17
1 Taa cakkanon Laamɗo Joomiraaɗo mooɗon nagge naa mbaalu naa mbeewa ngoodunga male feere feere sabo ɗum na laatii ko harmi yeeso muuɗum.2 Si woodii hakkunde mooɗon, ley wootere e galluuje mon ɗe Laamɗo Joomiraaɗo mooɗon hokkata on ɗeen, gorko naa debbo gaɗuɗo ko boni yeeso Joomiraaɗo, bonnuɗo amaana muuɗum fu, 3 si joomum yehi teddinowi allaaji goɗɗi, hofake yeeso muɓɓen, yeeso naange naa lewru naa annoraaji kammu laatiiɗi fuu de yoppii ko njamirmi ɗuum, 4 si on nanii kabaaru majjum fu, ndaaron faa wooɗa yalla wo goonga bone iri oon waɗaama ley Israa'iila. 5 Caggal ɗuum njaaron joomum dammbugal galluure ndeen de paɗɗon ɗum kaaƴe faa maaya.
6 Wo dow seedaaku yimɓe ɗiɗo naa tato joomum waɗii ko boni saabanto ɗum wareede. Ammaa seedaaku neɗɗo gooto tan heƴaay joomum waree. 7 Seediiɓe o waɗii ko boni ɓeen artotoo paɗɗa joomum kaaƴe faa mbara ɗum de yimɓe fuu ndewta. Noon ittirton ko boni hakkunde mooɗon.
Kabaaruuji tiiɗuɗi careteeɗi ley nokkuure seniinde
8 Si tawii saraade war-hoore naa wolde naa nawnalla naa kabaaru gomma na tiiɗani on fu, sey njaaron sariya oon to Laamɗo Joomiraaɗo mooɗon, ley nokkuure nde suɓoytoo ndeen. 9 Njahon to almaami'en Lewinkooɓe e to carotooɗo ley balɗe ɗeen de ɓeen kolla on no haani cariron haala kaan. 10 Ngaɗon sariya mo ɓe kokki on oon ley nokkuure nde Joomiraaɗo suɓoytoo ndeen. Tinnoɗon ngaɗon ko ɓe mbi'i ɗuum pay. 11 Ngaɗon sariya mo ɓe kolli on fodde no ɓe njamiri on. Taa oonyoroɗon nano naa nyaamo ammaa ngaɗon ko ɓe mbi'i tan. 12 Mawninkiniiɗo de salii hettindaade ko almaami golloowo yeeso Laamɗo Joomiraaɗo mooɗon oon wi'i, naa ko carotooɗo ley balɗe ɗeen wi'i fu, wo bareteeɗo. Noon ittirton ko boni ley Israa'iila. 13 Yimɓe fuu nanan ɗum de kulol nannga ɗum'en. Noon waɗata de ɓe mawnintaa ko'e maɓɓe katin.
Sariya dow laataade kaananke
14 Nde naatoyɗon leydi ndi Laamɗo Joomiraaɗo mooɗon hokkata on ndiin, nde njeytoyɗon ndi faa njooɗiɗon e mayri fu, na hasii on muuyan kaananke laatoo mawɗo mon hono no leyɗe piiliiɗe on ɗeen noon. 15 Ndelle na tilsi cuɓoɗon gorko mo Laamɗo Joomiraaɗo mooɗon suɓoytoo hakkunde sakiraaɓe mon laatoo kaananke mooɗon. On mbaawaa suɓaade janano, sey tawee wo sakiike mooɗon.
16 Ammaa taa kaananke mon oon tawree pucci ɗuuɗɗi. Taa o nela yimɓe leydi Misira saabe soodoyde pucci faa keewa sabo Joomiraaɗo wi'i: «Taa njeccoɗon toon katin.» 17 Taa kaananke oon waɗa rewɓe ɗuuɗɓe sabo ɗuum na waawi oonyude ɓernde muuɗum. Taa o tawree cardi ɗuunndi naa kaŋŋe ɗuuɗɗo.
18 Nde kaananke oon jooɗowii dow jooɗorgal laamu muuɗum fu, jaɓa dewtere jamirooje ndee to almaami'en Lewinkooɓe de winndana hoore muuɗum jamirooje ɗeen fuu. 19 O jogoo nde, imo jannga nde nyannde fuu haddi balɗe makko fuu faa o ekitoo kulol Laamɗo Joomiraaɗo makko de o waɗa ko jamirooje ɗeen e sariyaaji ɗiin mbi'i fuu. 20 Noon waɗata taa o mawninkinoo, o sikka imo ɓuri sakiraaɓe makko de o selira laawol goonga ngool nano naa nyaamo. Si o waɗii noon fu, laamu makko juutan kanko e ɓiɓɓe makko fuu hakkunde Israa'iila.