No yimɓe Israa'iila peƴƴitiri maayo Maaliya
14
1 Joomiraaɗo haaldi e Muusaa, wi'i:2 — Yamir yimɓe Israa'iila njeccoo koɗa ɗakkol Pii-Hahirot hakkunde Migdol e maayo manngo. Yeeso Ba'al-Sefon, ɗakkol maayo ɗoon koɗoton. 3 Fira'awna miiloto wi'a: «Yimɓe Israa'iila lallii ina njiiltoo nder leydi. Ladde yoornde ommbii ɓe hono kasu nii.» 4 Mi yoornan ɓernde makko faa o jokka on. Ndeen mi teddinte saabe ko ngaɗanmi Fira'awna e sordaasiiɓe muuɗum ɗuum. Noon Misirankooɓe fuu paaman wo miin woni Joomiraaɗo.
Israa'iila'en ngaɗiri noon. 5 Nde kaananke Misira e gollooɓe muuɗum kumpitanoo yimɓe Israa'iila ndillii fu, mbayliti miilooji muɓɓen, mbi'i:
— Ko ngaɗuɗen ɗuum wo ɗume? Ko saabii accuɗen yimɓe Israa'iila ndilli, njoppi gollande en?
6 Fira'awna segilii torkooru pucci muuɗum, yaadi e konunkooɓe muuɗum. 7 Wooɗi o hooƴi du torkooji pucci 600 ɓurɗi moƴƴude ley torkooji pucci Misira fuu e mawɓe konunkooɓe dorbotooɓe ɗi. 8 Joomiraaɗo yoorni ɓernde Fira'awna kaananke Misira heɓa taayna yimɓe Israa'iila. Tawi yimɓe Israa'iila mburtake ina ndilla, ina njaara yeeso e ɓerɗe cuusuɗe. 9 Yimɓe Misira taayniri ɓe pucci e torkooji pucci Fira'awna fuu e waɗɗiiɓe pucci e konunkooɓe muuɗum. Ɓe kewtii ɓeen ina koɗi ɗakkol Pii-Hahirot yeeso Ba'al-Sefon, ɗakkol maayo.
10 Nde Fira'awna'en ɓadinoo fu, yimɓe Israa'iila ɓanti gite muɓɓen, nji'i Misirankooɓe ina njokkiti ɗum'en. Ɓe kuli sanne, ɓe mbullitii Joomiraaɗo. 11 Ɓe mbi'i Muusaa:
— Yalla caabeeje ngalaa ley Misira waɗi ngadduɗaa min ley ladde yoornde ɗo faa min maaya naa? Ɗume waɗi mburtinɗaa min Misira? 12 Wanaa ɗuum waɗi de min mbiinoo ma ley Misira toon, accaa min ngollana Misirankooɓe? Gollande Misirankooɓe ina ɓurani min maayude ley ladde yoornde nde.
13 Muusaa jaabii yimɓe ɓeen, wi'i:
— Taa kulee. Ndaree wooɗa, on nji'an no Joomiraaɗo hisinirta on hannden. Sabo yimɓe Misira ɓe njiiɗon hannden ɓe, on nji'ataa ɓe katin faa abada. 14 Joomiraaɗo e hoorem honanta on. Onon kaa ndeƴƴinee tan.
15 Ndeen Joomiraaɗo ƴami Muusaa:
— Ko waɗi aɗa wullitoo kam mi walle? Wi'u Israa'iila'en ummoo njokka laawol muɓɓen. 16 Ƴeptu sawru maaɗa de poortaa junngo maa dow maayo faa ndiyam ɗam feccoo, de yimɓe Israa'iila keɓa njaaɓa dow leydi njoorndi, peƴƴa maayo ngoon. 17 Mi yoornan ɓerɗe Misirankooɓe faa ɓe njokka on. Mi teddinte e dow ko ngaɗanmi Fira'awna e konunkooɓe muuɗum e torkooji pucci muuɗum e waɗɗiiɓe pucci muuɗum fuu. 18 Yimɓe Misira paaman miin woni Joomiiraɗo, nde keɓumi teddeengal dow Fira'awna e dow torkooji pucci muuɗum e dow waɗɗiiɓe pucci muuɗum fuu.
19 Ndeen maleyka Laamɗo gonnooɗo yeeso jamaa Israa'iila oon, soƴƴii hetti gaɗa maɓɓe. Noon du, ruulde nanndunde e bimmbeere ndeen ƴuwi yeeso maɓɓe, yehi darii caggal maɓɓe. 20 Nde woni hakkunde hoɗorde yimɓe Misira e hoɗorde yimɓe Israa'iila. Jemma, ruulde ndeen waɗa nimre to Misirankooɓe, ammaa to Israa'iila'en kaa, nde waɗa annoora. Ɗum waɗi de koɗorɗe ɗiɗi ɗeen keɓaay ɓattondirde ley jemma oon fuu.
21 Wooɗi Muusaa foorti junngo muuɗum dow maayo ngoon. Joomiraaɗo nuli henndu mawndu ƴuurundu lettugal wifi ley jemma oon fuu faa ndu foottina ndiyam ɗaam, yoppa leydi njoorndi. Ndiyam ɗaam feccii. 22 Yimɓe Israa'iila keɓi peƴƴiti maayo ngoon dow leydi njoorndi. Ndiyam ɗaam du laatanii ɓe kokuuji, sera nyaamo maɓɓe e sera nano maɓɓe fuu. 23 Misirankooɓe njokkitii ɓe. Pucci Fira'awna e torkooji pucci muuɗum e waɗɗiiɓe pucci muuɗum fuu njokki ɓe ley maayo toon. 24 Nde ɓadinoo weetude fu, Joomiraaɗo heddii faa dow iilde yiite e ruulde nannduɗe e bimmbeeje toon. O ndaari konunkooɓe Misira, o jiiɓi ɗum'en. 25 O waɗi taare torkooji pucci maɓɓe mboni de ƴuwi faa ɓe mbaawaa waɗɗaade ɗi katin. Yimɓe Misira mbi'i: Accee ndoggen, ndillen faa ndaɗen e Israa'iila'en ɓe! Joomiraaɗo e hoorem wallata ɓe, de na haɓda e meeɗen.
26 Ndeen Joomiraaɗo wi'i Muusaa:
— Foortu junngo maa dow maayo faa ndiyam ɗaam hawrita dow Misirankooɓe e dow torkooji muɓɓen e dow waɗɗiiɓe pucci muɓɓen ɓeen fuu.
27 Muusaa foorti junngo muuɗum dow maayo. Nde weetunoo fu maayo warti hono no worrunoo. Tawi Misirankooɓe ina ndoggannoo ley toon. Ɓe kawri e ndiyam ɗaam. Joomiraaɗo faɗɗi ɓe nder maayo ngoon. 28 Diyeele ɗeen ngarti uddi torkooji pucci e waɗɗiiɓe pucci e konunkooɓe Fira'awna ɓeen fuu, kamɓe taaynunooɓe yimɓe Israa'iila ley maayo ɓeen. Fay gooto maɓɓe daɗaay. 29 Yimɓe Israa'iila kaa peƴƴitii maayo ngoon dow leydi njoorndi. Ndiyam ɗaam du laatanii ɓe kokuuji, gere nyaamo maɓɓe e gere nano maɓɓe fuu.