Haala daabaaji karmuɗi e ɗi karmaa
11
1 Joomiraaɗo haaldi e Muusaa e Haaruuna wi'i:— 2 Kaaldon e Israa'iilankooɓe, mbi'on ɗum'en: Hakkunde daabaaji adunaaru fuu, inan ɗi mbaawɗon nyaamude: Oɗon mbaawi nyaamude daaba fuu 3 gooduɗo holnyundu fecciindu de tawa na waccitoo. 4 Wooɗi du, hakkunde baccitotooɗi e ɗi kolnyuli pecciiɗi ɗiin du, inan ɗi on njeyaa nyaamude:
Ngeelooba, sabo inga waccitoo ammaa kolnyuli magga peccaaki. Ndelle ndaardon nga ko harmani on.
5 Gaynaare, sabo na waccitoo ammaa holnyundu muuɗum feccaaki. Ndelle ndaardon ɗum ko harmani on.
6 Wojere, sabo na waccitoo ammaa holnyundu muuɗum feccaaki. Ndelle ndaardon ɗum ko harmani on.
7 Ngiroowu, sabo na woodi holnyundu fecciindu ammaa waccitataako. Ndelle ndaardon ɗum wo ko harmani on.
8 Taa nyaamon teewu majji, taa meemon caaɗɗum majji. Iɗi laatanii on ko harmi.
Daabaaji ndiyam laaɓuɗi e ɗi laaɓaa
9 Hakkunde kujje buurɗe ley ndiyam fuu, inan ɗe mbaawɗon nyaamude: oɗon mbaawi nyaamude ko wuuri ley diyeele maayo maa gooruuji de na woodi jinorɗe e koɓalaaje. 10 Ammaa kujje buurɗe ley maayooji maa gooruuji ɗe ngalaa jinorɗe e koɓalaaje fuu ndaardon ɗum'en ko harmani on. 11 Ɗe laatanoo on ko nyiddinii. Taa nyaamon teewu majje, taa meemon baatuɗi majje, ndaardon ɗe hono ko harmani on sanne. 12 Ko wuuri ley ndiyam de walaa jinorɗe e koɓalaaje fuu laatanoo on mboɗaa.
Haala pooli laaɓuɗi e ɗi laaɓaa
13 Hakkunde pooli fuu, inan ɗi ndaardoton nyiddiniiɗi, ɗi on njeyaa nyaamude: dutal e jigaare e ciilal maayo, 14 e gabuure e sii ciile feere feere, 15 e daawuwal e sii muɓɓen, 16 e ndaw e ngooƴaare e kelentewal maayo e goppere e sii muɓɓen, 17 e biigamiimolel e sii nyaale e ngooƴaare mawnde, 18 e ngooƴayel daneyel e daawuwel e sii jigaaje, 19 e waaliyal e sii cooɗe e wudaawudaa e wilwilndu.
Haala kujje piirooje
20 Piiroowel ngel koyɗe nay fuu laatoo ko harmani on sanne. 21 Ammaa hakkunde ngoodukoy koyɗe nay kooy, oɗon mbaawi nyaamude koy koyɗe muɓɓen ngoodi jokkule mbaawkoy fittude. 22 Inan koy mbaawɗon nyaamude: baɓɓatti leɗɗe e gurnyaaji e pelempee e koobaaji e sii muɓɓen. 23 Ammaa piiroohoy koy koyɗe nay keddiikoy fuu ndaardon ɗum'en wo ko nyiddinii.
Daabaaji tuuninooji
24 Inan daabaaji tuuninooji on: meemuɗo baatuɗi majji fuu laatoto tuunɗo faa hewta futuro. 25 Tiigiiɗo baatungel e majji fu sey lonna kaddule muuɗum de heddoo wo tuunɗo faa hewta futuro. 26 Daaba fuu mo holnyundu muuɗum feccaaki e mo waccitataako wo tuunɗo. Meemuɗo daaba oon fuu laatoto tuunɗo. 27 Daabaaji gooduɗi koyɗe nay de ngalaa kolnyuli fuu wo karmuɗi. Meemuɗo baatungel e majji fuu laatoto tuunɗo faa hewta futuro. 28 Tiigiiɗo baatungel e majji fu sey lonna kaddule muuɗum de heddoo wo tuunɗo faa hewta futuro sabo iɗi karmani on sanne.
Haala kujje ladooje e leydi
29 Hakkunde kujje ladooje e leydi fuu, inan karmanɗe on: gusuuru e doomburu e sii pallaaɗi feere feere, 30 e joldu e eleleldu e huutooru e fallalde e doonyorgal. 31 Kanje ngoni kujje karmanɗe on. Meemuɗo baatungel e majje fuu laatoto tuunɗo faa hewta futuro. 32 Si baatungel e majje saami ley ginewol fuu ngol laatoto ko tuuni. Ko ngol laatii fuu, nde wo le'al maa kaddungal maa nguru maa bootooru; ko gollirtee fuu, sey suuwee ley ndiyam de heddoo wo tuunɗum faa hewta futuro. Caggal ɗuum yeccoo wo ko laaɓi. 33 Si baatungel majje saamii ley ginewol gaɗiraangol loope fu, ko wonnoo ley maggol fuu laatato ko tuuni. Ndelle sey ngol fusee. 34 Si ndiyam ngonnooɗam e ginewol ngool meemii nyaamdu fu, ndu laatoto tuundu. Noon du njaram laaɓunooɗam ɗam ndiyam ginewol ngool meemi fuu laatorto tuunɗam ley ginewol laatiingol fuu. 35 Ginewol ngol baatungel majji saamii ley muuɗum fuu laatoto ko tuuni. Nde wo duppirde buuru maa kaatane fuu sey fusee sabo laatake ko tuuni. Iɗi karmani on sanne. 36 Si huunde waatunde ndeen wo nder ildude maa ley ɓunndu saami fu tuunintaa ɗum. Ammaa meemuɗo baatungel majje fuu laatoto tuunɗo. 37 Si baatungel majje saamii dow aawdi fu, ɗuum tuunintaa ndi. 38 Ammaa si ndiyam wattaama e aawdi ndiin de ngel saamii ley mayri fu, ndi laatoto ko harmi.
Jamirooje dow daabaaji caaɗuɗi
39 Si daaba dagiiɗo saaɗii fu, meemuɗo ɗum fuu laatoto tuunɗo faa hewta futuro. 40 Nyaamuɗo teewu daaba oon fuu sey lonna kaddule muuɗum de heddoo wo tuunɗo faa hewta futuro. Tiigiiɗo o du sey lonna kaddule muuɗum de heddoo wo tuunɗo faa hewta futuro.
41 Kujje ladooje e leydi fuu laatanoo on ko harmi. Taa nyaamon ɗe. 42 Kujje ladooje dow leydi maa tallotooɗe dow deedi muɓɓen maa njaarooje koyɗe nay maa koyɗe ɗuuɗɗe fuu taa nyaamon fay gootel e muɓɓen sabo ɗe fuu wo ɗe nyiddiniiɗe. 43 Ndelle taa tuuninee ko'e mooɗon saabe majje. Taa tuuniniron ko'e mon saabe meemude ɗe wooɗi du, taa ɗe tuunina on. 44 Sabo wo miin woni Joomiraaɗo, Laamɗo mooɗon. Ceninee ko'e mooɗon, faa laatoɗon seniiɓe sabo miin wo mi ceniiɗo. Taa tuuniniree ko'e mooɗon e meemude kujje ladooje e leydi. 45 Sabo wo miin woni Joomiraaɗo burtinɗo on leydi Misira faa laatoo Laamɗo mooɗon. Ndelle laatoɗon seniiɓe sabo miin wo mi ceniiɗo.