Nyannde iidi Faltagol
12
1 Joomiraaɗo wi'i Muusaa e Haaruuna katin nder leydi Misira:2 — Wo lewru ndu kam laatantoo on arandeeru hakkunde lebbi fuu.
3 Njehee kaalanee kawrital yimɓe Israa'iila fuu mbi'on ɗum'en: Nyalaande sappoɓerde nder lewru ndu, ɓaade fuu ittana yimɓe muuɗum jawgel maa damngel. 4 Si tawii yimɓe ɓaade neɗɗo ina pamɗani dammuccere muɓɓere fu, ɓe kawta e wondiiɓe maɓɓe ɓuruɓe ɓattaade ɓe fodde yimɓe ɓaade ndeen. Ɓe cennda dammuccere ndeen hakkunde maɓɓe fodde ko mono fuu waawi nyaamude. 5 Sanaa tawee jawgel ngeel maa damngel ngeel walaa laru, tawee du ngel waɗii hitaande. Itton dammuccere ndeen hakkunde ɓiɓɓe baali maa be'i. 6 Kiilnoɗon nde faa nyannde 14 lewru ndu. Ndeen futuro majjum yimɓe Israa'iila fuu kirsa dammucce cuɓaaɗe ɗeen. 7 Ɓe itta ƴiiƴam majje, ɓe mooyta seraaji dammbuɗe e tiiɗe majje ɗo ɓe nyaamata ɗe ɗoon. 8 Ley jemma oon, ɓe nduppa teewu nguun, ɓe nyaamda ngu e buuru mo wattaaka rabilla e haakooji kaaɗuɗi. 9 Taa nyaamon teewu nguun tawee wo ngu keccu maa njongaangu. Nduppidon ngu e hoore e koyɗe e teketti fuu. 10 Taa accon ko heddotoo e maggu ɗuum waalta. Ammaa si won ko heddii faa weeti fu, mbulon ɗum. 11 Inan no nyaamroton ngu: Kaɓɓoɗon kaɓɓorɗe mooɗon, ɓornoɗon paɗe mooɗon, njogoɗon cabbi mooɗon. Karoɗon, nyaamon law. Wo ɗum iidi Faltagol ndi Joomiraaɗo. 12 Jemma oon mi rewan ley leydi Misira, mi waran afoojo ley mayri fuu, gilla e tagaaɓe faa yaha e kulle. Noon ngaɗiranmi sariyaaji am dow allaaji Misira fuu. Miin woni Joomiraaɗo. 13 Ƴiiƴam ɗam mooytoton e dammbuɗe mooɗon ɗaam laatanto on maande dow cuuɗi mooɗon ɗo ngonɗon. Ɗo njiimi ƴiiƴam ɗaam fu, mi faltoto. Ndeen masiiba kalkoowo oon hewtataako on wakkati piyanmi leydi Misira ndeen.
14 Nyalaande ndeen laatanto on nyalaande miccintinoore on. On ngaɗanan kam miin Joomiraaɗo weltaare iidi mawɗo. Ndi laatanto on yamiroore heddotoonde ley jamaanuuji garooji faa abada.
Iidi buuru mo wattaaka rabilla
15 Balɗe jeɗɗi nyaamirton buuru mo wattaaka rabilla. Nyannde arandeere ndeen, itton rabilla tawaaɗo ley cuuɗi mon fuu. Sabo neɗɗo nyaamuɗo buuru gattaaɗo rabilla hakkunde nyalaande arandeere e nyalaande jeɗɗaɓerde ndeen fu, ittete hakkunde lenyol Israa'iila. 16 Nyalaande arandeere ndeen e nyalaande jeɗɗaɓerde ndeen, ngaɗon kawrital ceniingal. Ley balɗe ɗeen on ngaɗataa fay gootum. Ammaa mono e mooɗon fuu defa ko nyaamata tan. 17 Ngaɗon weltaare iidi Buuru mo wattaaka rabilla, sabo wo nyalaande majjum pay mburtinammi jama'aaje mooɗon nder leydi Misira geɓe geɓe. Miccitoɗon nyalaande ndeen ley jamaanuuji garooji faa abada. 18 Ley lewru go'aɓurdu nyannde 14 mayru kiiral naange faa yaha 21 mayru kiiral naange, nyaamon buuruuje ɗe ngattaaka rabilla. 19 Ley balɗe jeɗɗi taa rabilla tawee ley cuuɗi mooɗon fey, sabo neɗɗo fuu nyaamuɗo buuru gattaaɗo rabilla, si joomum wo janano naa Israa'iilankeejo, o ittete ley kawrital Israa'iila. 20 On nyaamataa fay huunde ko wattaa rabilla. Ley to njooɗiɗon fuu, ko walaa rabilla tan nyaamoton.
Haala iidi Faltagol arandeeri
21 Ndeen Muusaa noddi mawɓe Israa'iila fuu, wi'i ɗum'en: Njehee ittanowee cuuɗi mooɗon jawgel maa damngel, kirson koy saabe iidi Faltagol. 22 Itton liccoy haakorooji lekki mbi'eteeki hisop, cuuwon koy nder le'e gonduɗe e ƴiiƴam, de mbiccon ɗam dow tiiɗe dammbuɗe mooɗon e seraaji majje. De taa fay gooto mooɗon wurtoo suudu muuɗum faa ɗo weeti. 23 Ndeen, nde Joomiraaɗo ƴuurata ɗoon faa fiya yimɓe Misira fu, yi'an ƴiiƴam e tiiɗe dammbuɗe e seraaji majje. O faltoto, o accataa kalkoowo oon naata cuuɗi mooɗon de fiya wara on. 24 Onon e ƴuwdi mooɗon, ɗum laatanto on yamiroore faa abada. 25 Nde naatoyɗon nder leydi ndi Joomiraaɗo aadii hokkude on ndiin fu, ngaɗon iidi ndi. 26 Si sukaaɓe mooɗon ƴamii on ko waɗi oɗon ngaɗa ndi fu, 27 mbi'on ɗum'en: «Wo kirsamaari ngaɗanaandi Joomiraaɗo nyannde iidi Faltagol. Nde yimɓe Israa'iila ngonnoo leydi Misira ndeen, Joomiraaɗo faltii cuuɗi muɓɓen, de fiyiri yimɓe Misira maayde. Enen kaa, o danni en.»
Wooɗi yimɓe Israa'iila fuu kippii, cujidani Joomiraaɗo. 28 Caggal ɗuum ɓe njehi, ɓe ngaɗiri noon. Ɓe ngaɗi huunde fuu ko Joomiraaɗo yamirnoo Muusaa e Haaruuna.
Maayde afooɓe nder leydi Misira
29 Hakkunde jemma, Joomiraaɗo fiyi, wari afoojo fuu ley leydi Misira, gilla afo Fira'awna kaananke Misira jooɗiiɗo dow laamu mum faa e afooɓe uddaaɓe ley kasu e ko arti rimeede ley kulle fuu. 30 Fira'awna ummii ley jemma kam e gollooɓe muuɗum e yimɓe Misira fuu. Wullaango manngo waɗi ley Misira sabo walaa fuu suudu ndu maayɗo waɗaay e muuɗum.
31 Ley jemma oon, Fira'awna noddi Muusaa e Haaruuna, wi'i ɗum'en:
— Ummee mburtee hakkunde yimɓe am, onon e yimɓe Israa'iila. Njehee teddinowee Joomiraaɗo hono no ŋaaroriɗon noon. 32 Kooƴee dammuuli mooɗon e na'i mooɗon hono no mbiiruɗon, de ndillon. Ŋaaroɗon Laamɗo mooɗon barkina kam miin du.
33 Yimɓe Misira ndunƴi yimɓe ɓeen ndilla law leydi muɓɓen sabo ɓe miilii ɓe fuu ɓe maayan. 34 Yimɓe Israa'iila kooƴi conndi muɓɓen ndi ndiibunoo de ngattaay rabilla ndiin. Ɓe ngatti diibirɗe maɓɓe ley kaddule maɓɓe, ɓe mbakkii. 35 Yimɓe Israa'iila ngaɗi ko Muusaa yamirnoo ɗum'en: Ɓe ndookii yimɓe Misira gineeji gaɗiraaɗi kaŋŋe e cardi e kaddule. 36 Joomiraaɗo waɗi ɓe keɓi moƴƴere yeeso yimɓe Misira. Ɓeen kokki ɓe ko ɓe ndookii fuu. Noon Israa'iila'en teetiri Misirankooɓe.
No yimɓe Israa'iila mburtorii leydi Misira.
37 Yimɓe Israa'iila ummii Ramses faa njehi Sukot. Limgal maɓɓe wo ɓe worɓe ujunaaje keme jeegom (600 000), baka rewɓe e sukaaɓe walaa. 38 Ɓe njaadi e dammuuli e na'i keewɗi. Jamaa siiyiiji feereeji du njaadi e maɓɓe. 39 Ɓe kooƴi conndi ndiibaandi ndi ɓe kooƴunoo gilla e Misira ndiin, ɓe ca'i ndi, ɓe ngaɗi buuruuje daɓɓe ɗe ngattaaka rabilla. Ɓe keɓaay doomude faa ɓe ngatta rabilla ley conndi ndiibaandi ndiin sakko ndi ƴuufa, sabo ɓe ndiiwaama ley Misira, wooɗi du ɓe mbaawaay hooƴande ko'e maɓɓe njooɓaari.
40 Duuɓi 430 yimɓe Israa'iila njooɗorii nder leydi Misira. 41 Nde duuɓi 430 ɗiin kiɓɓunoo fu, ley nyalaande majjum pay jama'aaje Joomiraaɗo fuu mburtorii leydi Misira geɓe geɓe. 42 Ley jemma oon fuu, Joomiraaɗo doomi, ndaari faa wurtina yimɓe muuɗum ley leydi Misira. Noon du yimɓe Israa'iila ndoomirta ley jemmaare ndeen e jamaanuuji garooji, sabo jemmaare ndeen wo Joomiraaɗo jeyi nde.
Yamiroore dow iidi Faltagol
43 Joomiraaɗo wi'i Muusaa e Haaruuna:
— Inan yamiroore dow iidi faltagol: Janano fay gooto waawaa nyaamude nyaamdu mayri. 44 Maccuɗo coodaaɗo, si tawii wo taadaaɗo fu, ina waawi nyaamude. 45 Beero naa adaaɗo gollal fuu waawaa nyaamude ndi. 46 Ɗum nyaamete ley suudu wooturu. On mburtintaa teewu nguun yaasin. On kelataa fay ƴi'al gootal e maggu. 47 Kawrital Israa'iila fuu sanaa waɗa iidi ndi. 48 Si won janano jiɗɗo weltaare iidi Faltagol fu, tilay worɓe tawaaɓe ley suudu muuɗum fuu taadee. Ndeen imo waawi warude o waɗa iidi ndiin hono no Israa'iilankooɓe noon. Mo taadaaka fuu waawaa nyaamude ɗum. 49 Yamiroore nde wo wootere, inde wonani ɓii wuro e janano gonɗo hakkunde mooɗon fuu.