəv aaka à ŋgat.
Dite a mah ba,
a daba kuɗa.
12 Gà mburma ata tserdze i fata ya,
tə dəɗara aka wele aaha a dəɗ a,
a ma,
nda gà maŋgayaba ya.
Gà Pul tə da i kwite Turuwas a, a Miletus
13 I təv ana Pul a de a ya ka,
mì lah aka miɗ,
a gwaɗa a mə̀r:
«Dum.
I lehe aà kurum a a kwite Asus.»
Mər ka,
mì tsala a slə̀làh yam,
mì da dər a kwite Asus ata.
Ama ŋgat a waya ka,
a de a nda sik.
14 Aləka a leha aà mə̀r a fata ka,
a tsəlaha a təv mə̀r a slə̀làh yam ata mə̀r iɗəm a,
mì da akaba a kwite Mitilene nda gà ŋgat dze.
15 Aləka mbulum a dəv ndidwe ŋana ka,
mì hitse i fata ya,
mì da a tə̀vəməŋa a riŋ bise nda kwite Kiyus.
Dite ndidwe ŋa asa ka,
mì da i fata ya,
mì ndze a kwite Samus.
Ndidwe ŋa i ŋgiɗ asa ka,
mì da a kwite Miletus.
16 Mì mbə̀rə̀zl Efesiya a dəba kətsah zaakwa,
aɗaba Pul a gwa ka:
«I ta mìts a aà duwa ika ahəɗ Asiya i fata.
I de a tsəma tsəma,
na mege a ge a ba ya,
tsəka,
i ti le a aà *megirive Pantakwasta a Yeruzalem tsa.»
Pul a fàfəl a gà bàba ŋa ana i Efesiya tə daha a təv ŋgar a
17 Aləka i təv ana tar riŋ mandza ŋa i kwite Mitilene i fata ya ka,
Pul a slər mburma i təv ŋgar ata ya,
a təv gà mburma Mbulum ana i Efesiya ya,
aà mazalaha a gà bàba tar ŋa ana i ga Mbulum i fata ya.
18 Aləka tə daha,
ti ndzeha a təv Pul ka,
Pul a gwaɗa a tar:
«Ka sərum dər,
meme na mendze gà ya,
aka ana iye i təv kurum a,
daga a pat malahalah ŋa ana i daha aka ahəɗ Asiya ya.
19 Yàa ge meslire BATSAH kwa ŋa nda mahə̀nà gər a bəɗ lele,
dite tàa sèwèriŋ aɗəm are hinne asa nda gà tuwa,
agəra gà Yahuda ana ti dewa aà iye ala ya.
20 Kà sərum ka,
Yàa həmbər dukw ana a ge kurum a ŋgulum,
dite ka,
a mbil a kurum a ilik tsidze.
Yàa tsik a kurum i huɗ medzeŋge ana i dzeŋgewa a kurum i liwiŋ mburma i ga Mbulum a,
dite ndəna i dawa a kurum dər aà ga aà ga tserdze ya.
21 I tsikewa a gà Yahuda nda gà mburma ana tar gà Yahuda tsiye,
dite ta mbəɗ à gəzləŋ tar,
a təv Mbulum,
dite ka,
ta gəs Yesuw Kiristi BATSAH kwa ŋa nda gəzləŋ tar.
22 Kinehe ka,
i de a a Yeruzalem,
kamala biy ana Mezite Mesife Mbulum a gweɗiŋ:
Ge ya.
Dite kwets i sər dukw ana a ta giŋ a ba a gər i fata ya tsa asa.
23 Ama kəla ka,
i sər,
na Yàa ndze,
ku mege a kwite awara ka,
Mezite Mesife a gweɗewiŋ:
“Gà mesewere are nda daŋgay a riŋ ta veve a kər,
na i təv ana ki de aɗəm a ya.”
24 Ama iye ka,
Yàa dzala mesife gà tə tsa.
Dukw ilik a sèsiŋ ka,
say i ndìv a à meslire ana Yesuw BATSAH kwa ŋa a viliŋ a,
tsam ka,
tsway,
tsəka,
duwa a riŋ tsa.
Mege megemir ŋa ka,
kamala megweɗe ya:
Metsìkè bazlam Mbulum ŋgwal ŋa ana mburma a ndzer a dər are tsehe ya.
25 Iye i sər,
Yàa ndəv à mendze gà ika magər kurum a,
a kurum ana i tsik a kurum bazlam Əbay Mbulum a.
Ama kəla ka,
ki ŋgetwimiŋ a ɗa ika magər kurum asa tsa.
26 Aɗaba taŋa,
iye ihər i gweɗe a kurum a mbakum:
Na wura aka ta medzeye ilik ika magər kurum a ka,
ahəm gà asa tsa.
27 Aɗaba Yàa mbər metsike a kurum aba ya dukw ana a sàs a Mbulum daga piŋŋe ya.
Yàa həmbər aà kurum ilik tsidze.
28 Ka slum ba kurum,
dite ka slum gà mburma ana Mezite Mesife Mbulum a dza a kurum tar a ahər a mbaŋa.
Aɗaba Mbulum na a mbùrùɗara tar i bakal a nda məmbəz Kəla ŋgar a.
Kə̀ kə̀vum tar,
kamala gà ɓəza ana ta kiv a gà təmaŋ a.
29 Aɗaba i sər,
na Yàa da ka,
gà mburma ana kamala gà kəra dala ya,
ti dere a aka magər kurum a.
Dite kwets ti ta miyek a à gà təmaŋ ata ɓav tsa.
30 Ku mege gà mburma ana i liwiŋ kurum a tekeɗe,
ti ta hitse a aà pàrsa hinne ika magər kurum,
ta peze a kurum a za,
dite gà asiŋ ŋa ika magər kurum a,
ti zezem pàrsa tar ata.
31 Aɗaba taŋa,
ndzum nda metsehe,
sərum dər ka,
Yàa gàsl aà metsìkè a kurum nda gà tuwa ilik ilik tserdze,
ku ndaavəɗ,
ku ndaapat,
haa a ge mive makər.
32 Kinehe ka,
i ɗif à kurum a a ahər a Mbulum,
dite nda bazlam ŋgwal ŋgar ana kà ndzumar dər are tsehe ya.
Ŋgat ka,
ndzəɗa ŋgar a riŋ aà masəkaha à megìse kurum ana ki giswim a dər ŋgat a,
dite aà mivile a kurum gà dukw ŋgar ana tserdze,
a gwa:
I ta vile a a gà mburma gà ya.
33 Iye ka,
Yàa wiz siŋgwe,
kige tsa petek aà wura tsidze.
34 Ama kurum kà sərum,
i ge megemir ka,
nda ahər gà ŋa,
aà meŋgete dukw ana i ndze a dər,
dite nda gà màndàla gà asa ya.
35 Yàa ɗif a kurum à duwa tserdze,
say ki gekwe a ka,
kamala taŋa ya,
na dite ki slekwe a aà mazlàkà gà ɓəzla matawak a.
Dukw ana Yesuw BATSAH kwa ŋa a tsik a ka,
mə̀ məts a kurum gər tsa.
A gwa:
“Kàa vəl dukw a mburma ka,
ki ŋget a maŋgayaba hinne,
à zè a biy na ta vəlak duwa ya ivaɗ.”»
36 Pul a tsik aba bazlam ata ya tsara ka,
tə dza gurmits a bəɗ,
a hama a Mbulum nda gà tar tserdze.
37 Aləka i təv ana a de a à tar a ka,
tə dza akaba tuwa hinne,
tə daha,
ta geyer wusa,
ta gəs aàba ŋgat nda gəzləŋ ilik.
38 Aɗaba dukw ana a dzala tar i təv Pul hinne ya ka,
aɗaba ana a gwaɗa a tar:
Ki ta ŋgetwimiŋ a asa tsiye.
I təv ana à meh a ba ya ka,
tə laka ŋgat tsìm a təv slə̀làh yam ana a de a dər a.