Ga Ɓəzla Meslire 14

Gà Pul nda Barnabas i Ikuniya

1 Aləka gà Pul nda Barnabas ti ndze a Ikuniya, tə da a ga mahàmà a Mbulum gà Yahuda. Tə daha, ti tsik guma Yesuw a mburma i fata mbaŋa asa. Gà mburma hinne i liwiŋ tar, ku mege gà Yahuda nda gà na tar gà Yahuda tsiye tekeɗe, ta gəs bazlam Mbulum a gəzləŋ tar lele. 2 Dite gà asiŋ gà Yahuda ana tàa gəs bazlam ata tsiye, tə slər gà na gà Yahuda tsiye, aà gà na ta gəs a, dite ka, tə dzala dukw ana ŋgwal ŋa tsiye, nda təv tar. 3 I dəba bazlam tar ata ya tserdze ka, gà Pul nda Barnabas tə ndza i fata hinne. Ti tsikewa bazlam Yesuw ka, ndərzakka lele, arəv a da à tar a tsa, aɗaba tə sər dər ka, Mbulum BATSAH kwa ŋa a riŋ nda gà tar ndzer. A vəl a tar ndzəɗa aà mege gà dukw mene à mburma hinne. A ɗif dər a mburma, à ŋgwal ŋgar ana gà Pul nda Barnabas ti tsikewa ya ka, ndzer kaɗəŋ. 4 Gà mburma ana i kwite ata ya, tə ndzək ba iba ya təv sula. Gà misle ŋgiɗ pam biy gà Yahuda, gà misle ŋgiɗ biy gà ɓəzla meslire Mbulum.

5 Ama gà Yahuda, nda gà na tar gà Yahuda tsiye, nda gà Əbay tar, ta mà akaba ahəm aà magàsà gà Pul nda Barnabas, dite ta bets a tar nda kur. 6 Gà wele aaha tə tsaraka kataya tsara ka, tə təz aba ndàra a gà kwite Listira, nda kwite Derbe. Gà kwite ata ka, ika ahəɗ Likuniya məma. 7 Ti ndzeha a fata ka, tə dza ba aà metsìkè bazlam ŋgwal ŋana a mburma. Tə sùwayawa dər a gà kwite ana a riŋ ndàra i dala ŋana ya tserdze.

Gà Pul nda Barnabas i kwite Listira

8 Ama i Listira i fata ka, wele duwa a riŋ, a ndzawa ka, i bəɗ hiywe, magàha a bəɗ ŋa i sik a. A gər ana ta wa ŋgat a ka, aka da nda sik ŋgar ilik tsa. 9 Wele ata ka, a dzawa zləm a dukw ana Pul a tsikewa ya. Pul a samata ka, wele ata a riŋ nda gà megìse i gəzləŋ ŋgar lele, a sər dər ka, Mbulum na a mbil a à iye ya. A fə̀r ahər ɗegìrgìr, 10 a gwaɗar nda magala: «Hitse, ka ndiɗe à sik yak dzeŋ lele.» Wele ata a hitse, a ndiɗe à sik ŋgar ka, lele kaɗəŋ, a yab a mbulum, a dza ba aà mede. 11 Gà mburma ana i fata ya, ta ŋgat a dukw mene à mburma ata Pul a ge ya ka, ta wideye, ta fàfəl ndaka ahəm tar gà Likuniya, ta gwa: «Gà mbulum kwa na ti neye mburma ya, dite na tə tarəra a təv kwa ya.» 12 Aɗaba gà mbulum tar ka, tàa ɗeye a tar zləm pampam. Gà biy ŋgiɗ *Dzawus, dite biy ŋgiɗ *Hermes, a ne mala sik Dzawus. Aɗaba taŋa, tə zal a Barnabas ka, Dzawus, dite tə zal a Pul ka, Hermes, aɗaba ta gwa aà Pul ka, mala sik ŋgar na à fèfil a ya. 13 Wele duwa a riŋ, mala mandəva kuɗa a Dzawus. A riŋ a ndə̀vawar kuɗa i ga ŋa, a riŋ aà vatwa ika dəba zlagam aà guva kə̀sà ata ya, aɗaba kə̀sà tar ata ka, malàwàrà ŋa tits nda zlagam, biye a da aɗəm duzuh ilik. Wele ata a daha, a ndzəkara gà mbuluv sla gà sla ya, a dza ahər mibìzè duwa, a hitse dər aka biye hərmaga zlagam ata. A sàs a tar mibetsè gà sla ata a gà Barnabas nda Pul.

14 Ama gà Pul nda Barnabas tə tsaraka kataya tsara ka, tə tayara ikaba petek tar ika ba ya, kwìyeɗ kwìyeɗ kamala megweɗe ya ka: Aàmala dze ya? Dite tar ŋa tə təz a magər gà mburma nda gà Mewideye. Tə daha, ta gwaɗa a tar: 15 «Gà wele aaha, ki gwim a kataya dze ana, aàla? Mər na Mbulum a? Mər ka, gà mburma kamala kurum a mbaŋa. Mì da a kurumara ka, à bazlam ŋgwal ŋana, dite a gweɗe a kurum a ka, miyakum à matawala gà dukw ana kù gwaɗum ka, gà mbulum kurum a, tsaatsa ki pezwimebe a za ya. Ama kà mbəɗum ahəm a təv Mbulum ana a riŋ nda gà mesife aà biybiy a. Ŋgat na a ge gəza mbulum nda gər ahəɗ, nda gà duluv, dite nda gà dukw ana ika gər ahəɗ tserdze ya. 16 Aka bəra ana a da a dəba ya ka, aka miyak à gà mburma, tə zazama vatwa tar kamala ta waya ya, dukw tar. 17 Ama ku mege ka zazamawum vatwa kurum tekeɗe, aka mbər meɗife a kurum à ŋgwal ŋgar ana a gewa a kurum a. A dze a kurumere a gà yam i gər ŋa ya ndaka vatwa ŋa tiɗe tiɗe, ki gwim a dər gà dukw mezime pampam, ki zimwimiŋa, dite ki ŋgeywim a ba.» 18 Bazlam ata gà ɓəzla meslire Mbulum ata tar riŋ ti tsik a tar a pəra. Ama tar ka, ta gəs ɓav tsa. A sàs a tar mibetse a tar dər akaba gà dukw ata hiywe, mesiwèh ta miyak dər.

19 I dəba ŋa ya, gà Yahuda duwa tə daha i kwite Antakiya ana ika ahəɗ Pisidiya ya. Gà asiŋ ŋa tə daha i kwite Ikuniya ya mbaŋa. Tə daha à mewìsè ahəm aka magər tar. Tə dza akaba tar. Ta kalawa Pul nda kur, ta kiɗ a ŋgat. I dəba ŋa ya, ta sapara ŋgat i kwite ata ya. I gər tar ka, ta gwa, aka mət. 20 Aləka gà ɓəzla magəsa Mbulum nda gəzləŋ tə daha, ti yahaba gər a təv ŋgar ka, a mà a arəv, a hitse aà mbulum, a mbəɗ gər a kə̀sà. Ndidwe ŋana ka, ta mah ba, tə da a kwite Derbe nda Barnabas.

Gà Pul nda Barnabas ta mbəɗ gər a Antakiya ana

ika ahəɗ Siriya ya

21 Aləka i dəba ŋa ya, gà Pul nda Barnabas ti tsik bazlam ŋgwal ŋana i kwite Derbe. Ama gà mburma hinne ti ne gà ɓəzla mazazama Yesuw i fata. A ta megeha i dəba ŋa ya, ta mbəɗ gər a dəba. Ti de a a Antakiya ana ika ahəɗ Pisidiya ya. Tə da nda kwite Listira nda gà Ikuniya. 22 Tə daha, ta màha à arəv a gà mburma Mbulum ana i fata ya, dite ka, ta bàs gəzləŋ, ta ŋgat ndzəɗa i təv megìse tar ana ta gəs Mbulum a. Ta gwaɗawa a tar: «Ki ta ŋgetekewe a təv mendze i mekwere Əbay Mbulum ka, ki sèwèrekwe a are hinne pampam dzekwiŋ.» 23 Ta pala mburma i gà ga Mbulum ana i fata ya ilik ilik tserdze, dite ti ne à tar gà bàba ŋa ana ika magər tar a. Ta hama a Mbulum, dite ta ge ndəra asa. I huɗ meheme tar ata ya ka, ti ɗif à gà mburma ata a ahər Mbulum ana ta gəs nda gəzləŋ tar a, dite ma kasla tar i təv megemir ŋgar ana ta ge a ya.

24 Aləka tə da nda magər kwite ika ahəɗ Pisidiya ya, tə da aka ahəɗ Pamfiliya. 25 Ti ndzeha a fata ka, ti tsik bazlam Mbulum i Perge. I dəba ŋa ya, ti zèzìɗ a a kwite Ataliya aà guva duluv. 26 I fata ya ka, ta mah ba, tə da nda slə̀làh yam, tə da a kwite Antakiya ana tə lah mesìweye iɗəm à bazlam Mbulum akahər ata ya. Aɗaba ta mbəɗ gər a fata ka, a təv tar gà mburma Mbulum ata i fata, akahər ata ti ɗif a tar à ŋgwal Mbulum ana a ge a megemir nda gà tar a. Mege megemir ata ka, tàa ndəv dər kamala ana ti tsik a tar a.

27 Ti ndzeha a fata tsara ka, ti yaha gər a gà mburma Mbulum ana i fata ya, tə ɗama a tar dukw ana Mbulum a ge nda gà tar a tserdze. Tə sər dər ka, meme na a vəl vatwa a gà mburma ana gà Yahuda tsiye, dite na ti tike madzala gà gər tar a təv Mbulum mbaŋa ya. 28 I dəba ŋa ya, gà Pul nda Barnabas tə ndza i fata nda gà mburma Mbulum ata i huɗ mehinne zaakwa ya.