No sadaka yaafeede hakkeeji feere feere waɗirtee
5
1 Si ceedoriiɗo goɗɗum yitere maa naanruɗo nowru muuɗum noddaama sariya de jaɓaay wi'ude na anndi tiiri majjum fu, saaminii hakke dow hoore muuɗum. 2 Si neɗɗo meemii ko laaɓaa hono huunde ladde waatunde nde laaɓaa, maa daaba maraaɗo mo laaɓaa maa huunde ladoore e leydi nde laaɓaa, fay si tawi hensaaki, joomum waɗii junuuba, laatake tuunɗo. 3 Katin, si neɗɗo meemii tuundi goɗɗo, mbaawndi tuuninde ɗum; ko ndi laatii fuu, fay si hensaaki, nde warowi faami fu, waɗii junuuba. 4 Si neɗɗo taykaaki de hunii waɗan ko wooɗi maa ko boni maa hunayeere fuu nde neɗɗo hunorii rafi hakkillo, nde warowi faamii hunakeno fu, waɗii junuuba. 5 Gaɗuɗo gootel e majji fuu, sey haalta hakke mo waɗi oon. 6 Na tilsi joomum wadda sadaka mbeewa ndewa maa mbaalu ndewu yeeso Joomiraaɗo saabe njoɓdi hakke mo waɗi oon. Almaami waɗana joomum sadaka yaafeede de hakke muuɗum mooytee.No sadaka yaafeede talkaaɓe waɗirtee
7 Si tawii joomum walaa baawɗe waddude sadaka daaba pamaro yeeso Joomiraaɗo faa hakke muuɗum oon mooytee fu, sey wadda nyaabe ɗiɗi maa buugaali ɗiɗi. Gootel waɗee sadaka yaafeede, keddiingel du, sadaka buleteeɗo. 8 O yaara ɗi to almaami, de oon artoo ɓoyla daande waɗeteendu sadaka yaafeede nduun yeeso Joomiraaɗo. Ammaa taa o taƴa hoore mayru. 9 O rufa seeɗa ƴiiƴam mayru dow wecco sakkirde ndeen, keddiiɗam ɗaam du, dow joƴƴinirde mayre. Wo ɗum sadaka yaafeede. 10 O waɗa heddiindu nduun sadaka buleteeɗo fodde no yamiraa. Noon Almaami waɗiranta o faa hakkeeji makko mooytee.
11 Si tawii joomum walaa baawɗe waddude buugaali ɗiɗi ɗiin maa nyaabe ɗiɗi ɗeen du, wadda conndi ɗaatundi kilooji tati saabe sadaka yaafeede. Taa o watta ndi nebbam maa ure sabo wo ndi conndi sadaka yaafeede. 12 O yaara ndi to almaami de oon itta ndi tambannde junngo muuɗum hono maande de suurtina dow yiite sakkirde, dow sadakaaji Joomiraaɗo ɗiin. Wo ɗum sadaka yaafeede. 13 Noon Almaami waɗiranta o faa hakke makko mooytee. Ko heddii fuu, wo almaami oon jeyi hono no sadaka conndi noon.
No sadaka njoɓdi hakke waɗirtee
14 Joomiraaɗo haaldi e Muusaa wi'i:
15 — Si neɗɗo bonnirii amaana Joomiraaɗo e jogitaade ko haanuno hokkeede Joomiraaɗo de tawi hensaaki fu, sey wadda sadaka njawdiri ndi walaa malal. Coggu mayri hiisoree buuɗi cardi nokkuure seniinde. Ndi laatoo sadaka njoɓdi hakke makko oon. 16 Katin o ɓeyda dow coggu njawdiri njoɓdi hakke ndiin mbuuɗu ngootu dow buuɗi joy fuu de o hokka ɗum Almaami. Almaami waɗirana o njawdiri ndiin sadaka njoɓdi hakke faa hakke makko oon mooytee de o yaafee.
17 Si neɗɗo luttii wootere e jamirooje Joomiraaɗo de waɗi ko haɗaa tawi hensaaki fu, hakke oon saaman dow hoore muuɗum. 18 Ndelle sey joomum wadda njawdiri ndi walaa malal to almaami saabe njoɓdi hakke oon. Coggu mayri hiisoree buuɗi cardi nokkuure seniinde. Almaami waɗirana o njawdiri ndiin sadaka faa hakke mo o waɗi de o hensaaki oon mooytee. 19 Wo ɗum sadaka njoɓdi hakke sabo neɗɗo oon na wondunoo e hakke yeeso Joomiraaɗo.
20 Joomiraaɗo haaldi e Muusaa wi'i:
— 21 Si neɗɗo bonnirii amaana Joomiraaɗo e fenande banndum dow huunde fukkinaande maa nyamlaande maa wujjaande faa jamboo ɗum, 22 maa e yiitude huunde lallunoonde de fena wi'a yiitaay ɗum, maa hunaade dow fewre maa e hakke mo ɓii Aadama waawi waɗude fuu, 23 si neɗɗo luttirii hono noon fu, sey hokkita huunde nde wujjunoo ndeen maa nde teetunoo ndeen maa lallunoonde de yiiti ɗum ndeen maa nde nyamlinoo ndeen maa fukkinanoonde ndeen, 24 maa huunde fuu nde hunorii fewre dow muuɗum. O yoɓa ɗum faa laaɓa de o ɓeyda dow njoɓdi majjum mbuuɗu ngootu dow buuɗi joy fuu. O yoɓa joomum nyannde o waɗata sadaka njoɓdi hakke ndeen. 25 O wadda to almaami sadaka njoɓdi hakke makko oon, ɗum woni njawdiri ndi walaa malal fodde no yamiraa. 26 Ndeen Almaami waɗana o sadaka yeeso Joomiraaɗo faa hakke makko laatiiɗo fuu mooytee de o yaafee.