No sadaka conndi waɗirtee
2
1 Si neɗɗo na haaja sakkande Joomiraaɗo conndi fu, sey tawa wo ɗaatundi. O watta ndi nebbam de o ɓeyda ure ɗakke daneeje. 2 Ndi waddee to ɓiɓɓe Haaruuna, almaami'en ɓeen. Almaami gooto nokka conndi ɗaatundi ngattaandi nebbam ndiin tambannde junngo, tawta ure ɗeen fuu, de faɗɗa ɗum dow yiite sakkirde ndeen. Wo ɗum maande sadaka, dokkal ngal uurngol muuɗum weli Joomiraaɗo. 3 Ko heddii e conndi ndiin fuu wo ngeɗu Haaruuna e ɓiɓɓe muuɗum. Wo ɗum ngeɗu ceniingu sanne, ƴuurungu e sadakaaji Joomiraaɗo.4 Si tawii wo sadaka conndi banngal ko duppetee fu, ɗum laatoo conndi ɗaatundi e buuruuje e maasaaje jooraaɗe nebbam ɗe njillaaka rabilla. 5 Si tawii wo ɗum sadaka ko sa'ira ca'irgal du, ɗum laatoo conndi ɗaatundi ɓoosidaandi e nebbam ndi jillaaka rabilla. 6 Ɗum waɗee pecce pecce de nebbam jooree dow majjum. Wo ɗum sadaka conndi. 7 Si tawii wo sadaka ko sa'iraa nebbam ley fayande du, ɗum laatoo conndi ɗaatundi ɓoosidaandi e nebbam. 8 Ngaddanaa Joomiraaɗo sadaka moƴƴinaaɗo oon to almaami faa yaara ɗum dow sakkirde. 9 Almaami oon itta seeɗa e sadaka conndi oon de wula ɗum dow sakkirde ndeen. Wo ɗum maande sadaka mo uurngol muuɗum weli Joomiraaɗo. 10 Ko heddii e sadaka oon fuu wo Haaruuna e ɓiɓɓe muuɗum njeyi. Wo ɗum ngeɗu ceniingu sanne sabo ɗum ƴuurii e sadakaaji Joomiraaɗo.
11 Ko laatii sadaka conndi fuu jeyaa jilleede rabilla. Taa ngaɗanon Joomiraaɗo sadakaaji jillaaɗi rabilla maa njuumndi. 12 Oɗon mbaawi sakkande mo ko artii ɓenndude e gese mon, ammaa taa ɗum wulee dow sakkirde hono no sadaka mo uurngol belngol mo noon. 13 Sadaka conndi gaddeteeɗo yeeso Joomiraaɗo fuu na tilsi wattee lamɗam sabo lamɗam ɗaam wo maande amaana hakkunde mon e Laamɗo mooɗon. Taa ɗam nyaka watteede e sadakaaji ɗiin fuu. Nde ngaddoton sadaka conndi fuu, ngaddidon e lamɗam.
14 Si wo ko artii ɓenndude e gese mon kaajaɗon waɗande Joomiraaɗo sadaka fu, sey nduppon butaali ɗiin de ngarson gabbe majji. 15 Ngatton ɗum nebbam de ɓeydon ure. Wo ɗum sadaka conndi. 16 Ndeen almaami ittana Joomiraaɗo maande ley sadaka oon, ɗuum woni seeɗa gabbe garsaaɗe ɗeen e seeɗa nebbam ɗaam e ure ɗeen fuu de wula ɗum. Wo ɗum sadaka Joomiraaɗo.