Gà Pul nda Silas i kwite Tesalunike
17
1 Aləka tə da ndaka magər kwite Amfipulis,
nda Apaluniya,
dite ti ndze a kwite Tesalunike ana ga mahàmà a Mbulum gà Yahuda iɗəm a.
2 Pul a da a ga mahàmà a Mbulum ata kamala ana a gewa dər a.
A ndza i fata kwaskwa makər.
A pat mesifikaba ka,
tə dzawa akaba bazlam agəra wakita Mbulum nda gà mburma ana i fata ya.
3 A ɗif a tar dər,
a gwaɗa a tar:
«Mala məmbə̀là à mburma ana Mbulum a gwa,
i slir a kurumehe a ya ka,
say à sèwèr a are dzekwiŋ,
dite i dəba ŋa ya,
a ta mbilere a i məməta ya asa,
kamala ana wakita Mbulum a tsik a.»
A gwaɗa a tar asa:
«Yesuw ata iye ihər i ɗif a kurum a dər a ka,
ŋgat ŋa na a ne mala məmbə̀là à mburma ana Mbulum a gwa,
i slir a kurumehe a ya.»
4 I dəba bazlam ŋgar ata ya ka,
gà asiŋ gà misle ŋgiɗ ana ika magər gà Yahuda ya,
tə dəɗ aka bazlam gà Pul ata nda Silas a.
Ti ne gà damər tar,
aɗaba ana ta gəs Yesuw a.
Ama gà asiŋ gà Girek ana iɗəm tə dzawa gurmits a bəɗ a Mbulum a,
nda gà məkəs gà ŋgwal gà mburma hinne ta gəs kataya mbaŋa.
5 Ama i dəba megìse tar ata ya ka,
gà asiŋ gà Yahuda ana ta gəs tsiye,
ti ne are a gà Pul nda Silas hinne.
Tə daha,
ti yaha gər a gà ɓəzla gə̀rlàkà na tar riŋ tì sìweye a ika bàrama məfàrà ŋa ya,
dite ka,
tə sùwaya à bazlam ana ŋgwala tsiye i kə̀sà agəra gà Pul nda Silas.
Tə daha,
ta wuba à bazlam ata i huɗ kwite ata fit.
Aləka gà mburma tə tsaraka kataya ka,
tə daha a bəra Yasun.
Ti le a ga ŋgar tits,
aɗaba wele ata ka,
a gəs bazlam gà Pul nda Silas.
Tə ndzawa ka,
i ma ŋgar.
A sàs a tar magàsàra tar a magər mburma a bəra ya.
6 Ama tə daha,
ta fə̀r tar ka,
tar riŋ tsa.
Tsaw tsaw ta gasa gà Yasun nda gà asiŋ gà damər ŋgar ŋgiɗ ana ta gəs Yesuw a.
Tə da à tar aka miɗ gà ɓəzla seriye,
nda gà Mewideye.
Ta gwa:
«Gà mburma aaha ka,
ta wise a bazlam ika gər ahəɗ tserdze ka,
tàa ndzera a kwite kwa a faha mbaŋa.
7 Araha,
Yasun tekeɗe,
a gəs aàba tar aà mendze i ma ŋgar.
Aɗaba gà mburma ata tserdze ya,
ti tsik aka dukw ana a sàs a Əbay kwa ana i Ruma,
a kwere a ahəɗ aaha tsiye.
Aɗaba ta gwa ka,
batsah Əbay ŋgiɗ a riŋ asa,
zləm ŋgar Yesuw dze ana,
meme?»
8 Gà mburma aaha nda gà ɓəzla seriye ya,
tə tsaraka kataya ka,
a tsəɓ a tar hinne.
9 Gà Yasun nda gà asiŋ ŋa ata ta pəl gər a gà ɓəzla seriye dzekwiŋ,
na dite ta pəl à tar a.
Gà Pul nda Silas i kwite Bariya
10 Aləka həvəɗ a ge tsara ka,
gà damər tar ana a riŋ ika vatwa Mbulum i fata ya,
tə slər gà Pul nda Silas a kwite Bariya.
Ti ndzeha a fata ka,
tə da a ga gà Yahuda ana ta hamawa iɗəm a Mbulum a.
Tə daha,
ti tsik a tar bazlam Yesuw.
11 Ama gà mburma ana i fata ya ka,
gà ŋgwal ŋa,
tə za gà Yahuda ana i Tesalunike ya,
nda metsehe.
Aɗaba tar ka,
tə dza zləm a bazlam Mbulum lele.
Kəla pat ti dzeŋgewa wakita Mbulum,
aà mesire dər ka,
wànà dukw ana Pul a tsikewa iɗəm ana ndzer a.
12 Gà mburma hinne i liwiŋ gà Yahuda ata ta gəs Mbulum nda gəzləŋ tar,
dite gà ŋgwal gà bàba gà Girek,
ku mege nda gà bàba gà məkəs ana i fata ya hinne,
ta gəs Mbulum nda gəzləŋ tar mbaŋa.
13 Ama gà asiŋ gà Yahuda ana ndeɗiŋa i Tesalunike ya,
tə tsaraka Pul a riŋ a tsik a bazlam Mbulum a mburma i kwite Bariya asa ka,
tə daha a fata,
aà mewìsè bazlam,
ti slir à ter a mburma asa.
14 Ama gà ɓəzla mazazama Yesuw ana i fata ti ne gà damər tar a,
tə laka Pul aà guva duluv tsara.
Gà Silas nda Timute ka,
ta mətsa riŋ i fata.
15 Ama gà mburma ana tə laka Pul aà guva duluv ata ndeɗiŋa ya ka,
tə dəɗ aka ŋgat tsikw a kwite Atina.
Ti ndzeha a fata ka,
Pul a slərra tar a təv ana tə daha iɗəm a.
A gwaɗa a tar:
«Dumaha,
gwaɗum a gà Silas nda Timute ka,
tə dara tsəma,
tə ndza asa tsa.»
Aləka i dəba ŋa ya,
gà mburma ata ta màhara ba ya,
tə dara.
Pul i kwite Atina
16 I təv ana Pul a riŋ a bebe a gà Silas nda Timute i kwite Atina ya,
a samata ka,
matawala fəla ŋgiɗ pampam a beha riŋ i fata hinne.
Ama ka,
a tsəɓar.
17 A dawa a gà ga mahàmà a Mbulum gà Yahuda.
Na aka daha ka,
ta mbetsewaba ahəm nda gà Yahuda hinne,
dite nda gà asiŋ ŋa ana tə dzawa gurmits a bəɗ a Mbulum a mbaŋa.
Kəla pat a tsikewa bazlam Mbulum a gà na tə lə̀mawa akaba i kwaskwa ya.
18 Gà wele duwa a riŋ i kwite ata mbaŋa.
Zləm tar gà *Epikuriya nda *Situkiya.
Tar ka,
gà ɓəzla meɗe à fəla ana ti ɗe a dər a mburma ya.
A pat duwa,
gà asiŋ ŋa ana i liwiŋ tar a,
tə dza ba aà mege bazlam nda gà Pul asa.
Gà misle ŋgiɗ ta gwaɗawa:
«Dukùla na naha a ɗeme a dze ka,
kà sərakwa tsiye?»
Gà asiŋ ŋa ibam,
ta gwaɗawa:
«A ɗif a ka,
à gà zləm mbulum ana kà sərakwa ilik tsiye.»
Ti tsik ahər gà bazlam ata ka,
aɗaba ana Pul a riŋ a tsik a ka,
aà Yesuw nda mimbile ŋgar ana a mbəlara i məməta ya.
19 I dəba ŋa ya,
gà mburma ata ta waya masəra dukw ata Pul a tsik a ya lele.
Tə da à ŋgat a tə̀vəməŋa a riŋ tə zalar Ariyupagus,
ta gewa iɗəm seriye.
Tə daha,
ta gwaɗar:
«Awiya guma la na naha ki tsik a asa ya?
Ɗif a mə̀r dər te.
20 Aɗaba gà dukw ata ki tsik a ya tserdze ka,
ndə̀kə̀zlə̀zlə̀mma maa tsaraka ilik tsa,
dite ka,
na a sàs a mə̀r aà mesire ya,
gà bazlam ata ki tsik a ya dze ana,
kərga megwèɗè əla ya?»
21 Ama gà mburma ata i kwite Atina i fata ya,
nda gà slele tar tserdze,
tə dzawa zləm ka,
tseŋgekkè aà metsìkè dukw ana awiya ŋa ya,
nda matsaraka ŋa ɗekɗek.
22 Aləka i dəba ŋa ya asa,
Pul a hitse aà mbulum ika magər gà mburma ata i Ariyupagus a,
a gwaɗa a tar:
«A kurum gà Atina.
I samata kurum ka,
kurum gà ɓəzla mazàmbàɗà à gà fəla ana tserdze ya.
23 Aɗaba Yàa sùwaya i kwite kurum tserdze.
Yàa ŋgat a gà təv ana kà tàwàlawum aɗəm gà duwa ya.
Ama ka,
Yàa le aà kur ana kà batsawum aaka gà duwa ya,
mewetse ŋa ihər,
kamala megweɗe ya ka:
“Mì bats naha ka,
a mbulum ana mì sər tsiye.”
Aɗaba taŋa kurum riŋ ihər ki dzwìm a gurmits a bəɗ ka,
a mbulum ana kà sərum ŋgat ŋa tsiye.
Ama kinehe i dara ka,
aà meɗife a kurum à ndzer ŋana kuɗa.
24 Mbulum ana a ge gər ahəɗ,
nda gà dukw ana iɗəm a tserdze ka,
ŋgat Əbay ana a kwere a gəza mbulum nda gər ahəɗ a.
A ndze a i ga ana gà mburma ta ger nda ahər a tsa.
25 Ama kuɗa duwa a ger a tsa,
gà mburma ti sle aà mezleke a ŋgat tsa asa mbaŋa.
Aɗaba ŋgat na a vile a mandza zayzay nda mesife nda gà dukw ana tserdze a mburma ya ivaɗ.
26 Ŋgat a ge malahalah ŋa ka,
mburma ilik,
dite na ta wuba hinne,
tə rah aka gər ahəɗ a.
A ɗif aba à kwiye ŋa ana ti ti ndze aɗəm a ya,
nda mendze tar ana ti ndze a aà bəra ya daga piŋŋe.
27 A ge kataya ka,
dite mburma ti yaha ŋgat,
biy tsa ti le ahəriŋa,
na ti yehe a ŋgat a.
Aɗaba ndzer kə̀la ka,
Mbulum a riŋ diriŋ à kwa ya tsa,
ku mege i təv weke tserdze ya.
28 Aɗaba kə ŋgatakwa mandza aà bəra ka,
i təv ŋgar a,
ku mege mege dukw ana kinehe ki gekwe a ya,
nda mendze ana ki ndzekwe a ya tekeɗe.
Kamala gà ɓəzla matsuwara ahəm ana ika magər kurum a,
ti tsikewa ka,
ndzer kaɗəŋ,
na ta gwa,
mə̀r tekeɗe ka,
gà ɓəza Mbulum mbaŋa ya.
29 Na kwa tserdze gà ɓəza Mbulum ka,
a da dər tsa na ki dzelekwe a ka,
Mbulum a ndzikiɗ ba gà dukw ana ta geye a nda ahər a,
kamala gura ana ta və̀ɗ a,
nda gà dukw ana tsəzlzla ya,
kige tsa kur ana ta pàpə̀z nda metsehe tar a.
30 Mbulum ka,
aka dzala aka mendze ana akahər ata gà mburma tə sər ŋgat tsiye tsa.
Ama kinehe ka,
a riŋ a zel a a gà mburma tserdze.
Ku mege i ŋga,
tə dara,
ta mbəɗ à gəzləŋ tar.
31 Aɗaba aka zla iɗəm pat ŋa ana a ta ge a seriye a mburma nda ndzer a.
Seriye ata a ge a ya ka,
nda ahər wele ana ŋgat ŋa a zla i liwiŋ mburma ya ya.
A mbəlara à ŋgat i məməta ya,
dite gà mburma tə sər dər ka,
kaɗəŋ ndzer a.»
32 Aləka gà mburma ata tə tsaraka bazlam Pul ata a ɗif à wele ana a mbəlara i məməta ya ka,
gà misle ŋgiɗ tə dza ba aà sawla,
ti sewle ahəriŋa.
Gà asiŋ ŋa ta gwaɗar:
«Ki ti tsik a mə̀r a guma bazlam ata a pat ŋgiɗ asa.»
33 I dəba bazlam tar ata ya tsara ka,
Pul a da à tar a.
34 Ama gà asiŋ ŋa ta gəs bazlam ŋgar ata nda gəzləŋ tar,
tə dəɗ akaba.
I liwiŋ gà mburma ana ta gəs bazlam ata ya ka,
wele ŋa a riŋ i liwiŋ gà ɓəzla seriye ata,
zləm ŋgar Diyunisiyus.
Məkəs ŋa a riŋ mbaŋa,
zləm ŋgar Damaris,
dite nda gà misle ŋgiɗ pam asa.