Ga Ɓəzla Meslire 18

Pul i kwite Kurintiya

1 I dəba ŋa ya, Pul a da i kwite Atina ya. A da a Kurintiya. 2 A daha ka, a leha à Yahuda duwa, zləm ŋa Akila. Ta wa ŋgat ka, ika ahəɗ Pwantus. Tə dara ika ahəɗ Italiya ya kinkin nda məkəs ŋgar Piriskila. Tə dara ka, aɗaba batsah Əbay gà Ruma duwa, zləm ŋa Kəlawdiyus, a hitse aà gà Yahuda nda bazlam. A dalawara tar i Ruma ya fit. Aləka Pul a daha, aà məfə̀rà aka tar. A ge a tar wusa. 3 I dəba ŋa ya, tə ndza akaba i fata tserdze, ta kiriweyewa ga petek aà tsakala, ta hinne a iɗəm, aɗaba ŋgat tekeɗe, mala megemir ŋa, kamala gà wele ata nda məkəs ŋgar a mbaŋa. 4 Pul a dawa a ga mahàmà à Mbulum gà Yahuda kəla pat mesifikaba. Na aka daha ka, a tsikewa bazlam Mbulum a gà Yahuda, dite nda gà Girek asa. A waya, na dite ta gəs bazlam ata ya.

5 Aləka gà Silas nda Timute aaha ndeɗiŋa tə daha ika ahəɗ Makaduniya ya, ti ndzeha a təv Pul tsara ka, a miyak aba à megemir mekiriwe dukw ata ya. A tsikewa bazlam Mbulum kəla pat a gà Yahuda. A gwaɗawa a tar: «Yesuw ka, mala məmbala mburma ana Mbulum a gwa, i slir a kurumehe a ya.» 6 Ama gà Yahuda ta gəs bazlam ata Pul a tsik a tar a tsa. Tə ndavayar pìslìɗìɗe. I dəba ŋa ya, a dara i liwiŋ tar a, a gàgə̀r aba ahəɗ tar à petek ŋgar a. Taŋa ka, kamala megweɗe ya: I miyak à kurum. Aləka i dəba ŋa ya, a gwaɗa a tar: «Na kàa dzeywim ka, bakal gà asa tsa, ahəm kurum dukw kurum. Daga kinehe ya, i de a ndàra nda təv gà mburma ana tar gà Yahuda tsiye.» 7 I dəba bazlam ŋgar ata ya ka, a hitse, a da. A daha ka, a ndza i bəra wele ŋa a riŋ zləm ŋa Titiyus Yustus. Wele ata ka, gà Yahuda. A dzawa gurmits a bəɗ a Mbulum lele. Ga ŋgar ka, i tsaka ga mahàmà a Mbulum gà Yahuda ana i fata ya. 8 Ama i fata ka, wele duwa a riŋ, zləm ŋgar Kirispus. Ŋgat batsah ŋana i liwiŋ gà mburma ana ta hamawa a Mbulum i ga ata ya. Nda gà mburma ana i ga i ma ŋgar a, ta gəs Yesuw nda gəzləŋ tar fit. Gà asiŋ gà Kurintiya hinne, tə tsaraka bazlam Pul ata a tsik a tar a ka, ta gəs bazlam Mbulum a gəzləŋ tar mbaŋa. Ti tsilwiɓ à tar a yam.

9 A pat duwa ndaavəɗ ka, sunwa a da aka Pul. Mbulum BATSAH kwa ŋa a gwaɗar: «Magəɗa ma gek tsa. Zazam metsìkè bazlam Mbulum pəra, ka ta miyak dər tsa. 10 Aɗaba iye riŋ i təv yak. Wura a sle aà melime à kər tsa. Na kàa tsik a tar ka, gà mburma gà ti ta ge a ɗa i faha ka, hinne.» 11 Aləka i dəba ŋa ya, Pul a ndza i fata mive ilik nda mezehe ŋa. A dzeŋgewa bazlam Mbulum a mburma.

12 Ama akahər ata, gà Ruma ti tike aɗəm Əbay ŋgiɗ ika ahəɗ ata tə zalar Akaya ya. Zləm ŋgar Galiyaw. I dəba ŋa ya, gà Yahuda tserdze ta gaw aà Pul. Ta gəs ŋgat, tə da à ŋgat aka miɗ seriye. Tə daha, 13 ta gwaɗa a Galiyaw: «Wele aaha a riŋ a yehe a vatwa, dite gà mburma tə̀ dza gurmits a bəɗ a Mbulum ka, kamala biy na məpala ahəm Musa a tsik a tsiye.»

14 I dəba bazlam tar ata ya ka, Pul à dze a ba aà mifefile zləmana: Galiyaw a gwaɗa a tar: «Na bazlam ŋa ka, biy makə̀ɗà mburma, kige tsa ŋgwal bazlam tsa ndeyndey ka, i sle a aà mege a kurum seriye ŋa, gà Yahuda gà. 15 Ama bazlam ana magàwàɗà gər a mburma taf məfara ŋa, zləm bazlam ŋa a riŋ tsa, ki tsikwim a ka, agəra məpala ahəm kurum ɗekɗek pəra ya ka, i sle a aà mege seriye ŋa tsa. Gwim megemir ŋa dukw kurum.» 16 I dəba ŋa ya, a dalawa dərra iɗəm tar a, a gwaɗa a tar: «Dum dər i təv seriye ga ya.» 17 Gà na i liwiŋ gà mburma ata tə sər Mbulum tsiye tserdze, tə daha, ta gəs Sastanas, batsah Əbay ga mahàmà a Mbulum gà Yahuda ata. Ta gə̀zl ŋgat lehhè ika miɗ Galiyaw i fata, ama Galiyaw ìndwe aka fàfəl tsidze.

Pul a mbəɗ gər a kwite Antakiya

18 Aləka Pul a ndza i kwite Kurintiya hinne asa, nda gà na ti ne gà damər ŋgar i fata ya. Dite i dəba ŋa ya, a da à tar a. Ti de a aka ahəɗ Siriya, tar nda gà Piriskila nda zal ŋgar Akila, nda slə̀làh yam. Ti ndze a Kankiriya aà guva duluv ata ka, Pul a zàz ikaba ambəz a, kamala ana gà Yahuda ta gewa dər a, kamala megweɗe a tar a ka: Yàa vəl ba gà a megemir Mbulum. Tə daha, tə tsala a slə̀làh yam. Ta mah ba, tə da. 19 Aləka ti ndze a kwite Efesiya ka, Pul a miyak à gà Akila nda daala ŋgar Piriskila a fata. Ŋgat ŋa a da a ga mahàmà a Mbulum gà Yahuda ana i fata ya, a daha, tə dza akaba mifefile nda gà Yahuda riŋ i ga ata. 20 Ta ger kamkam hinne, ta gwaɗar: «Ndza a mə̀r dər ɗa i faha zaakwa te.» Ama Pul a gəs tsa. 21 A miyak à tar a fata. Aləka i təv ana à meh a ba ya ka, a gwaɗa a tar: «I mère a a təv kurum a mba, na Mbulum aka waya ya.» A mah ba, a da i kwite ata ya nda slə̀làh yam.

22 A ndze a kwite Kaysariya tsara ka, a da i fata ya nda sik. A da a Yeruzalem, aà mege wusa a gà mburma Mbulum ana i fata ya. Aləka, a zazəɗ i fata ya, a da a kwite Antakiya. 23 A daha, a ndza zaakwa i fata ka, a mà à vatwa ŋgar ata asa ndaka ahəɗ gà Galatiya nda Firigiya. A vəl ndzəɗa a gà mburma Mbulum ana i fata ya tserdze, i təv megìse tar ana ta gəs Yesuw a.

Apalus i kwite Efesiya nda Kurintiya

24 Yahuda duwa ilik, zləm ŋa Apalus, a daha a Efesiya. Ta wa ŋgat ka, i kwite Aleksandiriya. Wele ŋa a sər məma à ŋgwaza ka, lele. Mburma ta waya hinne. Ama a sər məma à dukw ana i wakita Mbulum a lele asa mbaŋa. 25 Aka sinike ba ika vatwa BATSAH kwa ŋa ka, lele. A ɗifewa à dukw ana nda təv Yesuw Kiristi ya ka, nda ndzer ŋa parakka. A dzeŋgewa a tar a dukw ata ka, nda gəzləŋ ŋgar ilik zayya lele. Ama kə̀la ka, a sər ka, metsìlwìɓè à mburma a yam Yuhana ana a tsilwiɓewa dər aɗəm a, tsəka, biy Yesuw tsa. 26 A daha, a dza ba aà mifefile i ga mahàmà a Mbulum i fata tsara, hwarwa aà are ŋgar tsa. Gà Akila nda məkəs ŋgar Piriskila aaha ndeɗiŋa ya ka, tar riŋ i fata mbaŋa. Dukw ana ŋgat a riŋ a tsik a ya ka, ta gəs aàba ŋgat lele. Tə da akaba a ma tserdze. Tə daha, ti ɗifewar à vatwa Mbulum, à gà dukw ana iɗəm a tsaraka tsiye. 27 Aləka i dəba ŋa ya, a sàs a Apalus mada aka ahəɗ Akaya. Gà na ti ne gà damər ŋgar i fata ya, tə tsaraka kataya ka, ta mà akaba ahəm. Ta wetser wakita a ahər. Ta gwaɗar: «Na kàa daha ka, vəl a gà damər kwa ana i fata ya.» Apalus a mah ba, a da. Mewetse ŋa i wakita ata ka, kamala megweɗe ya: «Araha, Apalus a dehe a ka, gəsum aàba ŋgat lele te.» Aləka a ndzeha a fata ka, a zlak gà mburma Mbulum ana i fata ya. Mbulum a ge a tar ŋgwal hinne, dite ka, tə səkah à megìse tar, ta gəs Yesuw nda gəzləŋ tar. 28 Ta mbetseba ahəm nda gà Yahuda ndərzayya i bəra. A ɗifewa a tar à dukw ana wakita Mbulum a tsik a, a gwaɗawa a tar: «Mala məmbə̀là à mburma ana Mbulum a gwa, i slir a kurumehe a ya ka, Yesuw.» Aka be gà Yahuda fit nda bazlam, tə sər dukw ana ti tsiker aakaha a ya asa tsa.