Timute a dəɗ aka gà Pul nda Silas
16
1 Aləka gà Pul ta mah ba i fata ya,
tə daya a gà kwite Derbe nda Listira.
Ti ndzeha a fata ka,
tàa le aà mala magəsa Yesuw duwa a riŋ,
zləm ŋgar Timute.
Wele ata,
na a wa ŋgat ka,
dəm gà Yahuda.
Mama ŋgar ata ibam,
mala magəsa Yesuw mbaŋa.
Ama tsir ŋgar kə̀la ka,
gà girek.
2 Ama gà damər ŋgar ana ika vatwa Mbulum i kwite Listira nda gà na i Ikuniya ya,
ta waya Timute hinne.
3 A sàs a Pul ka,
Timute mà dəɗ aaka,
dite tə da nda gà tar tserdze.
Pul a daha,
a sàs Timute dzekwiŋ,
dite tə dəɗ akaba a təv ana ti de a ya.
A sàs ŋgat ka,
aɗaba ana tar riŋ magàwà ŋa nda gà Yahuda i fata ya.
Aɗaba gà Yahuda ana i fata tserdze ya,
tə sər,
tsir ŋgar ka,
gà girek,
4 dite ka,
ta gəs ahər bazlam ana a tsik a ter a ya,
aɗaba na masasa ŋa tsəka,
ta gis a tsa.
I təv mede ana ti de a ya ka,
tə da aà kwite aà kwite.
Ta màwa à bazlam ana ta wetse i huɗ wakita ata ya,
a gà mburma Mbulum ana i fata ya,
kamala biy gà ɓəzla meslire Mbulum nda gà bàba ŋa ana i Yeruzalem tə dza akaba ya.
Ta gwaɗawa a tar:
«Ŋgulum ki giswim a ka,
bazlam ata ka tsarakum a.»
5 Aləka i dəba ŋa ya,
gà mayahaba gər gà mburma Mbulum ana i fata ti yahayawa gər a,
ta ŋgat ndzəɗa i təv megìse ana ta gəs Yesuw a.
Dite gà asiŋ gà mburma ŋgiɗ pam,
tə sə̀kàhawaha à tar hinne kəla pat.
Sunwa a da aka Pul i Turuwas
6 Aləka i dəba ŋa ya,
tə zazəɗ i fata ya.
Ti de a aka ahəɗ Asiya.
Ta waya zləmana ka,
aà metsìkè bazlam Mbulum a gà mburma ana i fata ya mbaŋa.
Ama Mezite Mesife Mbulum aka vəl a tar vatwa aà mada a fata tsa.
Aɗaba taŋa,
tə da ndaka gà ahəɗ gà Firigiya nda Galatiya.
7 Ti ndze aka kwiye ahəɗ Misiya ka,
ta waya mede aka ahəɗ Bitiniya mbaŋa,
ama Mezite Mesife Yesuw aka vəl a tar vatwa ɓav tsa.
8 Ta gəs vatwa i fata ya,
tə da ndaka ahəɗ Misiya ata.
Tə da riŋ a Turuwas aà guva duluv i fata.
9 Aləka həvəɗ a ge ka,
sunwa a da aka Pul.
A patar à wele duwa a riŋ.
Ŋgat ka,
gà Makaduniya,
mehitse ŋa dzèŋŋe ika miɗ ŋgar.
Wele ata ka,
ŋgat a riŋ a hemeriŋa.
A gwaɗar:
«Dara,
tama aka lìdè a ma mə̀r a Makaduniya.
Ka tə zlak mə̀r te.»
10 Aləka i dəba sunwa ata a da aka Pul a ka,
mì yaha vatwa aà mede a Makaduniya tsara,
aɗaba mì sər ndzer,
Mbulum aka zal a mə̀r,
aà mezlehe bazlam ŋgwal ŋana a gà mburma ana ika ahəɗ ata ya.
Lidiya a gəs bazlam Mbulum i kwite Filipiya
11 Aɗaba taŋa,
mì hitse i fata ya tsara.
Mì tsala a slə̀làh yam.
Mì da dər a Samutarakiya a magər yam,
aɗaba kwite ata ka,
yam a ler tits.
Ndidwe ŋana ka,
mì zazəɗ i fata ya,
mì tsala aka lìdè Niyapulis.
12 Aləka mì mah ba i fata ya asa,
mì da a kwite Filipiya.
Təv ata ka,
təv ana a lah mendze a bəɗ piŋŋe ika ahəɗ Makaduniya ya,
ama gà Ruma na a kwere a tar a kəla.
Maa ndza mehinne diŋ i kwite ata.
13 A pat mesifikaba ka,
mì dara i kwite ata ya,
mì da aà guva dula duwa a riŋ i fata.
Mì dzala ka,
mì gwa,
mìi le a aà təv ana gà Yahuda ta hamawa iɗəm a Mbulum a.
Mì daha ka,
mì leha aà gà məkəs duwa a riŋ i fata,
mayahaba gər ŋa.
Mì daha a təv tar,
mì ndza a bəɗ.
Dite mì tsik a tar bazlam Mbulum.
14 Ama məkəs ŋgiɗ a riŋ ilik i liwiŋ tar,
zləm ŋa Lidiya.
A dara i kwite Tiyatira ya.
Ŋgat ka,
mala madzàwà à petek ana ŋgwal ŋa lele ya.
Ama məkəs ata ka,
a dzawa gurmits a bəɗ a Mbulum mbaŋa.
A dza zləm a dukw ana Pul a tsik a ka,
lele.
A tsahən ahər.
Dite BATSAH kwa ŋa tekeɗe,
a hə̀ndə̀kar i gəzləŋ a lele,
nda təv dukw ana a tsaraka ya.
15 Dite i dəba ŋa ya,
ti tsilwiɓ à tar a yam nda gà asiŋ gà mburma ana i ma ŋgar a tserdze.
Ama a zal a mə̀r aà mada a ma ŋgar,
a gwaɗa a mə̀r:
«Na kàa dzalum i gər kurum,
iye ka,
Yàa gəs Yesuw BATSAH kwa ŋa nda ndzer ka,
dumara,
tàkwa a ma gà.»
I dəba ŋa ya,
a ge a mə̀r kamkam hinne,
dite mì da a ma ŋgar.
Magəsa gà Pul nda Silas ana ta gasa tar i Filipiya ya
16 A pat duwa,
mə̀r ihər mìi de a a təv ata gà Yahuda ta hamawa iɗəm a Mbulum a asa ka,
mì le aà dəm duwa daala ŋa.
Dəm ata ka,
ɓele.
Ama sitene i ba ŋgar asa,
a ɗifewar à gà dukw ana a ge a ba ika miɗ mba ya.
A banawara siŋgwe à gà mburma ya hinne,
nda gà dukw ana a ɗamawa a tar a.
A dzawa a gà ɓəzla ga ŋgar.
17 A təv ana mìi de a ya ka,
a zezem a mə̀r nda gà Pul i sik a i sik a nda gà Mewideye.
A gwaɗawa i huɗ Mewideye ŋgar ata ya ka:
«Gà mburma aaha ka,
gà ɓəzla meslire Mbulum ana i gər ŋa ya.
Tar riŋ ti tsik a kurum a vatwa ana aləka ki slwim a aà mimbile dər i məməta ya ya.»
18 Mehinne diŋ,
ŋgat riŋ aà metsìkè ŋa pərra.
A ta megeha ka,
a tsəɓ a Pul hinne,
tsam ka,
a mbəɗara aba à daala ata ya,
a gwaɗa a sitene ana i ba ŋgar a:
«Iye ihər,
i gweɗek a nda zləm Yesuw Kiristi,
dara i ba daala aaha ya.»
Sitene ata a tsaraka kataya tsara ka,
a dara i ba daala ata ya.
19 Ama gà ɓəzla ga daala ata ta fə̀r,
ta ŋget a siŋgwe i təv ŋgar a asa tsəka,
tə daha,
ta gasa gà Pul nda Silas.
20 Tə da à tar a kwaskwa,
a təv gà ɓəzla seriye.
Ama gà ɓəzla seriye ata gà Ruma.
Tə daha,
ta gwaɗa a tar:
«Gà mburma aaha ka,
gà Yahuda,
ta wise a bazlam i kwite kwa.
21 Tar riŋ ti dzeŋge a bazlam ana fəla kwa a pala a kwa ahər ahəm,
a kwa ana gà Ruma ya.
Ti tsik a ka,
bazlam ana biy megìse tsiye.»
22 Gà asiŋ gà mburma ana i fata ya tserdze,
ta mbizl aaka a gà ɓəzla seriye.
Ta gwaɗa a tar:
«Kaɗəŋ,
gà wele aaha ka,
gà ŋgwal gà mburma tsa.»
Gà ɓəzla seriye aaha tə tsaraka kataya ka,
tə slər aà tar mburma,
ta gwaɗa a tar:
«Gə̀zlum tar nda megwiymbiɗ.»
Gà mburma ata tə daha,
tə ndzək petek ika gà Pul nda Silas a kwìyeɗ kwìyeɗ.
Ta gazla tar.
23 Ta gazla aba tar a ka,
tə da à tar a daŋgay.
Tə daha,
ta gwaɗa a mala makaslà ga daŋgay ata:
«Say kasla tar lele.»
24 Mala makaslà ga daŋgay aaha a tsaraka gà bazlam ata tsara ka,
a ndzək gà mburma ata sula ya,
a da à tar a ga ana i huɗ ŋa ziŋziŋ a.
A daha,
a dza a tar gà bàba dizl a sik.
25 Aləka magər və̀ɗ a ge ka,
gà wele aaha tə dza ba aà mahàmà a Mbulum,
tə zàmbaɗa dər nda dimis.
Ama gà asiŋ gà ɓəzla daŋgay ŋgiɗ ana i huɗ ga ata ya,
tə dzàha à tar zləm.
26 Zàmma tsəka,
ahəɗ ata i fata ya,
a ɓazla hinne.
Ga daŋgay ata tekeɗe,
aka à mimbezle aà mbulum a.
Biye hərmaga ŋa a handaka ba iba ya fit.
Gà tsitsirɓe gà ɓəzla daŋgay ata tserdze a ŋgazlaha ikaba ya tsara.
27 Mala makaslà ga daŋgay ata a piɗeke,
pərakw a hitse aà mbulum tsara.
A fə̀r ikaba ya ka,
gà biye hərmaga daŋgay ata kwalats kwalats mahàndàkà ŋa iɗəm a fit.
A daha,
a ndzahara masalama ŋgar i ga ya.
A waya aà mekìɗe dər ba ŋgar,
aɗaba a dzala ka,
gà ɓəzla daŋgay aaha tàa beye fit ana,
ta gweɗiŋ a ana,
meme?
28 Ama Pul a səraraha aka dukw ana a ge a ya ka,
a màraha à arəv.
A wideye nda magala hinne.
A gwaɗar:
«Ka ta kəɗ ba yak tsa,
mə̀r ɗa i faha tserdze.»
29 Wele ata a tsaraka kataya ka,
a wiz akwa,
dite a val dər a huɗ ga,
a təv ziŋziŋ ata gà ɓəzla daŋgay tə ndzawa iɗəm a.
A daha nda gà medzedzere slàɓ slàɓ slàɓ.
A daha,
a kal aba aka miɗ gà Pul nda Silas.
30 Ama a ndzəkara tar a bəra ya tsara.
A dara,
a tsam aà tar bazlam a.
A gwaɗa a tar:
«I ge a dze ana,
meme,
gà wele,
na dite i mbil a ya?»
31 Ta gwaɗar aaka:
«Gəs Yesuw BATSAH kwa ŋa nda gəzləŋ,
dite ki mbiliŋa,
kurum nda gà na i ga i ma yak a tserdze kataya mbaŋa.»
32 Aləka i dəba ŋa ya,
ti tsik a tar akaba bazlam BATSAH kwa ŋa,
a tar nda gà na i ga i ma ŋgar a tserdze.
33 Mala makaslà ga daŋgay ata a ndzək gà Pul nda Silas ndaavəɗ ŋa ata tsara.
A daha,
a bara a tar à mbəlak megìzle ana ta gazla tar a.
I fata ya tsara ka,
gà wele aaha ti tsilwiɓ à tar a yam nda gà na i ga i ma ŋgar a tserdze.
34 I dəba ŋa ya,
mala ga ata a ndzək tar a ga a ma ŋgar kuɗa.
A daha,
a vəl a tar dukw mezime.
Mala makaslà ga daŋgay ata a ŋgaya ba hinne,
nda gà na i ga i ma ŋgar a tserdze,
aɗaba ana tàa gəs Mbulum nda gəzləŋ tar a.
35 Mbulum a dəv i mèkwède ŋana tsara ka,
gà ɓəzla seriye aaha ndeɗiŋa ya,
tə sləraha mburma a təv mala makaslà ga daŋgay ata,
aà ma gwaɗar ka,
mə̀ pəl à gà Pul nda Silas.
Gà mburma ata tə daha,
ti tsiker kataya.
36 Aləka mala makaslà ga daŋgay ata a da a təv Pul,
a daha,
a gwaɗar:
«Gà ɓəzla seriye ta gweɗiŋara ka:
“Daha,
pəl à gà Pul nda Silas,
tə da.”
Kinehe ka,
i pìl à kurum ŋa,
dum nda zay lele.»
37 Ama Pul a tsaraka kataya tsara ka,
a gwaɗa a gà mburma ana tə sləraha tar a:
«Ta pìl a à mə̀r ana,
kataya tsam a?
Tàa mbər megìzle mə̀r hinne i təv are mburma tserdze ka,
kwets tàa ge seriye mə̀r ɓav tsiye.
Ta ge a à mə̀r kataya dze ana,
aàla,
tsa mə̀r ka,
gà Ruma mbaŋa te ibam a.
Araha,
tàa dza mə̀r a ga daŋgay asa.
Aɗaba la dze ya,
na dite ta pìl a à mə̀r nda akəl a?
A ge a ba kataya tsidze.
Say tar ŋa tə dara,
ta pəl à mə̀r.»
38 Gà mburma ata tə sləraha tar a,
ta mbəɗ gər à bazlam ata a təv gà ɓəzla seriye aaha.
Tə daha,
ti tsik a tar kataya.
Aləka gà mburma ata tə tsaraka kataya,
gà Pul nda Silas ka,
gà Ruma ka,
ta ge magəɗa hinne kuɗa.
39 Ta mah ba,
tə da a təv tar tsara.
Tə daha,
ta gwaɗa a tar:
«Kamkam,
pə̀lum a mə̀r à bakal mə̀r.»
Ta pə̀lara à tar i ga daŋgay ata ya kuɗa.
Ta gwaɗa a tar:
«Dum i kə̀sà mə̀r a te.»
40 Gà Pul nda Silas tə dara i ga daŋgay a lele ka,
ta mbəɗ gər a bəra Lidiya asa.
Tə daha ka,
tàa le aà gà damər tar ana ta gəs Yesuw i fata ya.
Tə daha,
ti sime à tar,
ta vəl a tar ndzəɗa a gəzləŋ lele,
dite tar ŋa tə daba dukw tar.