Ga Ɓəzla Meslire 19

Pul i kwite Efesiya

1 Aka ana Apalus i kwite Kurintiya ya ka, Pul a da a kwite Efesiya ndaka vatwa ana a tsəl ndàra a kwite ya. A daha ka, a le riŋ aà gà asiŋ gà ɓəzla mazazama Yesuw i fata. 2 A gwaɗa a tar: «Kàa ŋgatum Mezite Mesife Mbulum a, na akahər ana kə̀ gəsum Yesuw a?» Ta gwaɗar aaka: «Maa tsaraka, kige tsa mì sər dukw ana tə zalar Mezite Mesife Mbulum a tsidze.» 3 Pul a gwaɗa a tar asa: «Medzìbe metsìlwìɓè à mburma a yam awara na ti tsilwiɓ aɗəm à kurum a?» Gà mburma aaha ta gwaɗar: «Ti tsilwiɓ à mə̀r ka, a biy Yuhana.» 4 I dəba ŋa ya, Pul a gwaɗa a tar asa mbaŋa: «Yuhana a tsilwiɓewa ka, à gà mburma ana a sàs a tar məmbə̀ɗà à gà gəzləŋ tar a. Ama a gwaɗawa a gà Isərayel mbaŋa ka, gəsum wele ana a dere a i dəba gà mba ya, nda gəzləŋ kurum, kərga megweɗe ya, wele ata ka, Yesuw Kiristi.» 5 Gà mburma ata tə tsaraka bazlam ata kataya tsara ka, ti tsilwiɓ à tar a yam nda zləm Yesuw BATSAH kwa ŋa. 6 Dite Pul a daha, a dza aka tar ahər. Mezite Mesife Mbulum ibam, a tarəra aka gər tar a kuɗa. I dəba ŋa ya, tə dza ba aà mifefile ndaka gà ahəm ŋgiɗ pampam. Dite tə daha, tə dza ba aà məma à gà guma ana Mbulum a tsik a tar a. 7 Gà mburma ata ka, ti sle kurwa gəra sula.

8 Pul aka ndza i fata kiye makər, a dawa a ga mahàmà a Mbulum gà Yahuda. Na aka daha ka, a tsikewa iɗəm bazlam Mbulum a mburma, hwarwa aà are ŋgar tsa, parakka lele. A ɗifewa a tar à *mekwere Mbulum ana a kwere a mba ya. A waya ka, na dite gà mburma ata ta gis a bazlam ŋa ya. 9 Ama gà asiŋ gà mburma ata hinne a sàs a tar megìsè bazlam ata tsa, ti niw. Tə sawlawa dər akaba aà vatwa BATSAH kwa ŋa hinne, ika miɗ mburma tserdze. Aɗaba taŋa, Pul a tsaraka kataya ka, a dara iɗəm i təv tar i fata ya. A ndzək dərra gà ɓəzla mazazama Yesuw a ahər a. Tə daha, a tsikewa guma ŋgar i lèkwen wele ŋa a riŋ, tə zalar Tiranus, kəla pat. 10 A ndza i fata mive sula. Gà mburma ana tserdze mandza ŋa ika ahəɗ Asiya ata ya, gà Yahuda nda gà na tar gà Yahuda tsiye, tə tsaraka bazlam BATSAH kwa ŋa fit.

Gà ɓəza Sikewas

11 Mbulum a gewa gà bàba gà dukw mene à mburma pampam nda ahər Pul. 12 Kərga taŋa ya, gà mburma ta wizewa petek ana ika ba Pul a, ti de a dər a təv gà ɓəzla dukw məməta, nda gà mburma ana sitene i ba tar a. Aɗaba ana tàa ləm aà petek ata ka, ta mbalawa i dukw məməta tar a.

13 Gà asiŋ gà Yahuda ana i fata tə sər Yesuw tsiye, tə sùwayawa aà kwite aà kwite, tə dalawa gà sitene à mburma ya. Ta ŋgat a dukw ata kataya ka, tə zla akaba aka ba tar, waytsa, mìi delewe a gà sitene à mburma ya nda zləm Yesuw, kamala taŋa ya mbaŋa. Aɗaba taŋa, ta gwaɗa a gà ɓəzla sitene ata, ku weke: «Iye ihər i delewe a à kurum gà duwa ya, nda zləm Yesuw ana Pul a riŋ ihər a tsik a a mburma ya.» 14 Ama gà mburma ata ta gewa gà dukw ata ya ka, tar təsəla, gà ɓəza mala mandəva kuɗa a Mbulum duwa batsah ŋa a riŋ i fata. Ŋgat ka, gà Yahuda. Zləm ŋgar Sikewas. 15 Aləka i dəba ŋa ya, mala sitene ata i ba ŋgar a, a gwaɗa a tar: «Iye ka, i sər Yesuw, Pul tekeɗe ibam, i sər ŋgat lele dze ana, kurum dze ana, gà weke asa ya?» 16 Wele ana sitene ata i ba ŋgar a, a daha, urup a ndàb aka tar, kwiriɓ a dza à tar aà mbulum a fit. Ta beyera i ga i ma ŋgar a gireŋ, gwizem gwizem ze petek.

17 Gà mburma ana i kwite Efesiya tserdze ya, gà Yahuda nda gà mburma ana tar gà Yahuda tsiye, tə tsaraka dukw ata a ge ba ya ka, tə dzadzar hinne, dite tə zlə̀b à zləm Yesuw BATSAH kwa ŋa lele kuɗa. 18 I dəba ŋa ya, gà asiŋ gà mburma ana ta gəs Yesuw a hinne, tə daha, ti ɗifeye à gà dukw bakal tar ana ta gewa ŋgwal ŋa tsiye. 19 Dite gà asiŋ ŋa ana tar gà màhəram a hinne i liwiŋ tar, tə daha, tə ndzakara gà wakita màhəram ana ta gewa dər a tserdze, a liwiŋ mburma a fata ya. Ti yahar gər, ta wànà fit. Ta kura aɗəm tsakala ŋa ka, a sle a aà kur siŋgwe dəbuw dzik ə̀zləm. 20 Kərga taŋa ya na bazlam BATSAH kwa ŋa a ɗe zləm, a da aka miɗ aka miɗ nda mesikehe ya.

Ta wise bazlam i kwite Efesiya

21 I dəba gà dukw ata ta ge ba ya ka, Pul a dzala, a gwa: «I de a a Yeruzalem.» A de a ndaka ahəɗ Makaduniya, dite ndaka ahəɗ Akaya mbaŋa. A gwa asa: «I təv ana Yàa da ya ka, say i ndze a a Ruma mbaŋa.» 22 Aɗaba taŋa, a slər gà ɓəzla mazlàkà ŋgat sula, gà Timute nda Arastus, a Makaduniya. Ama ŋgat ŋa a məts riŋ i dəba, a ndza zaakwa ika ahəɗ Asiya i fata.

23 Akahər ata ka, ta hitse aà maàga hinne i Efesiya, agəra bazlam Yesuw BATSAH kwa ŋa. 24 Ama mala məvəɗa dukw maslawa duwa a riŋ i fata, tə zalar Demetiriyus. A və̀ɗawa mendzikiɗe ba ga duwa a riŋ biy məkəs ŋa ta gwa, ar i mbulum, a ne mbulum tar, tə zalar *Artemis. A və̀ɗawa ka, i dukw ana tsəzlzla ya. A dzawuwa dər. Gà ɓəzla megemir dukw ata a dza aɗəm tar a ka, ta ŋget a dukw maya ba tar lele. 25 A daha, a yaha gər a gà mburma ata nda gà asiŋ gà misle ŋgiɗ ana tar riŋ ta ge a gà duwa, a ndzikiɗ ba taŋa ya. A gwaɗa a tar: «Gà màndàla gà, kə̀ ŋgatakwa dukw hinne kinehe ka, agəra megemir aaha. 26 Ama kàa ŋgatumar, dite kàa tsarakum dukw ana wele aaha tə zalar Pul a ge a ya. A riŋ a gweɗe a ka: “Gà mbulum ana gà mburma ta ge nda ahər a ka, taŋa ka, gà mbulum ana ndzer a tsa.” A bene a mburma hinne, dukw ŋgar, tsəka, i Efesiya i faha ɗekɗek tsa. Ku mege i ŋga, ika ahəɗ Asiya fit dze mbaŋa. 27 Taŋa a ge a matawak ka, a kwa ana ki gekwe a megemir aaha ya ɗekɗek ɓav tsa. ama a bwire a ka, à batsah ga mbulum Artemis mbaŋa. Ama kinehe ka, ku weke a zlibe a à ŋgat ika ahəɗ Asiya i faha, dite ika gər ahəɗ tserdze asa. Aləka aka miɗ mba ka, gà mburma ti sle a aà mezlibe dər asa tsa ana, meme?»

28 Gà mburma ata tə tsaraka bazlam ata kataya tsara ka, ta ge arəv hinne aka gər Pul, tə dza ba aà Mewideye. Ta gwa, «Artemis gà Efesiya ka, batsah ŋa dukw ŋgar, wura mə paza a kurum za tsa.» 29 Mewideye dukw tar ata dàhum dàhum a ɗe zləm i kwite fit. Gà mburma ata ta gasa gà Makaduniya duwa tə də̀ɗaha aka Pul a fata. Zləm tar ka, gà Gayus nda Aristarkus. Tə da à tar aka dàɓa a təv mayahaba gər mburma ana ta gewa iɗəm màhaw a. 30 Pul a pə̀raha a təv gà mburma ata ka, a sasar aà mede a təv tar zləmana. Ama gà ɓəzla mazazama Yesuw ana i fata ya, ta palar ahəm, ta gəs miviler vatwa tsa. 31 Gà asiŋ gà bàba gà mburma ana ika ahəɗ Asiya i fata, ta ge a megemir ŋgumna, ti ne gà masla Pul a, tə sləraha mburma a təv ŋgar mbaŋa, ta gwaɗar, ma tə da a təv màhaw tar ata tsa. 32 Ama tar ata i təv mayahaba gər tar ata tserdze ya ka, a mà a tar dər ŋgə̀rəŋ ŋgə̀rəŋ. Gà misle ŋgiɗ iɗəm hinne, tə sər dukw ana ti yahaba ahər gər a tsa kəla. Gà misle ŋgiɗ huwwa bazlam, ta gweɗe a, agəra naha, kige tsa agəra naka. A mà a tar dər daɗəkɗəkka. 33 Ama gà Yahuda tə slər mburma ilik i magər tar a, zləm ŋgar Aleksandire. Ta màr à bazlam ŋa ahər, dite ma ta hitse aka miɗ gà mburma ata, ma gwaɗa a tar ka: «Bakal gà wele aka kə̀ gəsum tar a ka, a riŋ tsa.» Aləka wele aka a mah ba, a da. A daha ka, a hitse aka miɗ gà mburma ata. A zla ahər a mbulum, kamala megweɗe ya ka: Ndzum ɗikɗik. A waya mifefile a tar zləmana. 34 Ama gà mburma ata ta fə̀r, ŋgat gà Yahuda ka, tə səkah à Mewideye hinne, ta gəs ahəm ŋgar tsa. Tə ndza ikəka ndzemde sula asa. Ta gwa: «Artemis gà Efesiya ka, batsah ŋa ndzer, wura a riŋ a za dər ŋgat tsa.»

35 Zàkwayiya ka, mala makwàrà kə̀sà ata a gəs a tar aàba gər nda bazlam gireŋ, dite tə ndza ɗikɗik. I dəba ŋa ya, a gwaɗa a tar kuɗa: «Kurum gà mburma aaha i kwite Efesiya ya. Ku weke a sər ka, Efesiya na a ne kwite batsah ga məkəs mbulum Artemis ana iɗəm a. Dite na kinehe, ku weke ki zlìbekwe a à mendzikiɗe ba ŋgar ana a dəɗara i mbulum i gər ŋa ya. 36 Wura a sle a aà menìwè à bazlam ŋa tsa. Aɗaba taŋa, ŋgulum ndzum ɗikɗik, ka ta gwim dukw ana kə̀ gəsum ndzəraw masakəŋa ya tsa. 37 Kurum kà sərum, kə̀ gasumara gà mburma aaha a faha ya ka, məfara ŋa, tsəka kwets tàa ge ara akəl i ga mbulum kwa ya tsa, dite kwets tàa tsik manəsa bazlam aà məkəs mbulum kwa ɓav tsa asa. 38 Na gà Demetiriyus nda gà ɓəzla megemir ŋgar, a sàs a tar məma à bakal a wura ka, ti sle aà mege a tar seriye, dite gà bàba ŋana tekeɗe, tar riŋ mbaŋa. Ti sle aà medze a gwìdze a təv tar. 39 Ama na bəla bazlam à kurum i gà gər ka, ŋgulum gà bàba ŋa ana i kə̀sà ya, tə̀ sàs a kurum iba ya. 40 I huɗ bazlam kwa aaha və̀ɗəna ya ka, na kàa gekwa metsehe tsəka, ta gweɗe a kwe a: “Kà təmum ka, guvəl.” Aɗaba dukw ana kà yahakwaba ahər gər a ka, ndzer ŋa a riŋ tsa. Ki gekwe a ka, bazlam taf məfara ŋa, tsəka, kwets ki slekwe a aà meŋgete wur bazlam ana ki ti tsikikwe a ika miɗ seriye ya tsa.» (41) A tsik a tar aba ya kataya ka, a gwaɗa a gà mburma ata mayahaba gər ŋa ya: «Dayum a gà ma kurum.» Dite tə da kuɗa.