No debbo dimuɗo laaɓinirtee
12
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe mbi'aa ɗum'en: Si debbo rimii ɓiɗɗo gorko fu, laatoto tuunɗo faa hewta balɗe jeɗɗi hono no jiiɗo tuundi muuɗum noon. 3 Nyalaande jeetataɓerde ndeen, cukalel ngeel taadee. 4 Caggal ɗuum, sey debbo oon munya balɗe 33 de laaɓa e ƴiiƴam ɓeyngu muuɗum ɗaam. O jeyaa meemude huunde seniinde fay wootere, wooɗi du, o jeyaa yaade nokkuure seniinde faa nde wakkati oon faltii.
5 Si wo ɓiɗɗo debbo o rimi du, o heddoto o tuunɗo faa hewta jeɗɗiije ɗiɗi hono no jiiɗo tuundi muuɗum noon. Caggal ɗuum, sey o munya balɗe 66 de o laaɓa e ƴiiƴam ɓeyngu makko ɗaam.
6 Si balɗe laaɓineede makko ɗeen paltake, nde wo ɓiɗɗo gorko maa debbo o rimi fu, sey o wadda jawgel ngel ndunngu ngootu gaɗeteengel sadaka buleteeɗo naarude hukum Ceniiɗo. O wadda du nyaabal maa wuugaandu waɗeteendu sadaka laaɓinoowo. O hokka ɗi almaami. 7 Almaami oon sakka ɗi yeeso Joomiraaɗo faa o laaɓa e ƴiiƴam ɓeyngu makko ɗaam. Ndeen o laaɓii e ƴiiƴam makko ɗaam.
Ndee woni yamiroore dow ɓeyɗo.
8 Si tawii o walaa baawɗe waddude jawgel ngeel fu, sey o wadda nyaabe ɗiɗi maa buugaali ɗiɗi. Wooturu waɗee sadaka buleteeɗo, heddiindu du, sadaka yaafeede. Noon almaami waɗiranta o faa o laaɓa e ƴiiƴam ɓeyngu makko ɗaam.