7
1 Ndeen Joomiraaɗo wi'i Muusaa:— Mi waɗii ma hono Laamɗo yeeso Fira'awna. Mawna Haaruuna du laatante annabaajo. 2 Ko njamiranmaami fuu, sey kaalanaa ɗum Haaruuna. De kam du haalda e Fira'awna faa yoppa yimɓe Israa'iila mburtoo leydi Misira. 3 De miin du, mi yoornan ɓernde Fira'awna. Mi hebbinan maandeeji am kaayniiɗi ley leydi Misira. 4 Ammaa e noon fuu, Fira'awna hettidantaako on. Ndeen mi yowan junngo am ngo baawɗe dow Misira. Mi wurtiniran yimɓe am Israa'iila nder leydi ndiin e sariyaaji mawɗi, ɓeen ngoni jama'aaje am laatiiɗe geɓe geɓe. 5 Nde njowumi junngo am ngo baawɗe dow Misira faa mi wurtina yimɓe Israa'iila hakkunde maɓɓe fu, Misirankooɓe paaman wo miin woni Joomiraaɗo. 6 Muusaa e Haaruuna ngaɗiri no Joomiraaɗo yamiri ɗum'en noon. 7 Nde ɓe njahunoo ɓe kaaldowii e Fira'awna ndeen, Muusaa ina woodi duuɓi 80, Haaruuna du duuɓi 83.
No sawru Haaruuna laatorii mboddi
8 Joomiraaɗo haaldi e Muusaa e Haaruuna, wi'i: 9 Si Fira'awna ndaartindake on, wi'ii on kollon ɗum kaayeefi fu, aan Muusaa mbi'aa Haaruuna hooƴa sawru muuɗum faɗɗa yeeso Fira'awna, ndeen ndu laatoto mboddi. 10 Muusaa e Haaruuna ngari yeeso Fira'awna. Ɓe ngaɗi hono no Joomiraaɗo yamiri ɓe noon. Haaruuna faɗɗi sawru muuɗum yeeso Fira'awna e yeeso gollanooɓe ɗum, ndu laatii mboddi. 11 Ndeen Fira'awna noddi jom'en anndal e joomiraaɓe dabareeji. Dabarankooɓe Misira ɓeen du ngaɗiri noon e dabareeji muɓɓen. 12 Mono fuu faɗɗi sawru muuɗum, cabbi ɗiin fuu laatii bolle. Ndeen sawru Haaruuna nduun moɗi cabbi maɓɓe ɗiin fuu. 13 Ammaa ɓernde Fira'awna heddii ina yoori, o hettindanaaki ɓe. Ɗum laatorii hono no Joomiraaɗo wiirunoo noon.
14 Joomiraaɗo wi'i Muusaa: Ɓernde Fira'awna ina yoori, o salake yoppude Israa'iila'en ndilla. 15 Yahu to Fira'awna jaango illa beetee law. Wakkati o wurtotoo faa o yaha to ndiyam Nil ndeen, ndaroɗaa daande maayo ngoon faa kawraa mo. Tiigoɗaa sawru waylinoondu mboddi nduun. 16 Mbi'aa Fira'awna: «Laamɗo Joomiraaɗo Ibraninkooɓe nuli kam mi wi'e: accu yimɓe am ndilla faa ɓe ndewa kam ley ladde. Ammaa faa joonin a hettindanaaki kam.»
17 Inan ko Joomiraaɗo wi'i: Nii paamirta wo miin woni Joomiraaɗo. Inan, mi fiiran ndiyam maayo Nil sawru wonndu e junngo am ndu, ɗam laatoo ƴiiƴam. 18 Liƴƴi gonɗi ley maayo Nil ɗiin mbaatan, ndiyam maayo ngoon luuɓan. Ndeen yimɓe Misira kunngoto yarude ɗam.
19 Joomiraaɗo wi'i Muusaa:
— Wi'u Haaruuna hooƴa sawru muuɗum, foorta junngo muuɗum dow diyeele Misira fuu: Dow gooruuji maɓɓe mawɗi e pamari fuu, e dow pete maɓɓe e dow beeli maɓɓe e to ndiyam maɓɓe wattaa fuu faa ɗam laatoo ƴiiƴam. Ƴiiƴam tawete ley leydi Misira fuu, ley akalaaje e looɗe fuu. 20 Muusaa e Haaruuna ngaɗi hono no Joomiraaɗo yamiri noon. Haaruuna ƴepti sawru, fiyi ndiyam maayo Nil ɗaam yeeso Fira'awna e gollooɓe muuɗum. Ndiyam ɗaam fuu laatii ƴiiƴam. 21 Liƴƴi gonɗi ley maayo Nil mbaati, ndiyam maayo Nil ɗaam luuɓi faa yimɓe Misira kunngii yarude ɗam. Ƴiiƴam ina woni nokku fuu nder Misira. 22 Ammaa dabarankooɓe Misira ngaɗiri noon e dabareeji muɓɓen. De ɓernde Fira'awna heddii ina yoori. O hettindanaaki ɓe. Ɗum laatorii hono no Joomiraaɗo wiirunoo noon. 23 Ndeen Fira'awna yeccii to suudu muuɗum, hillaaka e majjum. 24 Yimɓe Misira fuu njehi mbasi ɗakkol maayo Nil faa keɓa ndiyam njareteeɗam, sabo ɓe kunngake yarude ndiyam maayo Nil. 25 Ndiyam maayo ngoon heddorii noon faa hiɓɓi balɗe jeɗɗi.
Masiiba paaɓi
26 Caggal ɗuum Joomiraaɗo wi'i Muusaa: Yahu to Fira'awna mbi'aa ɗum: «Inan ko Joomiraaɗo wi'i: Accu yimɓe am ndilla, teddinowa kam. 27 Si a jaɓaay yoppude ɓe ndilla fu, mi hebbinan leydi maaɗa fuu paaɓi. 28 Maayo Nil fuu heewan paaɓi, ɗi njaltan ɗi naata suudu maaɗa faa ɗo pukkotoɗaa, dow leeso maaɗa. Ɗi naatan du ley cuuɗi gollooɓe maa e yimɓe leydi maaɗa, ɗi naatan ley defirɗe maaɗa e nder le'e maaɗa diibirɗe conndi fuu. 29 Paaɓi ɗiin ƴeeŋan dow maaɗa aan e yimɓe maaɗa e gollooɓe maa ɓeen fuu.»