Yamiroore dow yaafagol nyamaale
15
1 Ley duuɓi jeɗɗi fuu, sey njaafanoɗon joganiiɓe on nyamaande wakkati timmoode hitaande jeɗɗaɓerde ndeen. 2 Inan no nyamaande ndeen yaafortee: Nde hitaande ndeen gooynaa wo yaafanteende nyamaale saabe Joomiraaɗo fu, tawanooɗo na rewa banndum nyamaande fu, yaafoo, taa ƴamta nyamaande ndeen katin. 3 Oɗon mbaawi doolɗude janano yoɓa on ammaa sakiike mon kaa, njaafanoɗon ɗum.4 Si on ngaɗii noon fu, talkaajo tawataake hakkunde mooɗon sabo Laamɗo Joomiraaɗo mooɗon barkinan on ley leydi ndi hokkata on laatoo jeyal mon ndiin. 5 Noon laatortoo si on tinnake e ɗowtanaade jamirooje makko, on ngaɗii ko o wi'i, ko njanginammi on hannden ɗuum. 6 Laamɗo Joomiraaɗo mooɗon barkinan on fodde no wi'iri on noon. Wo onon kokkata lenyi keewɗi nyamaale ammaa onon kaa, on nyamlataako. On ndawranan lenyi ɗuuɗɗi ammaa ɗi ndawrantaa on.
7 Si gooto ley sakiraaɓe mon talkiɗii nder galluuje mon ley leydi ndi Laamɗo Joomiraaɗo mooɗon hokkata on ndiin fu, taa njoornon ɓerɗe mon de kunngoɗon nyamlaade ɗum buuɗi. 8 Kokkon mo nyamaande o humtira haajuuji makko fuu. 9 Kakkilon, taa miilooji bonɗi koomta on de mbi'on: «Hitaande jeɗɗaɓerde nde yaafagol nyamaale ndeen ɓadake.» Taa ndaardon sakiike mon talkaajo oon bonde de kunngoɗon hokkude ɗum faa'e, sabo o wullitoto to Joomiraaɗo saabe ko ngaɗuɗon o ɗuum de waddana on hakke. 10 Ndelle nyamloɗon o, wooɗi du, kokkiron o yardamuye. Si on ngaɗii noon fu, Laamɗo Joomiraaɗo mooɗon barkinan golle mon e ko anniyiɗon waɗude fuu. 11 Talkaaɓe tawetee ley leydi mon wakkati fuu. Wo saabe ɗuum de miɗo hokka on yamiroore ndee: moƴƴanon sakiraaɓe mon talkaaɓe e tampuɓe wonɓe ley leydi mon.
Yamiroore dow rimɗingol maccuɓe
12 Si sakiike maaɗa Ibraninke gorko naa debbo sottirii ma hoore muuɗum fu, gollirane duuɓi jeegom. Ammaa hitaande jeɗɗaɓerde ndeen, accaa o hoota wuro makko o dimo. 13 Nyannde kokkataa o laawol ndeen, taa accaa o dilla to maaɗa juuɗe ɓole. 14 Njardoɗaa kokkaa o daabaaji pamari e alkama e inaboojam e huunde fuu ko Laamɗo Joomiraaɗo maaɗa barkiniri ma. 15 Miccitoɗaa a laatakeno maccuɗo leydi Misira de Laamɗo Joomiraaɗo maaɗa rimɗini ma. Wo saabe ɗuum de miɗo hokke yamiroore ndee hannden.
16 Si maccuɗo maaɗa wi'ii ma: «Mi yiɗaa dillude ɗo maaɗa», saabe imo yiɗi ma aan e yimɓe maaɗa, o tawii wondude e maaɗa na weli o fu, 17 sey takkaa o e gampuwal suudu mon de tufiraa nowru makko kural. Ndeen o heddoo o maccuɗo maaɗa faa abada. Wo noon njeyɗaa waɗude korɗo maaɗa du.
18 Taa mimsitee yoofude maccuɗo mooɗon hoota sabo o gollanii on duuɓi jeegom. O waɗii on keɓii ko golloowo joɓeteeɗo waɗanannoo on ɗuum kile ɗiɗi. Ndeen Laamɗo Joomiraaɗo mooɗon barkinan on ley golleeji mon fuu.
Haala ko laatii awru fuu
19 Ko laatii awru daabaaji mon pamari e mawɗi fuu ceninanon ɗum Laamɗo Joomiraaɗo mooɗon. Taa ndemnon awru nagge, taa keson awru mbaalu naa mbeewa. 20 Hitaande fuu, nyaamon ɗi yeeso Laamɗo Joomiraaɗo mooɗon onon e yimɓe mon ley nokkuure nde suɓoytoo ndeen. 21 Si tawii daaba oon na woodi malal hono mbumnga naa laƴoowa naa malal feere fu, taa cakkanon ɗum Laamɗo Joomiraaɗo mooɗon. 22 Nyaamon ɗum ley galluuje mon. Laaɓuɗo e mo laaɓaa fuu na mbaawi nyaamude ɗum hono no nyaamroton kooba naa lewla ni. 23 Ammaa taa nyaamon ƴiiƴam majji. Ndufon ɗam dow leydi hono ndiyam.