No Joomiraaɗo halkiri kulle yimɓe Misira
9
1 Ndeen Joomiraaɗo wi'i Muusaa:— Yahu to Fira'awna kaalanaa ɗum, mbi'aa ɗum: «Inan ko Joomiraaɗo Laamɗo Ibraninkooɓe wi'i: accu yimɓe am ndilla faa ndewa kam. 2 Si a heddake aɗa faddii ɓe, a salake yoppude ɓe ndilla fu, 3 inan, miin Joomiraaɗo, junngo am wardan e nyawu cattungu dow daabaaji maaɗa gonɗi ley ladde, e dow pucci, e dow araaji, e dow geeloobi e na'i e dammuuli maaɗa fuu. 4 Ammaa Joomiraaɗo senndan kulle yimɓe Israa'iila e kulle yimɓe Misira. Ley kulle yimɓe Israa'iila fuu fay gootel waatataa.»
5 Joomiraaɗo darni wakkati waɗata ɗum, wi'i:
— Jaango miin Joomiraaɗo mi waɗan huunde ndeen nder leydi ndi.
6 Wooɗi jaangoore majjum Joomiraaɗo waɗi ɗum. Kulle yimɓe Misira fuu mbaati ammaa kulle yimɓe Israa'iila fay gootel waataay. 7 Fira'awna nuli yimɓe njaha ndaara. Ɓe tawi ley daabaaji yimɓe Israa'iila fay goota waataay. Ammaa e noon fuu, ɓernde Fira'awna heddii ina yoori. O yoppaay yimɓe Israa'iila ndilla.
Masiiba ɓuuye
8 Ndeen Joomiraaɗo wi'i Muusaa e Haaruuna:
— Nokkee ndoondi duppirde de Muusaa faɗɗira ndi dow. O waɗa ɗum yeeso Fira'awna. 9 Ndi laatoto colla dow leydi Misira fuu. Ndi laatoto ɓuuye pusooje ina cankitoo dow yimɓe e dow kulle nder leydi Misira fuu.
10 Ɓe nokki ndoondi duppirde ndiin, ɓe ndarii yeeso Fira'awna. Muusaa faɗɗi ndi dow, ndi laatii ɓuuye pusooje ina cankitoo dow yimɓe e kulle fuu. 11 Jom'en dabareeji ɓeen mbaawaay daraade yeeso Muusaa saabe ɓuuye ɗeen, sabo iɓe ngondi e ɓuuye hono no yimɓe Misira heddiiɓe ɓeen. 12 Joomiraaɗo yoorni ɓernde Fira'awna katin. O hettindanaaki ɓe. Ɗum laatorii hono no Joomiraaɗo wiirunoo Muusaa noon.
Masiibaaji Marmalluuje
13 Ndeen Joomiraaɗo wi'i Muusaa:
— Umma jaango gilla beetee law, njahaa ndaroɗaa yeeso Fira'awna mbi'aa ɗum: «Inan ko Joomiraaɗo Ibraninkooɓe wi'i: Accu yimɓe am ndilla faa ndewa kam. 14 Sabo joonin kaa, mi nulan masiibaaji am fuu dow maaɗa e dow gollooɓe maa e yimɓe maa faa annditaa hono am walaa ley adunaaru fuu. 15 Sabo si mi foortiino junngo am, mi fiyirii ma, aan e yimɓe maa fuu nyawu mbonngu, tawan on kalkiino ley adunaaru ko ɓooyi. 16 Ammaa mi accii ma mbuuruɗaa faa mi holle baawɗe am, faa innde am sankitoo ley adunaaru fuu. 17 Faa joonin a selaay toownude hoore maaɗa, a jaɓaay yoofude yimɓe am ndilla.
18 «Inan, jaango hono wakkati o, mi tomnan marmalluuje mawɗe ɗe hono muɓɓen nji'aaka ley Misira gilla fuɗɗoode Misira faa warde joonin. 19 Joonin le, nulu kulle maaɗa e ko njogiɗaa ley gese fuu nannee law ley suuɗorde. Sabo marmalluuje piyan de mbara neɗɗo maa huunde fuu ko tawaa ley gese ko naataay ley cuuɗi».
20 Wooɗi hakkunde gollooɓe Fira'awna woɓɓe kuli konngol Laamɗo ngool, ngaɗi gollooɓe muɓɓen e kulle muɓɓen fuu naati ley cuuɗi. 21 Ammaa ɓe koolaaki konngol Laamɗo ɓeen kaa fuu njoppi gollooɓe muɓɓen e kulle muɓɓen ley gese.
22 Joomiraaɗo wi'i Muusaa:
— Ƴeptu junngo maaɗa faro kammu faa marmalluuje toɓa dow leydi Misira fuu, dow yimɓe e kulle e funngooji gese leydi Misira fuu.
23 Muusaa ƴeptiri sawru muuɗum dow. Joomiraaɗo waɗi pelnyaali e marmalluuje, yiite maƴƴe du piyi leydi. Joomiraaɗo tomni marmalluuje dow leydi Misira. 24 Abada hono majjum waɗaay e leydi Misira fuu gilla fuɗɗam lenyol Misirankooɓe. Marmalluuje ina mboɓɓoo, maƴƴe ina ngaɗa hakkunde marmalluuje ɗeen. 25 Haddi leydi Misira fuu, marmalluuje mawɗe sanne tappi huunde ko tawaa ley gese fuu: tagaaɓe e kulle fuu. Ɗe keli funngooji gese e leɗɗe gonɗe ley gese fuu. 26 Leydi Goosan to yimɓe Israa'iila njooɗii toon tan woni ɗo marmalluuje ngaɗaay. 27 Ndeen Fira'awna noddi Muusaa e Haaruuna, wi'i ɗum'en:
— Joonin kaa mi waɗii junuuba. Joomiraaɗo wo dartiiɗo, de miin e yimɓe am kaa, minen njeyi feloore. 28 Ŋaaree Joomiraaɗo darna pelnyaali ɗi e marmalluuje ɗe fuu. Mi accan on ndillon, on keddataako ɗo katin.
29 Muusaa wi'i mo:
— Nde mburtiimi ley huɓeere nde fu, mi ƴeptan juuɗe am faro Joomiraaɗo, mi ŋaaroo ɗum. Pelnyaali ɗiin e marmalluuje ɗeen fuu celan faa paamaa wo Joomiraaɗo kam jeyi adunaaru. 30 Ammaa aan e gollooɓe maa kaa, miɗo anndi on kulaay Laamɗo Joomiraaɗo tafon.
31 Wooɗi ko nanndi e alkama e sa'iiri fuu mboni, sabo sa'iiri ndiin waɗiino butaali. Ko nanndi e alkama ɗuum du waɗiino pinndi. 32 Ammaa siyiiji alkama mbonaay sabo ɗum ɓenndataa law. 33 Muusaa dilli to Fira'awna wurtii huɓeere ndeen, ɓanti juuɗe muuɗum faro Joomiraaɗo. Pelnyaali ɗiin e marmalluuje ɗeen fuu celi. Ƴuwoonde du helti. 34 Ammaa nde Fira'awna yi'unoo ƴuwoonde ndeen e marmalluuje ɗeen e pelnyaali ɗiin kelti fu, waɗi junuuba katin, kam e gollooɓe muuɗum fuu njoorni ɓerɗe muɓɓen. 35 Ɓernde Fira'awna heddii ina yoori, o accaay yimɓe Israa'iila ndilla. Ɗum laatorii hono no Joomiraaɗo wiirunoo Muusaa noon.