Ga Ɓəzla Meslire 15

Mandza akaba bazlam i Yeruzalem

1 Aləka a ta megeha i dəba ŋa ya ka, gà mburma ana ta gəs Yesuw a, tə dara ika ahəɗ Yuda ya, tə da a kwite Antakiya. Tə daha, ti dzeŋge a gà na ti ne gà damər tar a. Ta gwaɗa a tar: «Na kàa sasum ba kamala biy na məpala ahəm Musa a tsik a tsəka, ki slwim a aà mimbile i təv Mbulum tsa.» 2 Ama gà Pul nda Barnabas ta gwaɗa a tar: «Taŋa ka, pàrsa.» I dəba ŋa ya, bazlam tar ata a zla tarəra mimbètsè ahəm aka magər a. Tə dza akaba bazlam ŋgùra ŋgùra ŋgùra hinne. Aləka ta mà akaba à bazlam ika magər tar asa ka, ta gwa: «Ki slirekwe a gà Pul nda Barnabas, nda gà misle ŋgiɗ ana ɗa i kwite Antakiya ya, tə da a Yeruzalem a metsìkèha bazlam ata a gà ɓəzla meslire Mbulum nda gà bàba ŋa ana ika miɗ gà mburma Mbulum ana i fata ya tserdze, dite ka, tə̀ sàs a tarəra ikaba bazlam ŋa ya.»

3 I dəba ŋa ya, gà mburma ata ta mah ba. Gà asiŋ gà mburma Mbulum aaha ta geye a tar wusa. Dite tə da nda magər gà kwite ika ahəɗ Finikiya, nda Samariya, ti ɗeme a dər bazlam ata aà vatwa ya, a gà mburma ana ti ne gà damər tar a, meme na gà mburma ana gà Yahuda tsiye, ta mbəɗ ahəm a təv Mbulum a. Gà mburma tə tsaraka kataya tsara ka, ta ŋgaya ba hinne. 4 Aləka ti ndze a Yeruzalem ka, gà mburma Mbulum ana i fata ya, nda gà bàba ŋa ana ika magər tar a, nda gà ɓəzla meslire Mbulum tserdze ta gəs tar lele, ta geye a tar wusa hinne. Dite gà wele aaha tə ɗama tar dukw ana Mbulum a ge nda gà tar a. 5 Ama gà asiŋ gà *Farisa ana ti ne gà ɓəzla magəsa Yesuw a, ta hitse aà mbulum, dite ta gwa: «Say sasakwa gà ɓəzla magəsa Yesuw ana tar gà Yahuda tsiye, dite tə̀ dza gurmits a bəɗ a məpala ahəm Musa.»

6 Gà ɓəzla meslire Mbulum nda gà bàba ŋa ana i fata ya, ti yahaba gər aà medzè zləm a bazlam ŋa. 7 I dəba mimbètsè ahəm tar ata ya ka, Piyer a hitse aà mbulum, a gwaɗa a tar: «Gà damər gà, kà sərum ka, Mbulum a zla iye piŋŋe i liwiŋ kurum a ka, aà metsìkè bazlam ŋgwal ŋana a gà mburma ana tar gà Yahuda tsiye, dite tar ibam, tə tsaraka mbaŋa, dite ta gəs nda gəzləŋ tar. 8 Mbulum ana ŋgat a sər gəzləŋ mburma tserdze ya, na a ɗif a kwa dər ka, aka gəs gà na gà Yahuda tsiye mbaŋa, aɗaba ana a vəl a tar Mezìtè Mesife ŋgar kamala ana a vəl a kwa ya ya. 9 Aka wala ikaba tar nda gà kwa ya tsa. A pə̀lara à tar i bakal a ka, aɗaba ana tàa gəs ŋgat nda gəzləŋ ilik a. 10 Aàmala na ki nwim a bakal à Mbulum nda məfàrà ndzəɗa aka gà mburma ŋgar, dite tə zla ka, say dukw ana mibe ŋa ya ya? Araha, kwets kwa ŋa ana i gwala kwa ya tekeɗe, kà mbàkwa aà mazla ŋa tsiye. 11 Ama kwa tserdze kà sərakwa, kà mbəlakwa ana, nda ŋgwal Yesuw Kiristi tsiye. Yaw, tar tekeɗe ka, ta mbil a kataya mbaŋa.»

12 I dəba bazlam ata ya tsara ka, gà Pul nda Barnabas tə dza ba aà maɗàmà gà dukw mene à mburma ana Mbulum a ge nda gà tar ika magər gà mburma ata tar gà Yahuda tsiye. Mayahaba gər gà mburma ata tserdze ya ka, tə ndza ɗikɗik, tə dza a tar aaka zləm. 13 I təv ana tə ndəv à mifefile tar ata tsara ya ka, Zakup a zəvar ahəm, a gwaɗa a tar: «Tsarakum dukw ana i tsik a ya, gà damər gà. 14 Simun Piyer aka tsik a kwa ndeɗiŋa, meme na Mbulum à gər ŋgar ka, a pala gà mburma ana tar gà Yahuda tsiye ilik ilik i liwiŋ tar a, dite na ti ne gà mburma ŋgar a. 15 Ama bazlam Piyer ata ka, a dəɗ ka, aka vatwa ŋa kalkal, kamala na gà ɓəzla məma à guma Mbulum ti tsik i wakita Mbulum a. Aɗaba mewetse ŋa iɗəm i fata ka, 16 Mbulum a gwa:

“I dəba ŋa ya ka, i mèriŋa,

i me a à mekwere Dawda a bəra.

I zlèzl a à rəŋga ŋgar ana a mbazla ya.

Dite i me ahər a dwaɗwa ana a pətsak ihər ba ya.

17 I fata ya ka, gà asiŋ gà mburma ŋgiɗ pam

ti yehe a iye. Ama tar ka,

gà mburma ana gà Yahuda tsiye.

Zləma mburma tserdze na i zal a tar,

dite ka, ti ne gà mburma gà ya.

18 I tsik aba ya daga piŋŋe,

dukw ana i gwa, i ta ge a aka miɗ mba ya.”»

19 I dəba bazlam ata ya ka, Zakup a səkah dər aaka asa, a gwa: «Aɗaba taŋa na i dzala ka, gà mburma ana gà Yahuda tsiye, tar riŋ ta mbìɗ a à ahəm a təv Mbulum a ka, kà fàrakwa aka tar ndzəɗa nda məpala ahəm Musa tsa, ti ziweba gər tar. 20 Ama kə̀la ka, ki wetsekwe a terehe a wakita, tə ta papəɗ dukw ana ŋgwal tsiye tsa, kamala dukw ana ti zler ɗa aà matawala dər duwa ya, nda gà ta ge mezelme nda təv muva tsa, tə ta papəɗ dukw ana ta muruɗ mimwirwiɗe ya tsa, dite tə zəm məmbəz tsa asa mbaŋa. 21 Aɗaba akahər ata daga piŋŋe, gà mburma tə sər məpala ahəm Musa ata, ku mege i kwite awara. Ti dzeŋgewa a tar i gà ga mahàmà a Mbulum gà Yahuda, a pat mesifikaba.»

Wakita ana tə sləraha a gà mburma Mbulum ana

tar gà Yahuda tsiye

22 Aləka tə tsaraka kataya tsara ka, a da a gər a gà ɓəzla meslire Mbulum nda gà bàba ŋa ana ika magər gà mburma Mbulum ana i fata ya, dite nda gà asiŋ gà mburma ana i ga Mbulum a tserdze. Tə dza akaba bazlam ika magər tar, aà məpala gà mburma əŋgal i liwiŋ tar a, ti slir a tar a kwite Antakiya, ti de akaba a aà vatwa ya nda gà Pul nda gà Barnabas. Gà mburma ata tə ndzək a ka, gà Yudas ana tə zalar Barsabas a, nda Silas. Aɗaba gà mburma ata sula ya ka, gà asiŋ gà damər tar ata i ga Mbulum a, ta gəs aà tar ahəm lele. 23 Ta wetse a tar wakita ata a ahər, tə da dər. Kamala ana ta wetse ya ka, ta gwa:

«Mər mi ge a kurumaha wusa, a kurum gà damər mə̀r ana gà Yahuda tsiye, kurum riŋ mandza ŋa i gà kwite Antakiya nda gà i Siriya, dite nda gà i Kilikiya ya. Na a wetse a kurumaha wakita aaha ka, mə̀r gà ɓəzla meslire Mbulum nda gà bàba ŋa ana ika magər gà mburma Mbulum ana i faha ya. 24 Mi tsaraka ka, gà misle ŋgiɗ pam tàa daha i təv mə̀r a, tàa wise a kurum à gər nda bazlam hinne, tàa dza à kurum magəɗa. Ama bazlam tar ata ka, mə̀r tsa na a slər dərraha tar a. Tar ŋa ta walabaha gər dukw tar. 25 Aɗaba taŋa na mì dza akaba ika magər mə̀r ka, mì pala gà mburma sula, aà meslire a kurumaha ya. Ti dehe a ka, tar nda gà masla mə̀r gà Pul nda gà Barnabas 26 ana ta waya medzeye à mesife tar agəra meslire Yesuw Kiristi BATSAH kwa ŋa ya. 27 Gà na mìi slirehe a ya ka, gà Yudas nda Silas, dite ta mà a kurum dər aaka nda bazlam aka dukw ana kà tsarakum i wakita aaha ya. 28 Aɗaba mə̀r tserdze nda gà Mezite Mesife Mbulum na mì tsik akaba bazlam ŋa ya. Mì gwa, a sàs a mə̀r mìi tike aka kurum a dukw ana a be hinne ya tsa. Ama a sàs a mə̀r kə̀la ka, ki zezemwim a dukw ana a da ndaka vatwa ŋa ya. 29 Ka ta papəɗum dukw ana ŋgwal tsiye tsa, kamala dukw ana ti zler ɗa aà matawala dər duwa ya, nda gà ka zəmum məmbəz tsa, ka ta papəɗum dukw ana ta muruɗ mimwirwiɗe ya tsa, dite ki gwim mezelme nda təv muva tsa asa mbaŋa. Na kàa kaslum ba à gà dukw ata ya tserdze ya ka, taŋa ka, lele ndzer. Ndzum nda zay lele, say pat ŋgiɗ.»

30 I dəba ŋa ya, ga ɓəzla meslire ata tə slər tar a, ta mah ba, tə da a kwite Antakiya ata, tə daha, ti yaha gər a gà mburma Mbulum ana i fata ya, dite ta vəl a tar wakita ata kuɗa. 31 Gà mburma ata ta pəl dər ikaba ya, ti dzeŋge ika miɗ mburma ana i fata ya tserdze. Tə tsaraka bazlam ata kataya ka, ta ŋgaya ba hinne. Arəv a mà a taraha kuɗa. 32 I dəba ŋa ya, gà Yudas nda Silas ana tar gà ɓəzla məma à guma Mbulum a, tə ndza i fata zaakwa. Ti tsikewa bazlam Mbulum a gà damər tar ata hinne. Ta mà a taraha à arəv, dite ta ŋgat ndzəɗa i təv megìse ana ta gəs Yesuw a. 33 Tə ndza i fata zaakwa ka, ta waya məmbə̀ɗà à gər a dəba a təv gà mburma ana tə sləraha tar a fata ya. Gà damər tar ata tə daha, ta geye a tar wusa. Ta mah ba, tə da. Ta mbəɗ gər a Yeruzalem. 34 Ama a sàs a Silas ka, gər ŋgar aà mendze i fata.

35 Ama gà Pul nda Barnabas ti ze riŋ i kwite Antakiya i fata mbaŋa. Tar nda gà asiŋ gà misle ŋgiɗ hinne ti dzeŋgewa bazlam BATSAH kwa ŋa, dite ta màwa dər a mburma.

Gà Pul nda Barnabas ta vəlaba gà vatwa

36 Aləka i dəba mendze zaakwa ya ka, Pul a gwaɗa a Barnabas: «Mbə̀ɗama gər a dəba, aà məfə̀rà aka gà damər ma ana i gà kwite ana kà tamara iɗəm a i dəba, ka tsikema iɗəm bazlam BATSAH kwa ŋa ya. Kà fə̀rama aka tar, meme na tə ndza riŋ a.» 37 A sàs a Barnabas zləmana ka, aà mezle dər Yuhana Markus aà mendzwil. 38 Ama ka, Pul a waya tsa na ti zle a dər wele ata ya, aɗaba ana i huɗ mesìweye tar ana tə suwaya à bazlam Mbulum akahər ata ya ka, aka miyak à tar i Pamfiliya ilik a, dite ka, aka dəɗ aka tar, aà mazlàkà tar i təv megemir tar ana ta ge a ya asa tsiye. 39 Ta ge bazlam hinne ika magər tar. I fata ya ka, ta vəlaba gà vatwa, aɗaba bazlam ana a da a tar akaba tsiye. Gà Barnabas nda Markus tə daha, tə tsəl a slə̀làh yam, tə da dər aka ahəɗ Kipurus. 40 Ama gà Pul ka, ti de a nda Silas. Gà asiŋ gà damər tar ata i fata ya, tə daha, ti ɗif à tar ahər a Mbulum, dite ta mah ba, tə da. 41 Tə daha ka, tə da ndaka ahəɗ Siriya. Tə zazəɗ ika ahəɗ ata ya, tə da aka ahəɗ Kilikiya asa. Ta màwaha à arəv a gà mburma Mbulum ana tàa le aà tar i fata ya tserdze.