Lewinkooɓe 7

1 Inan yamiroore dow sadaka njoɓdi hakke. Wo ɗum huunde seniinde sanne. 2 Ɗo kirsamaaji buleteeɗi kirsetee ɗoon, ndi njoɓdi hakke ndiin du hirsetee. Ƴiiƴam mayri wiccee piilol sakkirde ndeen. 3-4 Ko laati ɓellere tawta laccol e ɓellere fiiliinde kujje reedu e ɓooƴe ɗiɗi ɗeen e ɓellere fiiliinde ɗum'en e ɓellere buttuli e takkiinde e heeyre ittideteende e ɓooƴe ndeen fuu ittee. 5 Almaami wula ɗum dow sakkirde. Wo ɗum sadaka Joomiraaɗo, sadaka njoɓdi hakke. 6 Gorko jeyaaɗo e almaami'en fuu na waawi nyaamude ɗum. Ɓe nyaama ɗum ley nokkuure seniinde sabo wo ɗum huunde seniinde sanne. 7 Jamirooje dow sadaka njoɓdi hakke e mo yaafeede fuu wo gootum. Teewu majji fuu wo almaami gaɗuɗo sadaka oon jeyi.

Ngeɗu

8 Si almaami na yottinana goɗɗo sadaka kirsamaari mbuleteendi fu, wo kam jeyi nguru mayri. 9 Ko laatii sadaka conndi, nde wo ko jonngaa maa ko sa'aa maa ko duppaa fuu wo almaami jottinɗo sadaka oon jeyi. 10 Ammaa sadaka conndi ɓoosidaandi e nebbam e njoorndi fuu wo ngeɗu ɓiɓɓe Haaruuna. Ɗum feccee hakkunde maɓɓe faa fota.

Yamiroore dow sadaka dewral

11 Inan yamiroore dow sadaka dewral gaddeteeɗo yeeso Joomiraaɗo. 12 Si neɗɗo na haajaa waɗude sadaka oon saabe yettoore Joomiraaɗo fu, sey waddida ɗum e buuruuje gaɗiraaɗe conndi ɓoosidaandi e nebbam ɗe njillaaka rabilla e maasaaje jooraaɗe nebbam ɗe njillaaka rabilla e buuruuje gaɗiraaɗe conndi ɗaatundi ɓoosidaandi e nebbam. 13 Katin o ɓeyda buuruuje jillaaɗe rabilla dow sadaka dewral gaɗeteeɗo saabe yettoore Joomiraaɗo oon. 14 Ley sii sadakaaji gaddaaɗi ɗiin fuu o ittana Joomiraaɗo buuruure wootere. Wo ɗuum woni ngeɗu almaami biccuɗo ƴiiƴam kirsamaari dewral oon. 15 Teewu sadaka dewral ɗuum woni kirsamaari saabe yettoore Joomiraaɗo ndiin fuu nyaamee nyannde sakkaa ndeen. Taa faa'e waala.

16 Si tawii wo sadaka saabe aadi maa yardamuye fu, teewu muuɗum nyaamee nyannde sakkaa ndeen. Si heddake du, na waawi nyaameede jaangoore muuɗum. 17 Ammaa ko hedditii faa waali balɗe ɗiɗi fu, sey wulee. 18 Si teewu nguun nyaamaama nyalaande tataɓerde ndeen fu, gadduɗo sadaka oon jaabantaake sabo sadaka oon laatake ko laaɓaa. Nyaamuɗo o fu, saaminii hakke dow hoorem. 19 Si teewu nguun meemi ko laaɓaa fu, nyaamataake, wo wulete. Neɗɗo laaɓuɗo fuu na waawi nyaamude teewu sadaka. 20 Ammaa si mo laaɓaa nyaami teewu sadaka dewral cakkanaaɗo Joomiraaɗo fu, sey ittee e suudu bammum. 21 Hono noon du, meemuɗo tuundi, ko ndi laati fuu, nde wo tuundi tagaaɗo maa daaba mo laaɓaa maa goɗɗum feere tuunɗum nyiddiniiɗum de nyaami teewu kirsamaari dewral cakkanaandi Joomiraaɗo, ittirtee e suudu bammum.

Jamirooje dow ko Israa'iilankooɓe njeyaa nyaamude

22 Joomiraaɗo haaldi e Muusaa wi'i:

— 23 Kaaldaa e Israa'iilankooɓe, mbi'aa ɗum'en: Taa nyaamon ɓellere nagge maa mbaalu maa mbeewa. Ko laatii ɓellere fuu taa nyaamon ɗum. 24 Ɓellere daaba caaɗuɗo maa mo kujje ladde ceeki na waawi gollitoreede goɗɗum ammaa on njeyaa nyaamude ɗum. 25 Si neɗɗo nyaami ɓellere kirsamaari cakkanaandi Joomiraaɗo fu, sey ittee e suudu bammum. 26 Taa nyaamon ƴiiƴam ko ɗam laatii fuu, nde wo ƴiiƴam foondu maa daaba, on njeyaa nyaamude ɗum to njooɗoyiɗon fuu. 27 Nyaamuɗo ƴiiƴam, ko ɗam laati fuu, sey ittee e suudu bammum.

28 Joomiraaɗo haaldi e Muusaa wi'i:

— 29 Kaaldaa e Israa'iilankooɓe mbi'aa ɗum'en: Si neɗɗo na waɗa sadaka dewral fu, ittana Joomiraaɗo ngeɗu ley sadaka oon. 30 O waddira ɓellere sadakaaji Joomiraaɗo ndeen e juuɗe makko. O waddida nde e doomre mayri. O ɓanta doomre ndeen yeeso Joomiraaɗo. 31 Almaami wula ɓellere ndeen dow sakkirde. Doomre ndeen du, wo Haaruuna e ɓiɓɓe muuɗum njeyi. 32 Ley sadakaaji mooɗon dewral fuu, almaami jeyi busal nyaamal. 33 Ɓii Haaruuna gadduɗo ƴiiƴam e ɓellere kirsamaari sadaka dewral oon jeyi busal nyaamal ngaal. 34 Ley sadakaaji dewral ɗi Israa'iilankooɓe ngaddata ɗiin du, wo miin jeyi doomre ɓanteteende e busal cenndeteengal ngaal fuu. Mi hokkii ɗum almaami Haaruuna e ɓiɓɓe muuɗum faa ɗum laatoo ngeɗu muɓɓen ley ko Israa'iilankooɓe cakkata fuu faa abada. 35 Wo ɗuum woni ko almaamaaku Haaruuna e ɓiɓɓe muuɗum kokki ɗum'en dow sadakaaji gaddanteeɗi Joomiraaɗo gilla nyannde ɓe ngaɗaa almaami'en ndeen. 36 Kanjum woni ko Joomiraaɗo yamiri Israa'iilankooɓe kokka ɓe nyannde ɓe ceninirtee nebbam ndeen. Wo ɗum yamiroore nde ɓe ɗowtantoo ley jamaanuuji fuu.

37 Ndee woni yamiroore dow sadaka kirsamaaji bulanteeɗi Joomiraaɗo e sadaka conndi e sadaka yaafeede e mo njoɓdi hakke e gaɗeteeɗo wakkati naatugol gollal almaamaaku e sadaka dewral, 38 fodde no Joomiraaɗo wi'iri Muusaa dow waamnde Sinayi nyannde yamirnoo Israa'iilankooɓe ngadda dokke muɓɓen yeeso muuɗum ley ladde Sinayi ndeen.