No sadaka buleteeɗo waɗirtee
6
1 Joomiraaɗo haaldi e Muusaa wi'i:— 2 Njamiraa Haaruuna e ɓiɓɓe muuɗum mbi'a ɗum'en: Inan yamiroore dow sadaka buleteeɗo: Sadaka buleteeɗo oon heddoo dow yiite sakkirde ndeen ley jemma oon fuu faa weeta. Yiite ngeen heddoo na huɓɓa. 3 Almaami ɓornoo saayo muuɗum nyootiraango leppi ɗaatuɗi de duwoo sarrayel ley nyootiraangel leppi ɗaatuɗi. O ɓoɓta ndoondi sadaka oon ley sakkirde ndeen de o henna ndi sera mayre. 4 Caggal ɗuum o ɓortoo kaddule ɗe o ɓorninoo ɗeen de o ɓornoo goɗɗe. O yaara ndoondi sadaka bulaaɗo ndiin yaasin hoɗorde ley nokkuure laaɓunde. 5 Yiite sakkirde ndeen heddoo na huɓɓa, taa nge nyifa. Subaka fuu almaami sukka nge leɗɗe de yowa sadaka buleteeɗo oon. O wula ɓelle kirsamaaji sadaka dewral dow magge. 6 Yiite ngeen heddoroo noon na huɓɓa dow sakkirde ndeen. Taa nge nyifa faa abada.
No sadaka conndi waɗirtee
7 Inan yamiroore dow sadaka conndi: Ɓiɓɓe Haaruuna ngadda ndi ɗakkol sakkirde yeeso Joomiraaɗo. 8 Almaami itta conndi ɓoosidaandi e nebbam ndiin tambannde junngo tawta ure gaddidaaɗe e sadaka ɗeen fuu de wula ɗum dow sakkirde ndeen. Wo ɗum maande sadaka mo uurngol muuɗum weli Joomiraaɗo. 9 Ko heddii e majjum fuu, laatoo nyaamdu Haaruuna e ɓiɓɓe muuɗum. Taa ɗum nyaamidee e rabilla. Ɓe nyaama ɗum ley nokkuure seniinde nder galle hukum Ceniiɗo oon. 10 Taa ɗum defidee e rabilla. Wo ɗum ngeɗu ngu kokkumi ɓe, ittaangu e sadakaaji am. Wo ɗum huunde seniinde sanne hono no sadaka yaafeede e mo njoɓdi hakke noon. 11 Gorko jeyaaɗo e ƴuwdi Haaruuna fuu na waawi nyaamude ɗum. Ɗum laatoo yamiroore nde ɗowtantoɗon ley jamaanuuji fuu bangal sadakaaji gaɗanteeɗi Joomiraaɗo. Meemuɗo ɗum fuu laatoto ceniiɗo.
12 Joomiraaɗo haaldi e Muusaa wi'i:
— 13 Inan dokkal ngal Haaruuna e ɓiɓɓe muuɗum ngaddata yeeso am gilla nyannde ɓe ceninirtee nebbam ndeen: Kilooji tati conndi ɗaatundi saabe sadaka gaɗeteeɗo nyannde fuu oon. Feccere subaka, feccere futuro. 14 Conndi ndiin ɓoosidee e nebbam de defiree piirugal maasa. Ndi waɗee pecce pecce de ndi sakkee hono sadaka conndi mo uurngol muuɗum weli Joomiraaɗo. 15 Almaami gooto hakkunde ɓiɓɓe Haaruuna ceniniraaɗo nebbam faa loomta ɗum kam waɗata sadaka oon. Wo ɗum yamiroore Joomiraaɗo nde ɗowtantoɗon faa abada. Ɗum fuu ɗum wulee. 16 Ko almaami sakkata bangal conndi fuu wo wulete. Ɗum nyaamataake.
No sadaka yaafeede waɗirtee
17 Joomiraaɗo haaldi e Muusaa wi'i:
— 18 Mbi'aa Haaruuna e ɓiɓɓe muuɗum: Inan yamiroore dow sadaka yaafeede. Ɗo sadakaaji buleteeɗi kirsetee ɗoon, ndi sadaka yaafeede ndiin du hirsetee yeeso Joomiraaɗo. Wo ɗum huunde seniinde sanne. 19 Almaami gaɗuɗo sadaka yaafeede oon, kam jeyi nyaamude ɗum. Ɗum nyaamee ley nokkuure seniinde nder galle hukum Ceniiɗo oon. 20 Meemuɗo teewu kirsamaari ndiin fuu laatoto ceniiɗo. Si ƴiiƴam mayri meemii kaddungal fu, sey ɗo ɗam meemi ɗoon lonnee ley nokkuure seniinde. 21 Si teewu nguun defiraama fayande loope fu, sey nde fusee. Si wo fayande njamndi ngu defiraa du, lootee de saƴƴitee faa laaɓa. 22 Worɓe jeyaaɓe e almaami'en na mbaawi nyaamude ɗum sabo wo ɗum huunde seniinde sanne. 23 Ammaa kirsamaaji sadaka yaafeede ɗi ƴiiƴam muɓɓen nannetee ley hukum Ceniiɗo faa mooytiree hakke ɗiin kaa nyaamataake. Wo e yiite ɗi paɗɗete.