Maayde afooɓe Misira
11
1 Joomiraaɗo wi'i Muusaa:— Mi fiiran Fira'awna e leydi Misira fuu masiiba gooto tan katin. Caggal ɗuum, o accan on ndillon, wo o riiwan on du ley leydi makko. 2 Kaalanaa yimɓe Israa'iila, mbi'a ɓe: «Gorko fuu rookoo gorko gondo mum, debbo du rookoo debbo gondo mum gineeji gaɗiraaɗi kaŋŋe e cardi.»
3 Joomiraaɗo waɗi yimɓe Israa'iila keɓi moƴƴere e gite yimɓe Misira. Katin du Muusaa wo teddinaaɗo sanne nder leydi Misira, yeeso gollooɓe Fira'awna e yeeso yimɓe leydi ndiin fuu. 4 Muusaa wi'i:
— Inan ko Joomiraaɗo wi'i: Hakkunde jemma mi yuusoto ley Misira. 5 Afoojo ley leydi Misira fuu maayan, gilla afo Fira'awna jooɗiiɗo dow laamu muuɗum faa e afo korɗo niisoowo faa du e afo daaba fuu. 6 Bullaali mawɗi ngaɗan ley leydi Misira fuu, ɗi iri muɓɓen ngaɗaayno abada, wooɗi ngaɗataa du katin. 7 Ammaa ley yimɓe Israa'iila kaa, nanataake fay ɗo rawaandu ŋuuri neɗɗo maa daaba. Noon paamirton Joomiraaɗo senndii yimɓe Misira e yimɓe Israa'iila. 8 Ndeen, gollooɓe maaɗa ɓe fuu ngaran to am de kippoo yeeso am, mbi'a kam: «Ndillu, aan e jokkuɓe ma fuu!» Ndeen mi ndillan.
Muusaa wurtii to Fira'awna, ina tikki sanne.
9 Ndeen Joomiraaɗo wi'i Muusaa:
— Ko Fira'awna hettindantaako ma ɗuum, wo faa mi ɗuuɗina kaayeefiiji am ley leydi Misira.
10 Wooɗi Muusaa e Haaruuna ngaɗi maandeeji kaayniiɗi ɗiin fuu yeeso Fira'awna, ammaa Joomiraaɗo yoorni ɓernde Fira'awna, o accaay yimɓe Israa'iila mburtii leydi makko.