No sadaka yaafeede waɗirtee
No sadaka yaafeede Almaami mawɗo waɗirtee
4
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe mbi'aa ɗum'en: Si neɗɗo luttii jamirooje ɗe Joomiraaɗo hokki de waɗi ko haɗaa, tawi hensaaki fu, inan no ngaɗoton:
3 Si wo Almaami mawɗo, ceniraaɗo nebbam oon lutti de ronndi yimɓe fuu hakke fu, sey waɗa sadaka ngaari ndi walaa malal yeeso Joomiraaɗo saabe yaafeede hakke muuɗum oon. 4 O wadda ngaari ndiin yeeso Joomiraaɗo dammbugal hukum Ceniiɗo. O yowa junngo makko dow hoore mayri de o hirsa ndi yeeso Joomiraaɗo. 5 Almaami oon itta ƴiiƴam mayri yaara ley hukum oon. 6 O suuwa honndu makko nder ƴiiƴam ɗaam de o misa dow ridoo hukum oon kile jeɗɗi yeeso Joomiraaɗo. 7 O wuja ƴiiƴam ɗaam dow luwe sakkirde ure wonnde ley hukum yeeso Joomiraaɗo ndeen. O rufa ƴiiƴam keddiiɗam ɗaam dow joƴƴinirde sakkirde sadaka buleteeɗo wonnde dammbugal hukum Ceniiɗo ndeen. 8 O itta ɓellere kirsamaari sadaka yaafeede ndiin fuu. Ɗum woni ɓellere fiiliinde kujje reedu e ko takkii e muɓɓen fuu, 9 tawta ɓooƴe ɗiɗi ɗeen e ɓellere fiiliinde ɗum'en e nde buttuli e takkiinde e heeyre ittideteende e ɓooƴe ɗiɗi ɗeen. 10 Ɗum waɗiree hono no ngaari sadaka dewral noon. Almaami wula ɗe dow sakkirde sadakaaji buleteeɗi ndeen. 11 Nguru e teewu e hoore e kolce tawti kujje reedu e coowoori e 12 ko heddii e mayri fuu yaaree yaasin hoɗorde ley nokkuure laaɓunde to ndoondi ɓelle rufetee toon de wulee dow leɗɗe kuɓɓooje dow tilde ndoondi ndiin.
No sadaka yaafeede jamaare Israa'iila fuu waɗirtee
13 Si tawii wo yimɓe Israa'iila fuu lutti de ngaɗi ko haɗaa ley jamirooje Joomiraaɗo, tawi kensaaki, wooɗi du paamaay ngaɗii hakke fu, ɓe ngaɗii junuuba. 14 Nde ɓe paaminowaa ɗum fu, sey ɓe ngadda ngaari sadaka yaafeede dammbugal hukum Ceniiɗo. 15 Mawɓe Israa'iila njowa juuɗe muɓɓen dow hoore mayri de gooto muɓɓen hirsa ndi yeeso Joomiraaɗo. 16 Almaami ceniraaɗo nebbam itta ƴiiƴam mayri yaara ley hukum Ceniiɗo. 17 O suuwa honndu makko nder majjam de o misa dow ridoo hukum oon kile jeɗɗi yeeso Joomiraaɗo. 18 O wuja ɗam dow luwe sakkirde wonnde yeeso Joomiraaɗo ley hukum oon. O rufa ƴiiƴam keddiiɗam ɗaam dow joƴƴinirde sakkirde sadaka buleteeɗo wonnde naarude hukum oon. 19 O itta ko laati ɓellere fuu de o wula ɗum dow sakkirde ndeen. 20 O waɗa ngaari ndiin hono no o waɗiri ndi sadaka yaafeede ndiin noon pay. Noon almaami oon waɗirta sadaka yaafeede faa hakkeeji maɓɓe mooytee de ɓe njaafee. 21 O yaara ko heddii e mayri fuu yaasin hoɗorde de o wulowa ɗum toon hono no artiindi ndiin noon. Wo ɗum sadaka yaafeede hakkeeji jamaare Israa'iila fuu.
No sadaka yaafeede ardiiɗo waɗirtee
22 Si wo ardiiɗo yimɓe lutti wootere ley jamirooje dow ko Joomiraaɗo, Laamɗo muuɗum haɗi, tawi hensaaki fu, heɓii junuuba. 23 Wakkati o faaminowa o luttii fu, sey o wadda sadaka ndamndi ndi walaa malal. 24 O yowa junngo makko dow hoore mayri de o hirsa ndi yeeso Joomiraaɗo dow nokkuure ɗo sadakaaji buleteeɗi cakketee. Wo ɗum sadaka yaafeede hakkeeji. 25 Almaami suuwa honndu muuɗum nder ƴiiƴam mayri de wuja dow luwe sakkirde sadakaaji buleteeɗi ndeen. O rufa keddiiɗam ɗaam du dow joƴƴinirde sakkirde ndeen. 26 Ko laati ɓellere e mayri fuu, o wula ɗum dow sakkirde ndeen hono no sadaka dewral noon. Almaami waɗana o noon faa hakkeeji makko mooytee de o yaafee.
No sadaka yaafeede Israa'iilanke gooto waɗirtee
27 Si wo gooto ley jamaare ndeen lutti de waɗi ko jamirooje Joomiraaɗo kaɗi tawi hensaaki fu, waɗii junuuba. 28 Wakkati o faaminowa o luttii fu, sey o wadda mbeewa ndewa nga walaa malal saabe sadaka yaafeede hakke oon. 29 O yowa junngo makko dow hoore magga de o hirsa nga yeeso Joomiraaɗo ley nokkuure ɗo sadakaaji buleteeɗi cakketee ɗoon. 30 Almaami suuwa honndu muuɗum nder ƴiiƴam magga de wuja dow luwe sakkirde sadakaaji buleteeɗi ndeen. O rufa keddiiɗam ɗaam dow joƴƴinirde sakkirde ndeen. 31 O itta ko laatii ɓellere e magga fuu, hono no sadaka dewral noon de o wula ɗum dow sakkirde ndeen. Ɗum laatoo sadaka mo uurngol muuɗum weli Joomiraaɗo. Noon almaami waɗiranta joomum faa hakkeeji muuɗum mooytee de yaafee.
32 Si tawii gaɗuɗo hakke oon wo mbaalu muuyi waddude du, wadda mbaalu ndewu ngu walaa malal. 33 O yowa junngo makko dow hoore maggu de o hirsa ngu ley nokkuure ɗo sadakaaji buleteeɗi cakketee. 34 Almaami suuwa honndu muuɗum nder ƴiiƴam maggu de wuja dow luwe sakkirde sadakaaji buleteeɗi ndeen. O rufa keddiiɗam ɗaam dow joƴƴinirde mayre. 35 O itta ko laatii ɓellere e maggu fuu hono no sadaka dewral noon de o wula ɗum dow sadakaaji Joomiraaɗo. Noon Almaami waɗiranta o faa hakkeeji makko mooytee de o yaafee.