Galluuje moolorɗe waɗuɓe war-hoore
19
1 Nde Laamɗo Joomiraaɗo mooɗon halkidowi lenyi jooɗiiɗi ley leydi ndi hokkata on ndiin, wakkati njeytoyɗon leydi ndiin de njooɗiɗon ley galluuje maɓɓe e cuuɗi maɓɓe fu, 2 itton galluuje tati hakkunde leydi ndi o hokkata on ndiin. 3 Ngaɗon laawi* wooɗi du, cenndon leydi ndi kokkaɗon laatoo ndongu mooɗon ndiin pecce tati. Noon waɗata de gaɗuɗo war-hoore fuu heɓa to moolowoo.4 Inan no gaɗuɗo war-hoore heɓirta laawol yaade suuɗowoo ley galluuje ɗeen faa daɗa: Si joomum hensaaki de fiyi banndum wari ɗum tawi nganyaandi walaano hakkunde maɓɓe. 5 Hono si yimɓe ɗiɗo njaadii soppude leɗɗe de njamndi jammbere gooto sontake soppii banndum de saabanii ɗum maayde fu, jom jammbere oon na waawi doggude moolowoo faa hisina yonki muuɗum. 6 Taa joɓtantooɗo baraaɗo oon riiwa o, hewtoo o saabe mboɗɗirka laawol de wara o ley tikkere muuɗum. Taa o waree sabo nganyaandi walaano hakkunde maɓɓe. 7 Wo saabe ɗuum de miɗo yamira on cenndon galluuje tati ɗeen.
8 Si Laamɗo Joomiraaɗo mooɗon yaajinii leydi ndi hunii hokkan maamiraaɓe mon ndiin, si hokkii on leydi ndiin fodde no aadoraninoo maamiraaɓe mooɗon noon fu, 9 ko heddii woni ɗowtanoɗon yamiroore muuɗum ndeen de ngaɗon ko ekintinammi on hannden ɗuum. Njiɗon Laamɗo Joomiraaɗo mooɗon, ndewon laabi muuɗum wakkati fuu. Ndeen on ɓeydan galluuje tati e galluuje moolorɗe tati artiiɗe ɗeen, 10 taa ƴiiƴam laaɓuɗo saama dow leydi ndi Laamɗo Joomiraaɗo mooɗon hokkata on laatoo jeyal mooɗon ndiin. Noon waɗata taa hakke yowoo dow mooɗon.
11 Ammaa si neɗɗo na wanyi banndum de jambake fiyi ɗum faa maayi fu, fay si joomum doggiri galluuje ɗeen, 12 mawɓe galluure muuɗum nanngowan ɗum ngatta e juuɗe joɓtantooɗo baraaɗo oon faa wara o. 13 Taa njurmoɗon o, itton ƴiiƴam laaɓuɗo oon dow leydi Israa'iila faa keɓon jam.
Sariya dow keeri leydi
14 Taa cottinon keeri hoddiraaɓe mon ɗi artinooɓe on ndiidi ley leydi ndi Laamɗo Joomiraaɗo mooɗon hokkata on faa laatoo jeyal mon ndiin.
Haala seediiɓe goɗɗum na waɗa
15 Seedaaku neɗɗo gooto tan hewtaay nanngude goɗɗo dow feloore naa hakke laatiiɗo fuu. Wo seedaaku yimɓe ɗiɗo naa tato mbaawi nanngude joomum.
16 Si goɗɗo seedanake banndum fewre, dilii ɗum bonanda fu, 17 yimɓe ɗiɗo haɓdooɓe ɓeen ngaran yeeso Joomiraaɗo, ɓe ndaroo yeeso almaami'en e sarotooɓe wakkati oon. 18 Sarotooɓe ɓeen ndaara faa wooɗa yalla gaɗuɗo seedaaku oon wo fewre seedii, naa wo goonga. 19 Si on tawii wo o penoowo fu, ngaɗon o ko o haajanoo sakiike makko oon waɗee ɗuum. Noon ittirton ko boni hakkunde mooɗon. 20 Si heddiiɓe nanii ɗum fu kulan de cela fenande goɗɗo hakkunde mooɗon. 21 Taa njurmoɗon pelniiɗo. Ittuɗo yonki goɗɗo fuu, yonkim ittee. Ittuɗo yitere du, yiterem ittee. Ittuɗo nyiinde, nyiindem ittee. Ittuɗo junngo, junngom ittee. Ittuɗo koyngal, koyngal mum ittee.