No Nadabu e Abihu maayiri
10
1 Nadabu e Abihu, ɓiɓɓe Haaruuna kooƴi mono fuu ɓoɓtirgal muuɗum ƴulɓe. Ɓe kuɓɓi yiite de ɓe njoori ure. Noon ɓe ngaddiri yiite nge ɓe njamiraaka yeeso Joomiraaɗo. 2 Wakkati oon yiite ƴuuri e Joomiraaɗo, nyaami ɓe. Ɓe maayi yeeso muuɗum.3 Muusaa wi'i Haaruuna:
— Joomiraaɗo haaliino haala majjum nde wi'unoo: Miin Joomiraaɗo, mi ndaardee mi ceniiɗo hakkunde ɓattotooɓe kam. Lenyol ngool fuu teddina kam.
Haaruuna heddii na deƴƴinii. 4 Muusaa noddi Misayel e Elsafan ɓiɓɓe Ujjiyel bappaanyo Haaruuna wi'i ɗum'en:
— Ɓattee, adon sakiraaɓe mon ɗakkol nokkuure seniinde ndee de njaaron ɓe yaasin hoɗorde. 5 Ɓe ɓattii ɓe kooƴi maayɓe ɓeen, ɓe njaari ɗum'en yaasin hoɗorde ndeen na ɓoornii saayooji muɓɓen almaamaaku fodde no Muusaa yamirnoo noon. 6 Muusaa wi'i Haaruuna e ɓiɓɓe muuɗum Eliyajar e Itamar:
— Taa piirton ngaasaaji mooɗon, taa ceekon kaddule mooɗon saabe mettorgal de ɗuum saabanoo on maayde, wooɗi du pooɗanon jamaare ndee fuu tikkere Joomiraaɗo mawnde. Wo sakiraaɓe mooɗon lenyol Israa'iila fuu kawritata mboya ɓe Joomiraaɗo halkiri yiite ɓeen. 7 Taa ndillon naarude hukum Ceniiɗo ɗoon. Nde ndilluɗon ɗoon fuu on maayan, sabo nebbam Joomiraaɗo ceninoojam jooraama dow mooɗon.
Ɓe ngaɗi ko Muusaa yamiri ɗuum.
Ko Joomiraaɗo yamiri almaami'en dow njaram
8 Joomiraaɗo haaldi e Haaruuna wi'i:
— 9 Nde naatoton hukum Ceniiɗo aan e ɓiɓɓe maaɗa fuu, taa njaron cabijam maa njaram lamminaaɗam. Noon waɗata de on maayataa. Wo ɗum yamiroore nde ɗowtantoɗon ley jamaanuuji fuu 10 faa mbaawon senndude ko senii e ko senaaki, ko laaɓi e ko laaɓaa 11 de jannginon Israa'iilankooɓe jamirooje ɗe Joomiraaɗo hokki ɗum'en e hunnduko Muusaa ɗeen fuu.
Jamirooje dow sadakaaji
12 Muusaa haaldi e Haaruuna e ɓiɓɓe muuɗum Eliyajar e Itamar heddaniiɓe ɗum ɓeen wi'i:
— Kooƴon sadaka conndi keddiiɗo e sadakaaji Joomiraaɗo ɗiin de nyaamon ɗum ɗakkol sakkirde ɗoon. Wo ɗum ngeɗu ceniingu sanne. 13 Nyaamon ɗum ley nokkuure seniinde sabo wo kanjum woni ngeɗu mooɗon aan e ɓiɓɓe maaɗa ley ko ƴuwi e sadakaaji Joomiraaɗo fuu fodde no yamiri kam. 14 Nyaamon du, doomre ɓanteteende yeeso Joomiraaɗo e busal cakketeengaal ley nokkuure laaɓunde aan e ɓiɓɓe maaɗa worɓe e rewɓe. Wo ɗuum woni ngeɗu mooɗon ley sadakaaji dewral ɗi Israa'iilankooɓe ngaɗata. 15 Ɓe ɓeyda e busal ngaal e doomre ɓanteteende ndeen, ɓelle buleteeɗe dow sakkirde ɗeen. Ɗum laatoo ngeɗu ma aan e ɓiɓɓe maaɗa faa abada fodde no Joomiraaɗo yamiri.
16 Muusaa filii faamande ndamndi sadaka yaafeede ndiin. O tawi ndi wulaama. Ndeen o ɓernani Eliyajar e Itamar ɓiɓɓe Haaruuna heddiiɓe ɓeen de o ƴami ɗum'en o wi'i:
— 17 Ko saabii de on nyaamaay kirsamaari ndiin ley nokkuure seniinde de wo huunde seniinde sanne? Joomiraaɗo hokkii on ɗum faa ngaɗon hakkeeji maɓɓe mooytee yeeso muuɗum. 18 Ƴiiƴam kirsamaari ndiin yaaraaka ley nokkuure seniinde, ndelle na tilsunoo nyaamon teewu mayri ley nokkuure seniinde ndeen fodde no njamirnoomi on noon.
19 Haaruuna jaabii Muusaa wi'i:
— Hettinda, wo hannden ɓe ngaddi kirsamaaji maɓɓe sadaka yaafeede tawti sadaka buleteeɗo yeeso Joomiraaɗo. Si mi nyaamiino sadaka yaafeede oon hannden gaɗa ko hewtii kam ɗuum, yalla fotananno Joomiraaɗo naa?
20 Muusaa nani ko Haaruuna wi'i ɗuum de jaɓi.