Galluuje Lewinkooɓe
35
1 Joomiraaɗo haaldi e Muusaa ley njaayri Mo'ab, daande Urdun to ƴeenyirde Yeriko, wi'i ɗum:
2-3 Njamiraa Israa'iilankooɓe ittana Lewinkooɓe ngeɗu leydi, galluuje ɗo ɓe njooɗoo, e piilol majje ɗo ɓe ndura daabaaji maɓɓe fuu. 4 Nokkuuje durduɗe ɗe kokkoton Lewinkooɓe ɗeen toowtira kokuwol huɓeere ndeen meetereeji 500 tatteeji fuu. 5 Ponndiron yaasin galluure ndeen meetereeji 1 000 faro lettugal e gorgal, soɓɓirre e horɗoore fuu. Galluure ndeen tawee na woni hakkunde. Ɗum woni nokkuuje ɗe kokkoton ɓe ɓe ngaɗa durduɗe. 6 Kokkon Lewinkooɓe galluuje jeegom ɗo waɗuɓe bara-ko'e mooloto. Katin du, ɓeydon kuɓeeje 42 goɗɗe. 7 Galluuje ɗe kokkoton Lewinkooɓe fuu wo 48 tawta nokkuuje durduɗe. 8 Hakkunde lenyi Israa'iila 12 ɗiin, lenyol fuu ittana Lewinkooɓe ngeɗu leydi fodde no yimɓe muuɗum poti. Si wo lenyol manngol, ittana ɓe galluuje ɗuuɗɗe; si wo lenyol pamarol du, itta ko famɗi.
Galluuje moolorɗe waɗuɓe bara-ko'e
9 Joomiraaɗo haaldi e Muusaa wi'i:
10 Mbi'aa Israa'iilankooɓe: nde peƴƴitinɗon Urdun de naatuɗon leydi Kanaana fu, 11 cuɓoɗon galluuje moolorɗe. Waɗuɓe bara-ko'e de tawi kensaaki fu, keɓa to mooloo. 12 Galluuje ɗeen mballan joomum faa hisa joɓtantooɗo baraaɗo oon fadde muuɗum e sareede yeeso jamaare Israa'iila. 13 Galluuje jeegom cuɓotoɗon hakkunde galluuje mooɗon ɗeen faa laatoo galluuje moolorɗe. 14 Itton galluuje tati lettugal Urdun, tati du ley leydi Kanaana. Ɗe laatoo galluuje moolorɗe.
15 Galluuje jeegom ɗeen laatoo moolorɗe Israa'iilankooɓe e weerɓe e jananɓe tawaaɓe hakkunde muɓɓen, waɗuɓe bara-ko'e de tawi kensaaki fuu.
16 Si tawii njamndi o fiiri joomum o wari ɗum fu, o waɗii war-hoore. Ndelle na tilsi o waree. 17 Si wo hayre waawunde warude o faɗɗi joomum de o wari ɗum du, o waɗi war-hoore. Ndelle tilay o waree. 18 Si wo leggal baawngal warude o fiiri joomum de maayi fu, o waɗi war-hoore. Ndelle na tilsi o waree. 19 Joɓtantooɗo baraaɗo oon kam jeyi warude mo. Wakkati hawri e makko pay, warata mo. 20-21 Si nganyaandi o fiiri joomum maa e semmbe o guƴƴorii ɗum maa goɗɗum o faɗɗi joomum de maayi fu, o waɗii war-hoore. Joɓtantooɗo oon na jeyi warude mo wakkati hawri e makko pay.
22 Ammaa si tawii o hensaaki de o dunƴi joomum, wooɗi wanaa nganyaandi o faɗɗiri ɗum, 23 maa o yi'aay joomum de o limniri ɗum hayre waawnde warde ɗum de ɗuum saabanii joomum maayde, si wo goonga joomum wanaa ganyo makko, wooɗi muuyanaayno mo bone fu, 24 jamaare Israa'iila saroo hakkunde makko e joɓtantooɗo oon fodde no yamiraa. 25 Ndelle jamaare ndeen teeta mo e juuɗe joɓtantooɗo oon de yeccina mo ley galluure nde o suuɗinoo ndeen. Toon o heddoto faa almaami mawɗo ceniraaɗo nebbam oon maaya.
26 Ammaa si gaɗuɗo war-hoore oon wurtake ley galluure moolorde ndeen 27 de joɓtantooɗo oon wari mo fu, waɗaay war-hoore. 28 Gaɗuɗo war-hoore oon heddoto ley galluure moolorde toon faa almaami mawɗo oon maaya. Gaɗa ɗuum, imo waawi yeccaade leydi makko.
29 Ɗum wo yamiroore nde ɗowtantoɗon gilla hannden faa e jamaanuuji fuu to njooɗoytoɗon fuu.
30 Ko laatii kabaaru war-hoore fuu, gaɗuɗo war-hoore oon warataake si wanaa seedeeɓe ɗuuɗɓe ceedi wo kanko waɗi ɗum. Seedee gooto tan heƴataa faa joomum waree. 31 Taa njaɓon njeenaari gaɗuɗo war-hoore de cuuɗon bone muuɗum oon faa wuura, sabo na tilsi o waree. 32 Wooɗi du, taa njaɓon njeenaari ngaɗuɗo war-hoore gonɗo ley galluure moolorde faa yeccoo leydi muuɗum gilla almaami mawɗo oon maayaay.
33 Taa tuuninon leydi ndi njooɗiɗon e muuɗum ndiin sabo ƴiiƴam wo huunde tuuninoore leydi. Wooɗi du, si ƴiiƴam rufii e leydi fu, walaa ko waawi mooytude ɗam si wanaa nde ƴiiƴam gaɗuɗo war-hoore oon rufaa. 34 Ndelle taa tuuninon leydi ndi njooɗiɗon e muuɗum, e ɗo njooɗiimi, sabo wo miin woni Joomiraaɗo wooɗi du, miɗo jooɗii hakkunde yimɓe Israa'iila.