No sadaka dewral waɗirtee
3
1 Si neɗɗo na haajaa waɗude daaba mawɗo sadaka dewral fu, sey wadda ngaari maa nagge rewe yeeso Joomiraaɗo, tawa walaa malal. 2 O yowa junngo makko dow hoore magge de o hirsa nge dammbugal hukum Ceniiɗo. Ɓiɓɓe Haaruuna, almaami'en mbicca ƴiiƴam magge piilol sakkirde ndeen. 3 Gooto e almaami'en ɓeen itta ɓellere fiiliinde kujje reedu e ko takkondiri e muɓɓen fuu de wulana ɗum Joomiraaɗo, 4 kanjum e ɓooƴe ɗiɗi ɗeen e ɓellere fiiliinde ɗum'en e takkiinde e heeyre magge fuu. 5 Ɓiɓɓe Haaruuna mbula ɗum fuu dow yiite leɗɗe kuɓɓooje dow sakkirde ɗo sadaka buleteeɗo oon dekaa ɗoon. Wo ɗum sadaka mo uurngol muuɗum weli Joomiraaɗo.6 Si tawii wo daaba pamaro joomum haajaa waɗande Joomiraaɗo sadaka dewral du, nde wo gorel maa dewel fu, sey tawa walaa malal. 7 Si wo mbaalu fu, o wadda ngu yeeso Joomiraaɗo, 8 o yowa junngo makko dow hoore maggu de o hirsa ngu dammbugal hukum Ceniiɗo. Ɓiɓɓe Haaruuna, almaami'en mbicca ƴiiƴam maggu dow piilol sakkirde ndeen. 9 Ɓellere maggu fuu ittee: ɗuum woni laccol maggu fuu gilla fuurude, tawta ɓellere fiiliinde kujje reedu e ko takkondiri e muuɗum fuu de wulanee Joomiraaɗo. 10 Kanjum e ɓooƴe ɗiɗi ɗeen e ɓellere fiiliinde ɗum'en e takkiinde e heeyre, ko ittidetee e ɓooƴe ɗuum. 11 Almaami suurtina ɗum fuu dow sakkirde ndeen. Wo ɗum sadaka Joomiraaɗo.
12 Si tawii wo mbeewa joomum haajaa sakkude du, wadda nga yeeso Joomiraaɗo. 13 O yowa junngo makko dow hoore magga de o hirsa nga dammbugal hukum Ceniiɗo. Ɓiɓɓe Haaruuna, almaami'en mbicca ƴiiƴam magga dow piilol sakkirde ndeen. 14 Ndeen o sakkana Joomiraaɗo ɓellere fiiliinde e kujje reedu e ko takkondiri e muɓɓen e 15 ɓooƴe ɗiɗi ɗeen e ɓellere fiiliinde ɗum'en e nde buttuli e takkiinde e heeyre ittideteende e ɓooƴe ɗeen. 16 Almaami suurtina ɗum fuu dow sakkirde ndeen. Wo ɗum sadaka mo uurngol muuɗum weli Joomiraaɗo. Ko laati ɓellere fuu, wo ngeɗu Joomiraaɗo. 17 Wo ɗum yamiroore nde ɗowtantoɗon ley jamaanuuji e to njooɗoyiɗon fuu. Ko laatii ɓellere e ƴiiƴam fuu, on njeyaa nyaamude ɗum.