Ko Lewinkooɓe njeyi hokkeede
18
1 Almaami'en Lewinkooɓe e ƴuwdi Lewi fuu ngalaa ndongu hakkunde Israa'iilankooɓe. Nyaamdu maɓɓe wo ko sakkantee Joomiraaɗo, wo ɗuum woni ndongu maɓɓe. 2 Ɓe ngalaa ndongu hakkunde sakiraaɓe maɓɓe Israa'iilankooɓe. Joomiraaɗo kam woni ndongu maɓɓe fodde no fodoranii ɓe noon.3 Inan ko almaami'en njeyi ley ko yimɓe cakkanta Joomiraaɗo: Si wo nagge naa mbaalu naa mbeewa fuu, almaami jeyi walaawo e gole e kujje reedu fuu. 4 Kokkon ɓe ko artii ɓenndude ley gese mon fuu, ɗum woni alkama e inaboojam e nebbam tawti leeɓi baali artiiɗi heseede, 5 sabo wo kamɓe e ɓiɓɓe maɓɓe Laamɗo Joomiraaɗo mooɗon suɓii hakkunde cuuɗi Israa'iila fuu faa laatoo darotooɓe ngolla yeeso muuɗum faa abada.
6 To Lewinke tawaa ley galluuje mon fu, na waawi yaade wakkati mo haajaa fuu ley nokkuure nde Joomiraaɗo suɓoytoo ndeen. 7 Imo waawi gollude golle Joomiraaɗo ley nokkuure seniinde ndeen hono no sakiraaɓe makko Lewinkooɓe darotooɓe yeeso Joomiraaɗo ɓeen noon. 8 O hokkee nyaamdu ndu banndiraaɓe makko nyaamata, baka jawdi ndi o heɓata e sonnugol ndongu baabiiko walaa.
Haala daggadaaɓe e annabaaɓe goongaaɓe
9 Nde naatoyɗon leydi ndi Laamɗo Joomiraaɗo mooɗon hokkata on ndiin fu, tinnoɗon taa nyemmbiton waɗude kujje karmuɗe ɗe lenyi ɗiin ngaɗata ɗeen. 10 Taa tawee hakkunde mon neɗɗo kooƴoowo ɓiyum debbo naa gorko wula, naa neɗɗo gaɗoowo ndaggadaaku naa tiimngal, naa gollidoowo e ginnaaji naa sukunyaajo, 11 naa gollidoowo e beeli maayɓe naa cafaaje ɓaleeje naa kaaldoowo e maayɓe naa ginnaaji. 12 Gaɗuɗo gootel e majji fuu, waɗii ko harmi yeeso Joomiraaɗo. Wo saabe majjum de Joomiraaɗo riiwi lenyi ɗiin fuu yeeso mooɗon. 13 Laatoɗon ɓe ngalaa feloore yeeso Laamɗo Joomiraaɗo mooɗon.
14 Sabo lenyi ɗi ndiiwoyton ɗiin fuu wo filotonooɓe tiimgal, gollidooɓe e ginnaaji. Ammaa onon kaa, Laamɗo Joomiraaɗo mooɗon hokkaay on iri ɗuum e banndum. 15 Laamɗo Joomiraaɗo mooɗon, umminan annabaajo hakkunde mooɗon, gooto e sakiraaɓe mooɗon hono miin Muusaa ni. Kettindanoɗon joomum. 16 Wo ɗuum ŋaariɗon Laamɗo Joomiraaɗo mooɗon dow waamnde Sinayi nyannde kawrital nde ndarinoɗon oɗon mbi'a:
— Taa min keddoo miɗen nana konngol Laamɗo Joomiraaɗo amin. Taa min keddoo miɗen nji'a yiite mannge ngee sabo min maayan!
17 Ndeen Joomiraaɗo wi'i kam:
— Ko ɓe mbi'i ɗuum na wooɗi. 18 Mi umminan gooto hakkunde sakiraaɓe maɓɓe, laatanoo ɓe annabaajo hono maaɗa ni. Mi wattan konngol am e hunnduko muuɗum de holla ɓe ko njamirammi ɗuum fuu. 19 Mo hettindanaaki haalaaji ɗi annabaajo oon haalirta e innde am ɗiin fuu, wo miin e hoore am jukkotoo ɗum. 20 Ammaa si annabaajo mawnitake de wi'i goɗɗum feere e innde am, tawi wanaa miin yamiri ɗum haala kaan, naa si haalii e inɗe allaaji goɗɗi fu, sey waree.