Lewinkooɓe i

Dewtere Lewinkooɓe

Hoore haala

Lewinkooɓe woni dewtere Tawreeta Muusaa tataɓerde. Nde inndiraama Lewinkooɓe sabo wo lenyol Lewi ngool Joomiraaɗo suɓii faa laatoo gollooɓe golle diina. Hakkunde Lewinkooɓe ɓeen du, wo ƴuwdi Haaruuna o suɓii faa laatoo almaami'en yottinooɓe sadakaaji Israa'iilankooɓe.

Nde Joomiraaɗo wurtinnoo Israa'iilankooɓe leydi Misira ndeen, hokkii ɓe jamirooje e sariyaaji dow waamnde Sinayi. O yamirii ɓe nyiɓa Hukum Ceniiɗo ɗo keesuwal amaana makko joƴƴintee. Wo ley hukum oon o hawrannoo e Muusaa faa o holla ɗum muuyɗe makko. O yamiri sadakaaji ngaɗee. O hokki jamirooje feere feere dow:

— No kirsamaaji e nyaamri cakkirtee (Suura 1 faa 7),

— No Haaruuna e ɓiɓɓe muuɗum ceninirtee faa laatoo almaami'en yottinooɓe sadakaaji yimɓe Israa'iila (Suura 8 faa 10),

— No ko laaɓi senndirtee e ko harmi, e no ko tuuni laaɓinirtee (Suura 11 faa 15),

— Nyalaande Mooytugol Hakkeeji (Suura 16),

— No Israa'iilankooɓe, lenyol makko ngool kaani mbuurda yeeso makko, kanko Joomiraaɗo, Laamɗo muɓɓen oon. (Suura 17 faa 27).

Sadakaaji ɗi haala muɓɓen haaletee ley dewtere ndee ɗiin na miccintina en Leggal Palaangal, to Iisaa Almasiihu e hoore muuɗum laatanii hooliiɓe ɗum fuu kirsamaari kiɓɓundi, ndi ƴiiƴam muuɗum mooytata hakkeeji (ndaaru \xt Ibraninkooɓe 9:11-14).