No Haaruuna e ɓiɓɓe muuɗum puɗɗiri golle muɓɓen almaamaaku
9
1 Nyalaande jeetataɓerde majjum, Muusaa noddi Haaruuna e ɓiɓɓe muuɗum tawti mawɓe Israa'iila. 2 O wi'i Haaruuna:— Kooƴaa ga'el gaɗeteengel sadaka yaafeede e njawdiri ngaɗeteendi sadaka buleteeɗo tawa ɗi ɗiɗi fuu ɗi ngalaa malal de ngaddaa ɗi yeeso Joomiraaɗo. 3 Caggal ɗuum mbi'aa Israa'iilankooɓe ngadda ndamndi sadaka yaafeede tawta ga'el ndunnguwel e jawgel ndunnguwel tawa koy ngalaa malal de ngaɗon koy sadaka buleteeɗo. 4 Ɓe ngadda ngaari e njawdiri sadaka dewral faa kirsee yeeso Joomiraaɗo. Ɓe ɓeyda sadaka conndi ɓoosidaandi e nebbam sabo wo hannden Joomiraaɗo ɓanganta on. 5 Ɓe ngaddi ko Muusaa yamiri ɗuum fuu naarude hukum Ceniiɗo ɗoon. Jamaare Israa'iila fuu wari darii yeeso Joomiraaɗo. 6 Muusaa wi'i:
— Inan ko Joomiraaɗo yamiri ngaɗon faa teddeengal muuɗum ɓangana on.
7 Ndeen Muusaa wi'i Haaruuna:
— Ɓattoɗaa sakkirde de cakkaa kirsamaari maaɗa sadaka yaafeede e mbulanteendi Joomiraaɗo faa ɗum laatoo ko mooytata hakke maaɗa aan e yimɓe Israa'iila fuu. Caggal ɗuum, ɓattinaa sadaka yimɓe ɓeen de ngaɗanaa ɗum'en noon faa hakkeeji muɓɓen mooytee fodde no Joomiraaɗo yamiri.
8 Haaruuna ɓattii sakkirde ndeen de hirsi ga'el sadaka yaafeede hakkeeji muuɗum kam e hoorem. 9 Ɓiɓɓe makko ɓattinani mo ƴiiƴam kirsamaari ndiin. O suuwi honndu makko e majjam, o wuji dow luwe sakkirde ndeen de o rufi keddiiɗam dow joƴƴinirde mayre. 10 O wuli ɓellere takkiinde e ɓooƴe e heeyre kirsamaari yaafeede ndiin fuu dow sakkirde ndeen fodde no Joomiraaɗo yamirnoo Muusaa noon. 11 Ammaa teewu e nguru mayri fuu o wulowi ɗum'en yaasin hoɗorde ndeen.
12 O hirsi kirsamaari mbuleteendi ndiin. Ɓiɓɓe makko ɓattinani mo ƴiiƴam mayri de o wicci ɗam dow piilol sakkirde ndeen. 13 Ɓe kokki o kuse e hoore mayri, o wuli ɗum fuu dow yiite sakkirde ndeen. 14 O looti kujje reedu e kolce mayri, o yowi ɗum'en dow kuse mayri de o wuli ɗum fuu dow sakkirde ndeen.
15 Ndeen o ɓattini sadaka yimɓe Israa'iila. Ɗum woni ndamndi sadaka yaafeede hakkeeji yimɓe ndiin. O hirsi ndi de o sakki ndi hono no o waɗirnoo e arandeeri ndiin noon. 16 O ɓattini sadaka buleteeɗo de o sakki ɗum fodde no o yamiraa. 17 O waddi sadaka conndi. O nokki ndi tambannde junngo de o wuli ndi dow yiite sakkirde ndeen, tawti sadaka buleteeɗo gaɗeteeɗo subaka fuu oon. 18 O hooƴi ngaari ndiin e njawdiri ndiin o waɗani jamaare Israa'iila sadaka dewral. Ɓiɓɓe makko ɓattinani mo ƴiiƴam majji. O itti ɗam o wicci dow piilol sakkirde ndeen. 19 Ammaa ɓelle majji e laci majji e ɓelle piiliiɗe kujje deedi majji e ɓooƴe e ɓelle takkiiɗe keenye majji kaa, 20 o deki ɗum'en dow dome majji de o wuli ɓelle ɗeen fuu dow yiite sakkirde ndeen. 21 Haaruuna ɓanti dome majji e buse nyaame yeeso Joomiraaɗo fodde no Muusaa wi'iri ɗum noon.
22 Caggal ɗuum, o hucciti e yimɓe, o ɓanti juuɗe makko o barkini ɗum'en. O jippii tawi o timminii sakkude kirsamaaji sadaka yaafeede e sadaka dewral ɗiin fuu.
23 Muusaa e Haaruuna naatidi ley hukum Ceniiɗo. Nde ɓe mburtinoo fu, ɓe mbarkini jamaare ndeen. Wakkati oon teddeengal Joomiraaɗo ɓangi yeeso yimɓe ɓeen fuu. 24 Yiite wurtii yeeso Joomiraaɗo, nyaami kirsamaari ndiin e ɓelle ɗeen fuu dow sakkirde ndeen. Nde yimɓe ɓeen nji'unoo ɗum fu, kilinii, kippii e leydi.