Jimol Muusaa e Israa'iilankooɓe
15
1 Ndeen Muusaa e yimɓe Israa'iila njimani Joomiraaɗo, mbi'i:Mi yimanan Joomiraaɗo
sabo o heɓii jaalagol manngol.
Pucci e waɗɗiiɓe ɗi fuu, o faɗɗi e maayo.
2 Joomiraaɗo woni semmbe am,
Kanko waɗi miɗo yima.
Kanko woni kisinɗo kam.
Kanko woni Laamɗo am: mi manan mo,
Laamɗo baabiraaɓe am,
mi teddinan mo.
3 Joomiraaɗo wo konoowo mawɗo,
innde makko woni Joomiraaɗo.
4 Torkooji pucci e konunkooɓe Fira'awna fuu,
o faɗɗi ley maayo.
Konunkooɓe Fira'awna semmbiɗinɓe
njoolake ley Maayo Maaliya.
5 Ndiyam lugguɗam yoolii ɓe.
Ɓe ndiƴƴii faa to luggi hono kaaƴe,
6 Yaa Joomiraaɗo, junngo maaɗa nyaamo,
ina jogii baawɗe tedduɗe.
Yaa Joomiraaɗo, junngo maaɗa nyaamo,
wo niisoowo wayɓe.
7 E teddeengal maaɗa manngal
a liɓii wayɓe maa.
Aɗa nulda tikkere maa mawnde tan,
de ɓe mbulee hono yiite heɓi nyoomal.
8 E henndu foofaango maa, diyeele kawriti.
Diyeele doggooje ndarii hono kokuuji.
Diyeele lugguɗe njoornaa faa ley reedu maayo.
9 Wayɓe amin toowni ko'e muɓɓen, mbi'i:
En ndiiwan ɓe, nanngen ɓe,
cennden jawdi maɓɓe,
ngaɗen ɓe no muuyruɗen.
Coorten kaafaaje meeɗen
de kalken ɓe.
10 Puufuɗaa foofaango maaɗa tan,
ndiyam maayo moɗi ɓe.
Ɓe ndiƴƴii ley diyeele cemmbiɗinɗe hono njamndi ɓaleeri nii.
11 Moy woni nannduɗo e maaɗa yaa Joomiraaɗo,
hakkunde allaaji feere?
Moy woodi darja e senaare hono maa,
kulɗiniiɗo, maneteeɗo, golloowo ko haayni!
12 A foortii junngo maa nyaamo, de leydi moɗi ɓe.
13 Nder hinney maa koolniiɗo, a ardake yimɓe ɓe ndimɗinɗaa.
E baawɗe maaɗa, njaarataa ɓe joonnde maa seniinde.
14 Siyiiji yimɓe nanii haala ka, ina ndiwna!
Wonɓe Filistiya, ɓerɗe muɓɓen taƴi.
15 Kulol manngol nanngi hooreeɓe Edom,
ardiiɓe Mo'ab du ina ndiwna.
Jooɗiiɓe Kanaana du fuu,
nesi muɓɓen taƴi.
16 Kulol e wemmbere caami dow maɓɓe.
Saabe baawɗe junngo maa ɓe ndeƴƴinto siw hono kaaƴe nii,
faa yimɓe maa paltoo,
yaa Joomiraaɗo, faa ɗo yimɓe ɓe ndimɗinɗaa paltii.
17 A nannan ɓe, de ndarnaa ɓe dow waamnde ndongu maaɗa,
yaa Joomiraaɗo, nokkuure nde ngaɗuɗaa joonnde maa,
nokkuure maa seniinde nde juuɗe maaɗa ndarni.
18 Joomiraaɗo laamoto faa abada abadin!
19 Nde pucci Fira'awna e torkooji pucci muuɗum e waɗɗiiɓe pucci muuɗum naatunoo maayo fu, Joomiraaɗo wartiri ndiyam maayo dow maɓɓe, ammaa Israa'iila'en kaa njehi dow leydi njoorndi hakkunde maayo.
Jimol Mariyama
20 Wooɗi, mawno Haaruuna debbo wo annabaajo. Innde makko wo Mariyama. O hooƴi tummbude lenngoy, imo fiya imo wama. Ndeen rewɓe du fuu mburtii, njokki mo, ina piya tummbuɗe kamɓen du ina mbama. 21 Mariyama yimi, wi'i ɓe:
Njimanee Joomiraaɗo,
sabo heɓii jaalagol manngol.
Pucci e waɗɗiiɓe ɗi fuu
o faɗɗii ɗum ley maayo.
Ndiyam Mara kaaɗɗam
22 Ndeen Muusaa ardii yimɓe Israa'iila, ɓe ummii ɗo maayo Maaliya, ɓe naati ladde Sur. Balɗe tati iɓe njaha ley ladde, ɓe keɓaay ndiyam. 23 Nde ɓe njottinoo Mara fu, ɓe kunngii yarude ndiyam muuɗum, sabo iɗam haaɗi. Ɗum waɗi nokkuure ndeen inndiraa Mara (kaaɗɗum). 24 Ndeen yimɓe ɓeen ɓernani Muusaa, de mbi'i ɗum:
— Ɗume min njarata?
25 Muusaa wullii Joomiraaɗo, de Joomiraaɗo holli ɗum leggal. O faɗɗi ngal ley ndiyam ɗaam, ɗam laatii mbelɗam. Ɗoon Joomiraaɗo hokki Israa'iila'en yamiroore, wooɗi du o ndaartindoo ɓe, 26 o wi'i ɓe: Si on kettindanake daande am faa wooɗii, miin Laamɗo Joomiraaɗo mooɗon, de ngaɗuɗon ko wooɗi yeeso am, oɗon tinnii e jamirooje am, oɗon ɗowtanii haalaaji am fu, mi fiirataa on masiibaaji ɗi piirunoomi Misirankooɓe ɗiin. Sabo wo miin woni Joomiraaɗo dannoowo on.
27 Ndeen ɓe njottii Elim. Toon ina woodi ilduɗe ndiyam 12 e leɗɗe gelleeje 70. Ɓe koɗi ɗoon ɗakkol ndiyam.