Haala iidi Faltagol
16
1 Ley lewru Abib fuu, ngaɗanon Laamɗo Joomiraaɗo mooɗon iidi Faltagol sabo wo e ley lewru butaali nduun Laamɗo Joomiraaɗo mooɗon wurtinnoo on leydi Misira ley jemma. 2 Ngaɗanon Laamɗo Joomiraaɗo mooɗon kirsamaaji saabe iidi oon. Itton kirsamaaji ɗiin ley cogge mon na'i naa baali naa be'i de cakkon ɗi ley nokkuure nde o suɓoytoo faa o tabintina innde makko ndeen. 3 Wakkati iidi oon fuu, taa nyaamon ko jillaa rabilla. Ley balɗe jeɗɗi ɗeen fuu, nyaamon buuruuje ɗe ngattaaka rabilla. Buuru oon wo miccintinoowo on torra, sabo e henyaare mburtoriɗon leydi Misira. Noon ngatton faa miccitoɗon nyannde mburtinoɗon leydi Misira faa haddi balɗe mon fuu. 4 Ley balɗe jeɗɗi ɗeen fuu, taa rabilla yi'ee ley leydi mon fuu. Teewu kirsamaari cakkaandi futuro nyalaande go'aɓerde ndiin, taa accon ɗum waalta.5 Taa ngaɗon iidi Faltagol oon ley galluuje ɗe Laamɗo Joomiraaɗo mooɗon hokkata on njooɗoɗon ɗeen fuu. 6 Wo ley nokkuure nde o suɓoytoo faa o tabintina innde makko ndeen tan njeyɗon waɗude sadaka iidi oon. Ngaɗon ɗum caamal naange, hono wakkati mo mburtinoɗon leydi Misira oon. 7 Nduppon kirsamaari ndiin de nyaamon ɗum ley nokkuure nde Laamɗo Joomiraaɗo mooɗon suɓoytoo ndeen. Si weetii fu, njeccoɗon ley hukumuuji mooɗon. 8 Ley balɗe jeegom ɗeen fuu, nyaamon buuruuje ɗe njillaaka rabilla. Nyalaande jeɗɗaɓerde ndeen, ngaɗon kawrital manngal saabe Laamɗo Joomiraaɗo mooɗon. Taa ngollon fay gootum nyannde ndeen.
Haala iidi Jeɗɗiije
9 Limon jeɗɗiije jeɗɗi gilla nyannde puɗɗuɗon taƴude gese mon ndeen. 10 Caggal ɗuum ngaɗanon Laamɗo Joomiraaɗo mooɗon iidi Jeɗɗiije. Ngaddon dokke yardamuye fodde no Joomiraaɗo barkiniri on. 11 Ceyoɗon yeeso Laamɗo Joomiraaɗo mooɗon ley nokkuure nde suɓoytoo faa tabintina innde muuɗum ndeen. Ceyodoɗon e ɓiɓɓe mon worɓe e rewɓe e maccuɓe mon e horɓe mon e Lewinkooɓe jooɗiiɓe ley galluuje mon e jananɓe e atiime'en e rewɓe ɓe goriraaɓe muɓɓen maayi wonɓe hakkunde mooɗon. 12 Miccitoɗon on laatakeno maccuɓe leydi Misira. Tinnoɗon e ɗowtanaade jamirooje ɗeen de ngaɗon ko mbi'i.
Haala iidi Tenndeeje
13 Ngaɗiron iidi Tenndeeje balɗe jeddi, wakkati timminɗon taƴude gese mon e inabooje mon. 14 Ceyoɗon wakkati hiiro ngoon onon e ɓiɓɓe mon rewɓe e worɓe e maccuɓe mon e horɓe mon e Lewinkooɓe jooɗiiɓe ley galluuje mon e jananɓe e atiime'en e rewɓe ɓe goriraaɓe muɓɓen maayi wonɓe ley galluuje mooɗon. 15 Ngaɗiron iidi oon balɗe jeɗɗi saabe Laamɗo Joomiraaɗo mooɗon ley nokkuure nde suɓoytoo ndeen sabo o barkinan gese mon e golleeji mon fuu. Ndeen on ceyoto seyo manngo.
16 Worɓe leydi mon fuu kawrita yeeso Laamɗo Joomiraaɗo mooɗon ley nokkuure nde suɓoytoo ndeen kile tati ley hitaande fuu. Ɓe njaha toon wakkati iidi Buuruuje ɗe njillaaka rabilla e iidi Jeɗɗiije e iidi Tenndeeje. Taa ɓe njaha yeeso Joomiraaɗo juuɗe ɓole. 17 Mono e maɓɓe fuu hokka ko waawi fodde no Laamɗo Joomiraaɗo mooɗon barkiniri ɗum.
No sarotooɓe kaani ngollira
18 Ley galluuje ɗe Laamɗo Joomiraaɗo mooɗon hokkata on fuu, cuɓoɗon sarotooɓe e ardiiɓe faa kokkira goonga e laaɓal hakkunde lenyi mon fuu. 19 Taa oonyon goonga, taa wooda mo njinnganton ley sariya. Taa njaɓon njeenaari to sareteeɓe sabo njeenaari na wumna saahiiɓe, na ɗala dartiiɓe goonga. 20 Tinnoɗon e filaade dartaare faa mbuuron de njeyton leydi ndi Laamɗo Joomiraaɗo mooɗon hokkata on ndiin.
Ko Joomiraaɗo haɗi