Dewtere Lewinkooɓe
No sadaka buleteeɗo waɗirtee
1
1 Joomiraaɗo noddi Muusaa ley hukum Ceniiɗo wi'i ɗum:Si gooto mooɗon na haajaa waɗande Joomiraaɗo sadaka kirsamaari fu, itta ndi ley daabaaji muuɗum mawɗi maa pamari.
3 Si kirsamaari ndiin wo nagge fu, tawee wo ngaari ndi walaa malal. Ndi waddee dammbugal hukum Ceniiɗo faa ndi laatoo sadaka belɗo Joomiraaɗo. 4 Gaɗoowo sadaka oon yowa junngo muuɗum dow hoore mayri faa sadaka oon jaabee de hakkeejim mooytee. 5 O hirsa ngaari ndiin yeeso Joomiraaɗo. Ɓiɓɓe Haaruuna, almaami'en ngadda ƴiiƴam mayri, mbicca piilol sakkirde wonnde dammbugal hukum Ceniiɗo ndeen. 6 Kirsamaari mbuleteendi ndiin huttee waɗee taƴe taƴe. 7 Ɓiɓɓe Almaami Haaruuna kuɓɓa yiite dow sakkirde ndeen de njowa leɗɗe dow mayre. 8 Ɓe ndeka kuse e hoore e ɓellere mayri fuu dow leɗɗe yiite sakkirde ndeen. 9 Kujje reedu e kolce mayri fuu lootee de almaami wula ɗum'en dow sakkirde ɗoon. Wo ɗum sadaka buleteeɗo, dokkal ngal uurngol muuɗum weli Joomiraaɗo.
10 Si sadaka buleteeɗo oon wo daaba pamaro hono mbaalu maa mbeewa fu, joomum itta ndamndi maa njawdiri ndi walaa malal. 11 Ndi hirsee yeeso Joomiraaɗo soɓɓirre sakkirde ndeen de ɓiɓɓe Haaruuna mbicca ƴiiƴam mayri piilna nde. 12 O waɗa teewu mayri taƴe taƴe de almaami yowa taƴe ɗeen e hoore e ɓellere mayri fuu dow yiite sakkirde ndeen. 13 Kujje reedu e kolce mayri lootee de almaami wula ɗum'en dow mayre. Wo ɗum sadaka buleteeɗo, dokkal ngal uurngol muuɗum weli Joomiraaɗo.
14 Si sadaka buleteeɗo oon wo foondu fu, joomum itta ndu ley nyaabe maa buugaali muuɗum. 15 Almaami wadda ndu dow sakkirde, ɓoyla hoore mayru faa taƴa de wula nde dow yiite sakkirde ndeen. O waɗa ƴiiƴam mayru sirƴo dow wecco sakkirde ndeen. 16 Caggal ɗuum o taƴa dummoodu mayru de o itta kujje reedu mayru fuu o faɗɗa ɗakkol sakkirde ndeen faro lettugal ɗo ndoondi ɓelle rufetee ɗoon. 17 Ndu feccee hakkunde bippeele, tawa ndu senndaaka de almaami wula ndu dow leɗɗe dekiiɗe dow yiite sakkirde ndeen. Wo ɗum sadaka buleteeɗo, dokkal ngal uurngol muuɗum weli Joomiraaɗo.