6
1 Ndeen Joomiraaɗo wi'i Muusaa:— Joonin a yi'an ko ngaɗammi Fira'awna. E baawɗe junngo semmbiɗingo, o yoppan Israa'iila'en ndilla. Si goonga e baawɗe maggo o riiwan ɓe ley leydi makko.
2 Laamɗo haaldi e Muusaa katin, wi'i:
— Miin woni Joomiraaɗo. 3 Arande mi ɓanganiino Ibrahiima e Isiyaaku e Yaakuuba mi hollii ɓe wo mi Laamɗo Jom Baawɗe, ammaa mi anndinaay ɓe innde am wo Joomiraaɗo bi'eteeɗo «Miin Woni» oon. 4 Mi waɗii amaana am e maɓɓe mi hokkan ɓe leydi Kanaana, leydi ndi ɓe koɗunoo e muuɗum ndiin. 5 Wooɗi du mi nanii uumaali yimɓe Israa'iila ley maccungaaku ngu Misirankooɓe ngatti ɓe nguun. Mi siwtorii du amaana am oon. 6 Saabe ɗuum mbi'aa yimɓe Israa'iila: Miin woni Joomiraaɗo, mi wurtinan on ley golleeji naawɗi ɗi Misirankooɓe ngatti on ɗiin. Mi dannan on e maccungaaku maɓɓe, mi rimɗiniran on junngo semmbiɗingo e sariyaaji mawɗi ɗi ngaɗammi. 7 Mi waɗan laatoɗon yimɓe am, miin du mi laatoto Laamɗo mooɗon. Ndeen on paaman wo miin woni Laamɗo Joomiraaɗo mooɗon burtinoowo on ley golleeji yimɓe Misira naawɗi. 8 Mi nannan on nder leydi ndi kunaniimi Ibrahiima e Isiyaaku e Yaakuuba mi hokkan ɗum'en. Mi hokkan on ndi, ndi laatoo ndongu mooɗon. Wo miin Joomiraaɗo wi'i on ɗum!
9 Muusaa yehi humpiti yimɓe Israa'iila haala kaan, ammaa ɓe kettindanaaki ɗum saabe jikke maɓɓe taƴii, wooɗi du maccungaaku maɓɓe nguun sattii sanne.
10 Joomiraaɗo haaldi e Muusaa katin, wi'i:
11 — Yahu kaaldaa e Fira'awna kaananke Misira oon, mbi'aa ɗum yoppa yimɓe Israa'iila mburtoo leydi muuɗum. 12 Muusaa jaabii Joomiraaɗo, wi'i: Fay yimɓe Israa'iila kettindanaaki kam, ndelle noy Fira'awna hettindanortoo kam miin mo haala muuɗum laaɓaa?
13 Ndeen Joomiraaɗo wi'i Muusaa e Haaruuna njaha kollowa yimɓe Israa'iila e Fira'awna kaananke Misira yamiroore muuɗum, ɗuum woni wurtinde yimɓe Israa'iila leydi Misira.
Ƴuwdi Muusaa e Haaruuna
14 Inan hooreeɓe cuuɗi Israa'iila'en: Ɓiɓɓe Ruben afo Israa'iila ɓeen ngoni Henok e Pallu e Hesruuna e Karmi. Ɓeen ngoni ƴuwdi suudu Ruben. 15 Ɓiɓɓe Simeyon ngoni Yemu'el e Yamin e Ohada e Yakin e Sohar e Sawulu ɓii kanaaniijo debbo. Ɓeen ngoni ƴuwdi suudu Simeyon. 16 Inan inɗe ɓiɓɓe Lewi fodde cuuɗi muɓɓen: Gerson e Kohat e Merari. Duuɓi Lewi fuu wo 137. 17 Ɓiɓɓe Gerson du ngoni Libini e Simey, mono fuu e cuuɗi muuɗum. 18 Ɓiɓɓe Kohat ngoni: Amram e Yitsehar e Heberon e Ujjiyel. Duuɓi Kohat fuu wo 133. 19 Ɓiɓɓe Merari du ngoni: Makli e Musi. Ɓeen ngoni lenyol Lewi fodde cuuɗi muɓɓen. 20 Amram ɓaŋi goggiiɗum Yokebed. Oon rimani ɗum Haaruuna e Muusaa. Duuɓi Amram fuu wo 137. 21 Ɓiɓɓe Yitsehar du ngoni Koora e Nefek e Jikiri. 22 Ɓiɓɓe Ujjiyel ngoni Miisa'iilu e Elsafan e Sitiri. 23 Haaruuna ɓaŋi Eliseba ɓii Aminadaabu sakiike Naasun debbo. Oon rimani ɗum Nadaf e Abihu e Eliyasar e Itamar. 24 Ɓiɓɓe Koora ngoni Asir e Elkaana e Abiyasaf. Ɓeen ngoni ƴuwdi suudu Koora. 25 Eliyasar ɓii Haaruuna ɓaŋi ɓii Putiyel debbo. Oon rimani ɗum Pinehas. Yimɓe limtaaɓe ɓeen ngoni ƴuwdi suudu Lewi fodde e cuuɗi muɓɓen. 26 Haaruuna e Muusaa inndaaɓe ɗo ɓeen jaati ngoni ɓe Joomiraaɗo yamirnoo mburtina jama'aaje muuɗum, Israa'iila'en nder leydi Misira geɓe geɓe. 27 Wo kamɓe kaaldunoo e Fira'awna, kaananke Misira, kabaaru wurtingol yimɓe Israa'iila'en nder leydi Misira. Wo Muusaa e Haaruuna pay.
— Miin woni Joomiraaɗo, yahu haalanoy Fira'awna kaananke Misira, ko kaalananmaami fuu.
30 Ammaa Muusaa jaabii Joomiraaɗo, wi'i:
— Inan mi jom toni tedduɗi, haala am laaɓaa. Ndelle noy Fira'awna hettindanortoo kam?