Suɓagol e senndude afooɓe
13
1 Joomiraaɗo haaldi e Muusaa wi'i:2 — Senndanam afo fuu ley Israa'iila. Ko arti rimeede fuu, gilla afooɓe yimɓe faa yaha e kulle, wo miin jeyi.
Iidi buuru mo wattaaka rabilla
3 Ndeen Muusaa wi'i yimɓe ɓeen:
— Miccoɗon nyalaande nde, wo nyalaande nde mburtiɗon Misira, ley leydi maccungaaku, sabo wo junngo Joomiraaɗo semmbiɗingo wurtini on. Taa nyaamee huunde fuu ko wattaa rabilla. 4 Hannden ley lewru wi'eteendu Abiibu* mburtotoɗon. 5 Joomiraaɗo hunanakeno maamiraaɓe mooɗon hokkan on leydi Kanaaninkooɓe e Hitiyankooɓe e Amorinkooɓe e Hewinkooɓe e Yebusinkooɓe, leydi ndi kosam e njuumndi ilata e muuɗum. Nde Joomiraaɗo nanni on toon fu, ngaɗon iidi ndiin nder lewru nduun. 6 Sabo ley balɗe jeɗɗi on nyaaman buuru mo wattaaka rabilla. Ley nyalaande jeɗɗaɓerde ndeen, on ngaɗan weltaare iidi Joomiraaɗo. 7 Ley ɓalde jeɗɗi ɗeen fuu, nyaamon buuru mo wattaaka rabilla. Taa buuru gattaaɗo rabilla yi'ee, taa rabilla du yi'ee ley leydi mooɗon fuu. 8 Nyannde iidi ndiin, pillanoɗon ɓiɓɓe mooɗon, mbi'on ɗum'en: Min ngaɗii ɗum saabe ko Joomiraaɗo waɗani min nyannde nde min mburtinoo Misira ndeen. 9 Iidi ndiin laatanto on huunde miccintinoore on, hono maande dow juuɗe mooɗon e dow tiiɗe mooɗon. Noon jamirooje Joomiraaɗo ngonan e kunnduɗe mooɗon sabo kanko wurtini on nder leydi Misira e junngo makko semmbiɗingo. 10 Ndelle ndeenon iidi ndiin ley hitaande fuu si wakkati muuɗum warii.
Haala dow afooɓe
11 Muusaa ɓeydi wi'i:
— Si Joomiraaɗo nannii on nder leydi Kanaaninkooɓe de hokki on ndi hono no hunoraninoo on, onon e maamiraaɓe mooɗon noon fu, 12 cakkanon mo afooɓe mooɗon e ko arti rimeede hakkunde kulle mooɗon fuu. Joomiraaɗo kam jeyi afo gorko fuu. 13 Ɓinngel araawa artaangel rimaa fuu, loomtinon ɗum jawgel maa damngel, maa kelon hoore maggel, mbaron ngel. Ɓiɓɓe mooɗon afooɓe worɓe du fuu ndimɗinanon kam ɗum'en.
14 Ndeen le, ley ko warata, si ɓiɓɓe mooɗon ƴamii on maanaa majjum fu, mbi'on ɗum'en: «Wo Joomiraaɗo wurtiri min e baawɗe muuɗum mawɗe ley leydi Misira nder wuro maccungaaku. 15 Nde Fira'awna salinoo yoppude min min ndilla ndeen, Joomiraaɗo wari afoojo gorko fuu tawaaɗo nder leydi Misira gilla e tagaaɓe faa e kulle. Saabe ɗuum waɗi de miɗen cakkana Joomiraaɗo kullel gorel artaangel rimaa hakkunde kulle fuu. Ammaa afooɓe amin kaa wo min ndimɗinan ɗum'en. 16 Kirsamaaji ɗiin laatoto maande dow juuɗe mooɗon e dow tiiɗe mooɗon. Ɗi miccintinan wo junngo Joomiraaɗo semmbiɗingo wurtini on leydi Misira.»
No Laamɗo e hoorem ardorii yimɓe Israa'iila
17 Nde Fira'awna yoppunoo yimɓe Israa'iila ndilla ndeen, Laamɗo ƴuurinaay ɓe laawol dewoowol leydi Filisti'en, fay si wo kanngol ɓuri ɓadaade. Sabo Laamɗo wi'i: si yimɓe ɓeen nji'ii woldeeji fu, ina mbaawi mimsitinde, de njeccoo Misira.
18 Saabe ɗuum Laamɗo ƴuurini ɓe laawol laddewol faro maayo Maaliya. Yimɓe Israa'iila mburtii nder leydi Misira ina cegilii hono yahooɓe wolde.
19 Wooɗi Muusaa hooƴi ƴi'e Yuusufi du sabo oon wi'iino sakiraaɓe muuɗum:
— Sikke walaa, Laamɗo warowan walla on. Kunanee kam yalla on ndillidan e ƴi'e am.
20 Yimɓe Israa'iila ndilli Sukot, njehi koɗi Etam ɗakkol ladde yoornde. 21 Nyalooma fuu Joomiraaɗo ina ardii ɓe ley ruulde nanndunde e bimmbeere faa holla ɓe laawol. Jemma du imo ardoo ɓe ley iilde yiite nanndunde e bimmbeere faa yaynana ɓe. Ɗum waɗi de iɓe mbaawi yaade jemma e nyalooma fuu. 22 Ruulde ndeen seedataa e maɓɓe nyalooma, iilde ndeen du seedataa e maɓɓe jemma, iɗe ngoni yeeso maɓɓe wakkati fuu.