Masiiba baɓɓatti
10
1 Joomiraaɗo wi'i Muusaa:— Yahu to Fira'awna sabo mi yoornii ɓernde muuɗum e ɓerɗe gollooɓe muuɗum faa mi waɗa maandeeji am ɗiin fuu hakkunde maɓɓe. 2 Mi waɗii ɗum faa pillanoɗaa ɓiɓɓe maa e taaniraaɓe maa no torrirmi yimɓe Misira e no ngaɗirmi maandeeji am kaayniiɗi hakkunde maɓɓe. Noon paamirton miin woni Joomiraaɗo.
3 Muusaa e Haaruuna njehi to Fira'awna, mbi'i ɗum:
— Inan ko Laamɗo Joomiraaɗo Ibraninkooɓe ƴami: «Ko saabii aɗa heddii e salaade leeƴinde hoore maa yeeso am? Accu yimɓe am ndilla faa ndewa kam. 4 Sabo si a salake accude ɓe ndilla fu, inan jaango mi waddan baɓɓatti dow leydi maa. 5 Ɗi keewan dow leydi faa fay gooto waawataa yiide ndi. Ɗi nyaaman ko marmalluuje ɗeen keddi ɗuum. Ɗi nyaaman du leɗɗe gese fuu. 6 Ndeen ɗi keewan ley cuuɗi maa e cuuɗi gollooɓe maa e ley cuuɗi yimɓe Misira fuu. Ɗum laatoo masiiba mawɗo mo yi'aaka ley jamaanu baabiraaɓe maa e maamiraaɓe maa, gilla ɓe njooɗii ley leydi ndi faa warde hannden.»
Caggal ɗuum, Muusaa tottitii, dilli yeeso Fira'awna.
7 Gollooɓe Fira'awna mbi'i ɗum:
— Faa ndeye neɗɗo o selata laatanaade en torra? Accu yimɓe ɓe ndilla, ɓe ndewa Joomiraaɗo Laamɗo maɓɓe oon. Faa hannden a faamaay Misira halkii naa?
8 Muusaa e Haaruuna nodditaa to Fira'awna, mbi'aa:
— Njehee teddinowee Joomiraaɗo, Laamɗo mooɗon. Ɓeye e mooɗon njahata?
9 Muusaa wi'i:
— Min fuu min njahan: Jokolɓe e mawɓe, sukaaɓe amin worɓe e rewɓe e dammuuli amin e na'i amin, sabo wo weltaare iidi mawndi min ngaɗanoyta Joomiraaɗo.
10 Ndeen Fira'awna wi'i ɓe:
— Joomiraaɗo wondu e mooɗon si mi yoppii on njaadon e ɓiɓɓe mooɗon! De si goonga, mi yi'ii oɗon anniyii ko boni. 11 Ɗum laatortaako noon! Ammaa njehee onon worɓe tan, ndewon Joomiraaɗo sabo ɗum tan ŋaarotoɗon.
Ndeen ɓe ndiiwaa yeeso Fira'awna.
12 Joomiraaɗo wi'i Muusaa:
— Foortu junngo maaɗa dow leydi Misira faa baɓɓatti ngara dow mayri. Ɗi nyaama funngo ngo marmalluuje ɗeen njoppi dow leydi ndiin fuu. 13 Muusaa foorti sawru muuɗum dow leydi Misira. Joomiraaɗo waɗi henndu lettugal wifi nyalooma oon e jemma oon fuu. Nde weetunoo fu, tawi henndu lettugal nduun waddii baɓɓatti. 14 Baɓɓatti ɗiin cankitii dow leydi Misira fuu, ɗi njoorii dow nokkuuje fuu. Iɗi keewi sanne. Abada fay gooto yi'aay hono majjum, hono majjum du yi'ataake ley ko warata. 15 Ɗi cuddi leydi ndiin fuu faa ndi fuu ndi niɓɓi. Ɗi nyaami funngo fuu, ɗi nyaami du ɓiɓɓe leɗɗe ɗe marmalluuje njoppi dow leydi ndiin fuu. Walaa fuu ko hecciɗi ko heddaa dow leɗɗe e ley funngo e ley gese nder leydi Misira. 16 Ndeen Fira'awna harii noddi Muusaa e Haaruuna, wi'i ɗum'en:
— Mi waɗii junuuba yeeso Joomiraaɗo Laamɗo mooɗon e yeeso mooɗon onon du. 17 Ndelle joonin, njaafanoɗon kam junuuba am katin. Ŋaaroɗon Joomiraaɗo Laamɗo mooɗon ittana kam masiiba baroowo o.
18 Muusaa wurtii to Fira'awna, ŋaarii Joomiraaɗo. 19 Joomiraaɗo waɗi henndu mawndu ƴuuri gorgal, wifi, de ndu hooƴi baɓɓatti ɗiin, ndu faɗɗi ley maayo wi'eteengo maayo Maaliya. Fay baɓɓattu ngootu heddaaki ley leydi Misira fuu. 20 Ammaa Joomiraaɗo yoorni ɓernde Fira'awna. O jaɓaay yoppude yimɓe Israa'iila ndilla.
Masiiba nimre
21 Ndeen Joomiraaɗo wi'i Muusaa:
— Ƴeptu junngo maa dow faa nimre waɗa dow leydi Misira, nimre tekkunde faa ina waawi meemeede.
22 Muusaa ƴepti junngo muuɗum dow, de nimre tekkunde waɗi dow leydi Misira fuu, faa waɗi balɗe tati. 23 Fay gooto yi'ataa banndum. Fay gooto ummaaki nokku ɗo woni faa waɗi balɗe tati. Ammaa yimɓe Israa'iila kaa ina ngoodi annoora ley ɗo njooɗii ɗoon.
24 Ndeen Fira'awna noddi Muusaa, wi'i:
— Njehee teddinowee Joomiraaɗo. Njaadon e sukaaɓe mooɗon, ammaa njoppon dammuuli e na'i mooɗon ɗo.
25 Ndeen Muusaa wi'i:
— Yalla aan e hoore maa hokkata min kirsamaaji e sadakaaji buleteeɗi faa min kokka Laamɗo Joomiraaɗo amin naa? 26 Ndelle min njaadan e daabaaji amin du fuu. Fay feɗeengo wooto min njoppataa, sabo wo ley majji min ittata ko min teddinirta Joomiraaɗo Laamɗo amin. Min anndaa ko min cakkanta Joomiraaɗo tafon, sanaa nde min njottii toon minen e ko'e amin.
27 Ammaa Joomiraaɗo yoorni ɓernde Fira'awna. O jaɓaay yoppude ɓe ɓe ndilla. 28 Ndeen Fira'awna wi'i Muusaa:
— Wurta ɗo. Tinna taa ndaroɗaa yeeso am katin, sabo nyannde ndariɗaa yeeso am fu, a maayan.
29 Muusaa wi'i mo: A haalii goonga. Abada mi darataako yeeso maa katin.