8
1 Ndeen Joomiraaɗo wi'i Muusaa:— Wi'u Haaruuna foorta junngo muuɗum jogiingo sawru ngoon dow gooruuji mawɗi e pamari e dow pete faa paaɓi ɓanga dow leydi Misira fuu.
2 Haaruuna foorti junngo muuɗum dow diyeele Misira. Paaɓi njalti, keewi leydi Misira fuu. 3 De Misirankooɓe jom'en dabareeji ɓeen du ngaɗiri hono noon. Kamɓe du, ɓe njaltini paaɓi dow leydi Misira e dabareeji maɓɓe. 4 Ndeen Fira'awna kaananke Misira noddi Muusaa e Haaruuna, wi'i ɗum'en:
— Ŋaaree Joomiraaɗo ittana kam paaɓi ɗi, miin e yimɓe am fuu. Ndeen mi accan yimɓe Israa'iila fuu ndilla, njaha ngaɗanowa Joomiraaɗo kirsamaaji.
5 Muusaa wi'i Fira'awna:
— Haalanam ndeye kaajaɗaa mi du'ane, aan e gollooɓe maa e yimɓe maa, heɓa Joomiraaɗo itta paaɓi gonɗi ley cuuɗi mooɗon, ittane ɗi fuu, faa ɗi keddoo ley maayo Nil tan.
6 Fira'awna jaabii, wi'i:
— Jaango.
Muusaa wi'i: Noon ɗum laatortoo faa paamaa hono Laamɗo Joomiraaɗo amin walaa. 7 Paaɓi ɗiin mboɗɗete, ɗi ndillan to cuuɗi maaɗa e to cuuɗi gollooɓe maa e Misirankooɓe fuu, ɗi keddoto ley maayo Nil tan.
8 Ndeen Muusaa e Haaruuna mburtii to Fira'awna. Muusaa wullii Joomiraaɗo ittana Fira'awna paaɓi ɗi waddi dow muuɗum ɗiin. 9 Joomiraaɗo waɗani Muusaa hono no ŋaarorii noon. Paaɓi ngonɗi nder cuuɗi e nder ɓaadeeji e nder gese fuu mbaati. 10 Yimɓe kawrunduri ɗi, ngaɗi ɗi joore-joore. Leydi ndiin fuu luuɓi. 11 Ammaa nde Fira'awna yi'unoo heɓii jam fu, yoorni ɓernde muuɗum, salii hettindanaade Muusaa e Haaruuna. Ɗum laatorii hono no Joomiraaɗo wiirunoo noon.
Masiiba tenɗi
12 Ndeen Joomiraaɗo wi'i Muusaa katin: Wi'u Haaruuna foorta sawru muuɗum fiya sollaare faa nde laatoo tenɗi ley leydi Misira fuu. 13 Muusaa e Haaruuna ngaɗiri noon. Haaruuna foorti junngo muuɗum jogiingo sawru ngoon, fiyi sollaare. Tenɗi naati ɓiɓɓe Aadama e kulle fuu. Sollaare ndeen laatii tenɗi dow leydi Misira fuu. 14 Misirankooɓe jom'en dabareeji ɓeen tefi yaltinde tenɗi e baawɗe muɓɓen, de ɓe mbaawaay. Tenɗi ɗiin ina ngoni dow yimɓe e dow kulle fuu. 15 Ndeen dabarankooɓe ɓeen mbi'i Fira'awna: «Ɗum kaa wo junngo Laamɗo». Ammaa ɓernde Fira'awna heddii ina yoori sanne. O hettindanaaki ɓe. Ɗum laatorii hono no Joomiraaɗo wiirunoo noon.
Masiiba buubi ŋatooji
16 Joomiraaɗo wi'i Muusaa:
— Jaango, ummoɗaa law gilla beetee, njahaa to Fira'awna, ndaroɗaa yeeso muuɗum wakkati fonndii maayo ndeen, mbi'aa ɗum: «Inan ko miin Joomiraaɗo mbi'umi: accu yimɓe am ndilla faa ndewa kam. 17 Si a accaay ɓe ɓe ndilli fu, inan mi nulan buubi ŋatooji ngara dow maaɗa e dow gollooɓe maa e dow yimɓe maaɗa e ley cuuɗi fuu. Cuuɗi Misirankooɓe e leydi ɗo ɓe njaaɓata fuu keewan buubi ŋatooji. 18 Ammaa nyannde majjum mi reenan leydi Goosan ɗo yimɓe am njooɗii ɗoon. Mbuubu ŋatoowu fay ngootu yi'ataake toon. Noon paamirtaa miin Joomiraaɗo miɗo woni ley leydi ndi. 19 Mi waɗan kaddi hakkunde yimɓe am e yimɓe maaɗa. Jaango maande haayniinde ndeen waɗan.»
20 Joomiraaɗo waɗiri noon. Buubi ŋatooji naati suudu Fira'awna e cuuɗi gollooɓe muuɗum faa keewi. Leydi Misira fuu boni saabe buubi ŋatooji ɗiin.
21 Fira'awna noddi Muusaa e Haaruuna, wi'i ɗum'en:
— Njehee kirsanee Laamɗo mooɗon kirsamaaji ley leydi ndi ɗo.
22 Ndeen Muusaa wi'i:
— Noon dagaaki! Sabo ko min kirsanta Laamɗo Joomiraaɗo ɗuum wo ko nyiddinii to Misirankooɓe. Wooɗi si min ngaɗii kirsamaaji yeeso Misirankooɓe, wanaa ɓe paɗɗan min kaaƴe ɓe mbara min naa? 23 Ina tilsi min njaha yaadu balɗe tati ley ladde faa min kirsana Laamɗo Joomiraaɗo amin hono no o yamiri min noon.
24 Fira'awna wi'i: Mi accan on njahon kirsanon Laamɗo Joomiraaɗo mooɗon ley ladde. Ammaa taa mboɗɗowoɗon. Ndookanee kam Laamɗo!
25 Ndeen Muusaa wi'i: Nde mburtiimi to maaɗa fu, mi yahan mi ŋaaroo Joomiraaɗo. Jaango, torra buubi ŋatooji ɗiin dillan to maaɗa, aan Fira'awna, e to gollooɓe maa e to yimɓe maaɗa. Ammaa taa hiilu min katin caloɗaa yoppude Israa'iilan'en njaha cakkanowa Joomiraaɗo kirsamaaji.