No Haaruuna e ɓiɓɓe muuɗum ceniniraa
8
1 Joomiraaɗo haaldi e Muusaa wi'i:— 2 Ngaddaa Haaruuna e ɓiɓɓe muuɗum de kooƴaa kaddule e nebbam ceninirɗam e ngaari sadaka yaafeede e jawɗi ɗiɗi e hanndeere buuruuje ɗe njillaaka rabilla. 3 Kawrondinaa jamaare Israa'iila fuu dammbugal hukum Ceniiɗo.
4 Muusaa waɗi ko Joomiraaɗo yamiri ɗuum. Jamaare Israa'iila fuu hawriti dammbugal hukum Ceniiɗo ɗoon. 5 Muusaa wi'i ɓe:
— Inan ko Joomiraaɗo yamiri: 6 O ɓattini Haaruuna e ɓiɓɓe muuɗum, o looti ɓe. 7 O ɓorni Haaruuna forgo de o haɓɓani ɗum kaɓɓorgol. O ɓorni ɗum saayo ɗiɗaɓo. Katin, o dekani ɗum saayo deketeengo ngoon de o haɓɓiri ngo kaɓɓorgol maggo. 8 Muusaa ɓorni mo basel almaamaaku na dekii dow ɓernde makko. O watti «Urim» e «Tumim»* ley basel ngeel. 9 Muusaa hippi hufuneere dow hoore makko de takki beɗel kaŋŋe ceniingel faro tiinde maggol fodde no Joomiraaɗo yamirnoo noon.
10 Muusaa hooƴi nebbam ceninirɗam misi dow hukum Joomiraaɗo e ko woni e muuɗum fuu. O senini ɗum ɗum fuu. 11 O misi ɗam dow sakkirde ndeen kile jeɗɗi de o senini nde kayre e ko woni e mayre fuu. O misi ɗam dow taasawal manngal bi'eteengal Maayo ngaal e dow joƴƴinirde muuɗum, o senini ɗum. 12 O rufi nebbam ceninirɗam ɗaam dow hoore Haaruuna, o senini ɗum.
13 Muusaa ɓattini ɓiɓɓe Haaruuna, ɓorni ɓe forgooji, haɓɓani ɓe kaɓɓorɗi de hippi ɓe kufuneeje fodde no Joomiraaɗo yamirnoo ɗum noon.
14 O ɓattini ngaari sadaka yaafeede de Haaruuna e ɓiɓɓe muuɗum ndeki juuɗe muɓɓen dow hoore mayri. 15 Muusaa hirsi ndi, itti ƴiiƴam mayri, suuwi honndu muuɗum nder majjam de wuji dow luwe sakkirde ndeen senini ɗum. O rufi keddiiɗam ɗaam dow joƴƴinirde sakkirde ndeen faa o laaɓina ɗum. 16 O itti ɓellere fiiliinde kujje reedu mayri e takkiinde e heeyre e ɓooƴe ɗiɗi ɗeen e ɓellere muɓɓen de o wuli ɗum fuu dow yiite sakkirde ndeen. 17 Ko heddii e mayri, ɗuum woni nguru e teewu e coowoori fuu o wulowi ɗum ley yiite yaasin hoɗorde ndeen fodde no Joomiraaɗo yamirnoo mo noon.
18 O ɓattini njawdiri sadaka buleteeɗo de Haaruuna e ɓiɓɓe muuɗum ndeki juuɗe muɓɓen dow hoore mayri. 19 Muusaa hirsi ndi de wicci ƴiiƴam mayri dow piilol sakkirde ndeen. 20 O waɗi ndi taƴe taƴe. O wuli kuse ɗeen e hoore e ɓellere mayri fuu. 21 O lootiri kujje reedu e kolce ɗeen fuu ndiyam de o wuli njawdiri ndiin fuu dow sakkirde ndeen. Ɗum laatii sadaka buleteeɗo mo uurngol muuɗum weli Joomiraaɗo fodde no yamirnoo Muusaa noon.
22 Muusaa ɓattini njawdiri ɗiɗaɓirdi ceninirteendi almaami'en ndiin. Haaruuna e ɓiɓɓe muuɗum ndeki juuɗe muɓɓen dow hoore mayri. 23 Muusaa hirsi ndi de itti ƴiiƴam mayri wuji dow mbaggudi nowru Haaruuna nyaamru e dow honndu muuɗum wordu ndu junngo nyaamo e ndu koyngal nyaamal. 24 Ndeen o ɓattini ɓiɓɓe Haaruuna, o wuji ƴiiƴam dow mbaggudi noppi muɓɓen nyaami e dow kolli muɓɓen gori ɗi juuɗe nyaame e koyɗe nyaame. O hooƴi keddiiɗam ɗaam o wicci dow piilol sakkirde ndeen.
25 O itti ɓellere e laccol e ɓellere fiiliinde kujje reedu e takkiinde e heeyre, tawti ɓooƴe ɗiɗi ɗeen e ɓellere muɓɓen e busal nyaamal. 26 O itti buuruure nde jillaaka rabilla e buuruure waɗiraande nebbam e maasaare ley hanndeere buuru mo jillaaka rabilla jooɗiinde yeeso Joomiraaɗo ndeen. O deki ɗe dow ɓelle ɗeen e busal nyaamal ngaal. 27 O watti ɗum fuu e juuɗe Haaruuna e ɓiɓɓe muuɗum de ɓe ɓanti ɗum yeeso Joomiraaɗo. 28 Ndeen Muusaa jaɓi ɗum e juuɗe maɓɓe de wuli ɗum dow sakkirde dow kirsamaari mbuleteendi ndiin. Ɗum laatii sadaka ceninoowo, mo uurngol muuɗum weli Joomiraaɗo. 29 Muusaa hooƴi doomre mayri de ɓanti ɗum yeeso Joomiraaɗo. Kanjum woni ngeɗu makko fodde no Joomiraaɗo yamirnoo.
30 Muusaa adi nebbam ceninirɗam e ƴiiƴam ngonnooɗam dow sakkirde ɗaam de misi dow Haaruuna e kaddule muuɗum e ɓiɓɓe muuɗum e kaddule muɓɓen. Noon o seniniri Haaruuna e kaddule muuɗum tawti ɓiɓɓe muuɗum e kaddule muɓɓen.
31 Muusaa wi'i Haaruuna e ɓiɓɓe muuɗum:
— Njonngon teewu nguun naarude hukum Ceniiɗo. Wo ɗoon du, nyaamoton ngu kanngu e buuru gonɗo ley hanndeere seniinde ndeen fodde no Joomiraaɗo yamiri Muusaa nde wi'unoo: wo Haaruuna e ɓiɓɓe muuɗum njeyi nyaamude ngu. 32 Ko heddii e teewu nguun e buuru oon fuu, mbulon ɗum ley yiite. 33 Keddoɗon naarude hukum ɗoon faa waala balɗe jeɗɗi. Taa ndillon ɗoon faa nde balɗe ɗe ceninirteɗon ɗeen kiɓɓi. Ɗum woni balɗe jeɗɗi. 34 Ko waɗaa hannden ɗuum, wo Joomiraaɗo yamiri ceninireɗon noon faa mooyta hakkeeji mooɗon. 35 Keddoɗon naarude hukum Ceniiɗo ɗoon balɗe jeɗɗi, jemma e nyalooma, ɗowtanoɗon jamirooje makko faa keɓon mbaawon gollande o tawee ɗum warataa on. Wo ɗuum njamiraami mi waɗa.
36 Haaruuna e ɓiɓɓe muuɗum ngaɗi ko Joomiraaɗo yamiri ɗum'en e hunnduko Muusaa fuu.